ԵՐԵՒԱՆ, <<Ռադիօլուր>> - <<Երեւան>> հիմնադրամի տնօրէն Աշոտ Ղազարեան եւ Դաւիթաշէն վարչական շրջանի ղեկավարի տեղակալ Խաչատուր Կիրակոսեան ձերբակալուեցան:
13 Յունիսին յայտնի դարձաւ, որ Հայաստանի Հանրապետութեան Ազգային անվտանգութեան ծառայութիւնը Հայաստանի քաղաքացիներ Վ. Գ.էն եւ եւ Ա. Խ.էն տեղեկացած է, որ Երեւանի քաղաքապետարանի պաշտօնատար անձեր, կառուցապատման եւ գոյքի ձեւակերպման համապատասխան թոյլտուութիւններ տրամադրելու դիմաց, բացի օրէնքով սահմանուած վճարումներէն, պարտադրած են իրենց <<Երեւան>> հիմնադրամին փոխանցել մեծ չափերով գումարներ:
Քննութեան ընթացքին պարզուեցաւ, որ վերոնշեալ պատրուակով կանխիկ ստացուած գումարներուն մէկ մասը հիմնադրամի հաշուոյն չէ մուտքագրուած եւ գողցուած է:
Յանցագործութեան մասին հաղորդումներու հիման վրայ՝ ՀՀ ԱԱԾ քննչական վարչութիւնը Երեւանի քաղաքապետարանի վարչական շէնքին մէջ գտնուող <<Երեւան>> հիմնադրամի աշխատասենեակները խուզարկեց եւ ձեռնարկեց լայնածաւալ հետախուզական միջոցառումներու եւ քննչական գործողութիւններու՝ քաղաքացիներէն գումարներու հաւաքագրման հանգամանքները, ծախսերու ուղղութիւնները եւ նպատակայնութիւնը, ինչպէս նաեւ օրինականութիւնը պարզելու ուղղութեամբ: