By Aztag Daily | Tuesday, 21 March 2017
Ամէն մարդ իր արժանապատիւ վարձատրութիւնը պիտի ստանայ, եթէ երկիրը ճիշդ ճամբուն վրայ ըլլայ, սակայն անոր համար պէտք են մեքանիզմներ, պէտք է միջավայր փոխուի: Այս մասին երէկ Կոտայքի մարզի Քաղսի համայնքի ընտրողներուն հետ հանդիպումին ըսաւ ՀՅԴ Բիւրոյի քաղաքական ներկայացուցիչ, Ազգային ժողովի ՀՅԴ խմբակցութեան ղեկավար Արմէն Ռուստամեան:
Անոր համաձայն, կարելի չէ մարդիկը խաբել, սուտ խոստումներ տալ միայն անոր համար, որ այդ օրը գան եւ իրենց օգտին քուէարկեն: Ըստ Ռուստամեանի, երկրի բոլոր ընկերային հարցերուն հիմքը քաղաքական համակարգն է եւ եթէ քաղաքական համակարգը չփոխուի, այդ բոլոր խնդիրները պիտի մնան անփոփոխ:
Դաշնակցական թեկնածուն բնակիչներուն ներկայացուց խորհրդարանական կառավարման համակարգի առաւելութիւններն ու հաստատեց, որ նոր համակարգին մէջ պիտի չըլլայ մէկը, որ միանձնեայ որոշում տայ, վերէն մինչեւ վար բոլոր քատրային նշանակումները կատարէ:
<<Դաշնակցութիւնը ի սկզբանէ ըսած է, որ այս համակարգը չարիք ծնող համակարգ է: Մենք 1990-1991 թուականներէն նոյն բանը կ՛ըսենք: Նախագահական ընտրակարգին իբրեւ հետեւանք Հայաստանի մէջ երեք նախագահ փոխուեցաւ, բայց մարդոց կեանքին մէջ ոչինչ փոխուեցաւ, եղաւ սեփականութեան դերաբաշխում, մէկէն անցաւ միւսին, արդիւնքը` ժողովուրդը ոչինչ ստացաւ, չքաղեց անկախութեան պտուղները>>, յայտարարեց Ռուստամեան:
Անոր համաձայն, դաշնակցութեան նպատակը երկիրը առողջացնելն է. <<Ճիշդը դժգոհութիւնը ծնող պատճառները վերացնելն է, քան տեղ-տեղ ցաւազրկելը, որովհետեւ մինչեւ հիւանդութիւնը չբուժես` մարմինը չի կրնար առողջանալ>>, ըսաւ ան` աւելցնելով, որ եթէ մարդիկ արագ փոփոխութիւններ կ՛ուզեն, ապա ձեւաւորուող խորհրդարանը պէտք է որակ ունենայ:
Ըստ Ռուստամեանի, ժողովուրդի իշխանութիւնը կը դրսեւորուի ընտրութեան ժամանակ: <<Որեւէ մէկը չի կրնար ձեր ձայնը կեղծել: Մարդիկ զզուած են ընտրութիւններէն, որովհետեւ իրենց ձայնը կեղծուած է: Մարդիկ զզուած են եւ նախընտրած ընտրակաշառքի ձեւը, ըսած են` առիթ է, գոնէ 10-15 հազար դրամ շահինք, որովհետեւ այս ընտրութեամբ բան պիտի չփոխուի: Հաւատացէ՛ք, որ ժողովուրդին իշխանութիւնը կը դրսեւորուի ընտրութեան ժամանակ, դուք ձեր իշխանութենէն մի՛ հրաժարիք, ատիկա աւելի մեծ բան է, քան 10-15 հազար դրամը, որով ձեզ կը գայթակղեցնեն, այդպիսով պարզապէս ձեր իշխանութիւնը ձեզմէ կը խլեն>>, ըսաւ ան` յորդորելով գիւղացիները` մասնակցիլ ընտրութեան եւ իրենց քուէին տէրը ըլլալ:
comments
Արցախի Հանրապետութեան Ազգային Ժողովի Նախագահի Կոչը
Հայկական Կարմիր Խաչ Կ՛ահազանգեց, Որ Ատրպէյճանի Կարմիր Մահիկը Կը Խախտէ Շարժման Սկզբունքները
Կոչ Աւստրալիահայ գաղութին՝ բոլորս Արցախի կողքին
Ահաւոր Արկած Երեւան-Գիւմրի Ճամբուն Վրայ. Զոհուած Է 11 Հոգի
Էրտողան. «Զանգեզուրի Միջանցքի Անյապաղ Բացումը Կարեւոր Է Կարգաւորման Համար»