ԵՐԵՒԱՆ, «Արմէնփրէս».- «Ֆէյսպուք»ի իր էջին վրայ, Հայաստանի վարչապետի պաշտօնակատար, «Իմ Քայլը» նախընտրական ցանկը գլխաւորած Նիկոլ Փաշինեան արձանագրած է հետեւեալ գրութիւնը.

«Երէկ Հայաստանում տեղի ունեցած արտահերթ խորհրդարանական ընտրութիւնները Հայաստանում ժողովրդավարութեան եւ ժողովրդի իշխանութեան բացառիկ յաղթանակը դարձան: Այսօր ընտրութիւններին հետեւած միջազգային դիտորդները բացառիկ եւ աննախադէպ բարձր գնահատական են տուել մեր ընտրութիւնների արդիւնքներին՝ ըստ էութեան, արձանագրելով խորհրդարանական արտահերթ ընտրութիւնների ազատ, արդար, թափանցիկ եւ ժողովրդավարական լինելու փաստը: Սա աննախադէպ իրադարձութիւն է երրորդ հանրապետութեան պատմութեան մէջ: Սա իսկապէս Հայաստանի քաղաքացու կարեւորագոյն նուաճումն է: Այս ընտրութիւնները կարեւոր եւ բացառիկ էին Ապրիլ-Մայիսին տեղի ունեցած ոչ բռնի, թաւշեայ, ժողովրդական յեղափոխութեան արդիւնքները արձանագրելու առումով: Ես ուզում եմ շնորհակալութիւն յայտնել բոլոր այն քաղաքացիներին, ովքեր այս ընտրութիւններում կրկին իրենց վստահութեան քուէն տուեցին մեզ, իրենց վստահութեան քուէն տուեցին «Իմ Քայլը» դաշինքին: Այդ վստահութեան քուէն բացառիկ պարտաւորեցնող է, եւ մենք գիտակցում ենք, որ եկել է օր ու գիշեր աշխատելու, եւ ժողովրդի վստահութիւնն արդարացնելու ժամանակը: Որեւէ կասկած չկայ, որ մենք ամբողջութեամբ նուիրուած ենք այդ առաքելութեանը: Առաջիկայում տեղի կ՛ունենայ ԱԺի, նրա մարմինների, նոր կառավարութեան ձեւաւորումը, եւ մեծ թափով կը սկսենք այն բոլոր նախընտրական ծրագրերի իրագործումը, որոնցով հանդէս ենք եկել այս ընտրութիւններում նախընտրական քարոզարշաւի ընթացքում»՝ շեշտելով. «Այս ընտրութիւններն ազգային միասնութեան ու համախմբման մի նոր առիթ պէտք է դառնան: Ըստ էութեան, եկել է Հայաստանում արարման, ստեղծման, Հայաստանը ազատ եւ երջանիկ պետութիւն դարձնելու, տնտեսական յեղափոխութեանը նոր թափ եւ ուժ տալու ժամանակը, եւ ես համոզուած եմ, որ մենք իրար հետ միասին Հայաստանի Հանրապետութիւնը, Արցախի Հանրապետութիւնը, Սփիւռքը, հայ ժողովուրդը, որպէս մէկ ամբողջութիւն, կը հասնենք այդ նպատակներին, եւ ազգային երազանքների իրականացմանը: Եւ այս համատեքստում շատ կարեւոր է, որ մենք պահպանենք ու զարգացնենք Հայաստանում ժողովրդավարութեան քննարկման, բանավէճի մթնոլորտը, եւ մեր երազանքներն իրար հետ կիսենք, եւ այդ պրոցեսի (գործընթաց-Խմբ.) արդիւնքում դուրս բերենք համազգայինը, որը միաւորում է բոլորիս»: