By Asbarez | Tuesday, 10 October 2017
Աշխատանքային այցելութեամբ Վայոց ձորի մարզ գտնուող հանրապետութեան նախագահ Սերժ Սարգսեան 6 հոկտեմբերի երեկոյեան Ջերմուկ քաղաքին մէջ հետեւած է Հայաստանի ճատրակի ֆետերասիոնի եւ Ճատրակի եւրոպական միութեան հետ համագործակցութեամբ Հայաստանի ճատրակի ակադեմիային կազմակերպած Եւրոպայի պատանեկան <<Կրան փրի>> մրցաշարքի 2-րդ փուլի ընթացքին, որ տեղի ունեցած է 4-էն 15 հոկտեմբերին <<Ջերմուկ աշխարհ>> նորակառոյց պանդոկին մէջ:
Հանրապետութեան նախագահը 7 հոկտեմբերի առաւօտեան տարածքային կառավարման եւ զարգացման նախարար Դաւիթ Լոքեանի, Հայաստանի տարածքային զարգացման հիմնադրամի գործադիր տնօրէն Աշոտ Կիրակոսեանի եւ կառավարութեան առընթեր քաղաքաշինութեան պետական կոմիտէի նախագահ Նարեկ Սարգսեանի ուղեկցութեամբ շրջագայած է Ջերմուկի մէջ` դիտած քաղաքի ձախափնեայ թաղամասին մէջ սկսած շինարարական աշխատանքներուն ընթացքը: Նախագահին զեկուցուած է, որ բոլոր շինարարական եւ վերահսկողութեան աշխատանքներուն աւարտը, բացառութեամբ տանիքաշինութեան ծրագիրին, նախատեսուած է ընթացիկ տարեվերջին:
Նախագահ Սերժ Սարգսեան յանձնարարած էր այդ աշխատանքներուն մէջ ներառել նաեւ սեփական մարզը, որպէսզի ծրագիրը դառնայ աւելի ընդգրկուն եւ խորածաւալ: Եռամսեայ ժամկէտի մը մէջ մշակուած է շուրջ 25 ծրագիր` ուղղուած քաղաքի ենթակառուցուածքներու, բնապահպանական, հանգիստի, զբօսաշրջութեան խթանման, ինչպէս նաեւ քաղաքի բնակչութեան կենցաղային պայմաններու բարելաւման խնդիրներու լուծման:
Ջերմուկի մէջ նախագահ Սարգսեան ծանօթացած է նաեւ աջափնեայ թաղամասին եւ Կեչուտի ջրամբարի դրացնութեամբ նախատեսուած կառուցապատման ներդրումային ծրագիրներու մշակման ընթացքին:
Աւարտելով Վայոց ձորի մարզի աշխատանքային այցելութիւնը` նախագահ Սերժ Սարգսեանը մեկնած է Սիւնիքի մարզ:
Սիւնիքի Մարզին Մէջ Մասնակցութիւն`
Սպարապետի Օրուան Նուիրուած Ձեռնարկներուն
Աշխատանքային այցելութեամբ 7 հոկտեմբերին Սիւնիք այցելած նախագահ Սերժ Սարգսեան մասնակցած է մարզին մէջ առաջին անգամ ըլլալով կազմակերպուող Սպարապետի օրուան նուիրուած ձեռնարկներուն:
Հանրապետութեան նախագահը ձեռնարկներու ծիրին մէջ այցելած է Խնձորեսկ համայնքին մէջ գտնուող Մխիթար Սպարապետի գերեզմանը, ծաղիկներ զետեղած եւ յարգանքի տուրք մատուցած Սպարապետի յիշատակին, իսկ երեկոյեան ներկայ գտնուած է օրուան խորհուրդին ներքեւ կազմակերպուած կալա համերգին:
Խնձորեսկի մէջ Սպարապետի օրուան նուիրուած բազմաբնոյթ ձեռնարկներուն զուգահեռ տեղի ունեցած են ժողովրդական տօնախմբութեամբ, երգ ու պարով, աւանդական տարբեր մարզաձեւերով մրցումներ:
Սիւնիքի մարզ կատարած այցելութեան շրջագիծին մէջ հանրապետութեան նախագահը այցելած է Գորիսի մէջ գտնուող Ակսել Բակունցի տուն-թանգարան: Նախագահին ներկայացուած է, որ 2012-2014 թուականներու ընթացքին թանգարանին մէջ կատարուած են հիմնանորոգման աշխատանքներ, բարեկարգուած է ցուցասրահը, ամբողջովին փոխուած են շարժական ցուցադրական վահանակները, ցուցափեղկերը եւ այլն:
Հանրապետութեան նախագահը ծանօթացած է նաեւ հիմնանորոգուող <<Գորիս>> պանդոկի պայմաններուն:comments
Արցախի Հանրապետութեան Ազգային Ժողովի Նախագահի Կոչը
Հայկական Կարմիր Խաչ Կ՛ահազանգեց, Որ Ատրպէյճանի Կարմիր Մահիկը Կը Խախտէ Շարժման Սկզբունքները
Կոչ Աւստրալիահայ գաղութին՝ բոլորս Արցախի կողքին
Ահաւոր Արկած Երեւան-Գիւմրի Ճամբուն Վրայ. Զոհուած Է 11 Հոգի
Էրտողան. «Զանգեզուրի Միջանցքի Անյապաղ Բացումը Կարեւոր Է Կարգաւորման Համար»