ՀՅԴ ԳՄ

Հրապարակուեց Երեւանի Աւան եւ Նոր Նորք վարչական շրջանների ընդհանուր իրաւասութեան դատարանի որոշումը ՀՀ երկրորդ նախագահ Ռոբերտ Քոչարեանի խափանման միջոցի հարցով:

Հակառակ դատարանի նկատմամբ բացայայտ եւ դատապարտելի ճնշումների, վերջին օրերին ահագնացող հանրային լարուածութեանն ու անհանդուրժողականութեան մթնոլորտի ուղղորդուող շիկացմանը, ընդհանուր իրաւասութեան դատարանը, հիմք ընդունելով ԱՀ գործող նախագահ Բակոյ Սահակեանի եւ ԱՀ երկրորդ նախագահ Արկադի Ղուկասեանի միջնորդութիւնը, նախագահ Ռոբերտ Քոչարեանի խափանման միջոցը փոխելու որոշում կայացրեց:

Հաւատալով, որ դատարանը հաւատարիմ կը մնայ անկախ եւ ճնշումներից զերծ որոշում կայացնելու իր սահմանադրական յանձնառութեանը` այդուհանդերձ, դատապարտում ենք արդարադատութիւնը խոչընդոտելու իւրաքանչիւր դէպք` դրանք դիտելով որպէս Հայաստանում սահմանադրական կարգի հաստատմանն ու ամրագրմանն դէմ ուղղուած քայլ:

Փաստում ենք, որ այս օրերին արձանագրուած փողոցային ճնշումը խաթարում է ժողովրդավարական հասարակութեան, այդ թւում արդար եւ ազատ դատաքննութիւն վարելու հիմքերը եւ գտնում, որ գործադիր իշխանութիւնը պարտաւոր է հետեւողական միջոցներ ձեռնարկել եւ երաշխաւորել պետական իշխանութեան առանձին մարմինների անխափան գործունէութիւնը:

Հայ Յեղափոխական Դաշնակցութիւնը մերժում եւ դատապարտում է հայկական զոյգ պետութիւնների համերաշխութեանն ուղղուած, արհեստական բաժանարարներ եւ պառակտիչ տրամադրութիւններ արթնացնող որեւէ դրսեւորում` ցանկացած կողմից: Դաշնակցութիւնն իր ողջ կարողականութեամբ պայքարելու է եւ թոյլ չի տալու ցանկացած ոտնձգութիւն` ուղղուած ազգային միասնականութեանը:

Մեր հաւաքական պարտականութիւնն ու պատասխանատուութիւնն է աւելի քան միասնական լինել, ամրացնել ներհասարակական համերաշխութիւնը` դիմագրաւելու արտաքին եւ ներքին մարտահրաւէրները, լուծելու մեր համազգային անվտանգութեան խնդիրները:

ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ