ՍՏԵՓԱՆԱԿԵՐՏ - Արցախի Հանրապետութեան նախագահ Բակօ Սահակեան 7 Յուլիսին ընդունեց ՀՅԴ Բիւրոյի ներկայացուցիչ Հրանդ Մարգարեանը եւ ՀՅԴ Բիւրոյի քաղաքական ներկայացուցիչ, Հայաստանի Ազգային ժողովի ՀՅԴ խմբակցութեան ղեկավար Արմէն Ռուստամեանը:
Քննարկուեցան հանրապետութեան ներքին ու արտաքին քաղաքականութեան եւ շրջանին մէջ տեղի ունեցող հոլովոյթներուն վերաբերող հարցեր:
Երկրի ղեկավարը նկատել տուաւ, որ նման քննարկումները պահանջուած են. անոնք դարձած են աւանդական:
Հանդիպումին կը մասնակցէր ՀՅԴ Արցախի Կեդրոնական կոմիտէի ներկայացուցիչ Դաւիթ Իշխանեան:
Նախագահ Բակօ Սահակեանի հետ հանդիպումէն ետք, ՀՅԴ Բիւրոյի ներկայացուցիչ Հրանդ Մարգարեան լրագրողներու ըսաւ. «Ղարաբաղը երբեք այսքան զգայուն, այսքան նուրբ, այսքան դիւրաբեկ վիճակի մէջ չէ յայտնուած: Մենք ունինք անվտանգութեան հարց, մենք խնդիր ունինք այս փուլին ընելու ամէն ինչ, որպէսզի չէզոքանան արտաքին վտանգները: Այդ պատճառով պէտք է միասնականութիւն, ներքին միութիւն եւ կայունութիւն: Ասիկա լուրջ հարց է, Ղարաբաղի անվտանգութեան հետ կապուած խնդիր է, պիտի ըսէի նոյնիսկ անկէ աւելին է: Հայ ժողովուրդը այսօր կրնայ լուրջ կորուստ ունենալ: Այդ կորուստը կը սկսի Ղարաբաղով եւ կը վերջանայ Հայաստանի անկախութեան կորուստով, եթէ մենք չզգաստանանք, եթէ չանդրադառնանք, որ համախմբուածութիւնը այսօր ամէնէն կարեւոր հարցն է:
Ամէնէն վտանգաւորը այս պահուն, ներքին պառակտումն է, ներքին աթոռակռիւն է, որ պէտք է բացառել ամբողջութեամբ: Ղարաբաղը անցած 30 տարիներուն ընթացքին մեր այն ձեռքբերումն է, որ մենք իրաւունք չունինք որեւէ ձեւով վտանգելու: Վտանգել Արցախի ապագան՝ ազգային դաւաճանութիւն է: Եւ անկէ պէտք է խուսափիլ: Հարցը այն է, որ այս դիմադրութեան բերդը չեն կրնար գրաւել, եթէ ներսը՝ բերդին մէջ պառակտում չըլլայ: Եթէ բերդը չգրաւեն ներսէն, անկարելի է, որ կարենան դուրսէն գրաւել»: