ԼԱՒՍԻՆԷ ԹԵՒՈՍԵԱՆ
<<Ապառաժ>>ը կը տեղեկացնէ, որ <<Թուֆէնքեան>> բարեգործական հիմադրամին կողմէ 2004ին Արցախի հարաւը հիմնադրուած Առաջամուղ գիւղը տարուէ տարի կ՛ընդարձակուի. Ապրիլ 4ին, առաջամուղցի 6 ընտանիք բնակարանամուտ տօնեց։
<<Առաջամուղը ռազմավարական կարեւորութիւն ունի Արցախի համար: Ուստի մեր յետագայ քայլը դպրոցի վերակառուցումն ու բուժկէտի շէնքի կառուցումը պիտի ըլլայ>>, յայտնեց Թուֆէնքեան հիմնադրամի գործադիր-տնօրէն Րաֆֆի Տուտագլեան եւ յոյս յայտնեց, որ տարիներ ետք նորակառոյց գիւղը վերածուի քաղաքի:
Տան բանալիները տանտէրերուն յանձնեցին Սերժ Թանքեան, Արսինէ Խանճեան, Ատոմ Էկոյեան եւ Էրիք Նազարեան: Վերջիններս երկօրեայ այցով Արցախ կը գտնուին:
Հանրայայտ ամերիկահայ ռոք երաժիշտ եւ երգահան Սերժ Թանքեան իր խօսքին մէջ նշեց, որ այս օրերուն ընթացքին Արցախի մէջ տեղի ունեցած կարգ մը ձեռնարկներու մասնակցած է, սակայն ասիկա ամէնէն ազդեցիկն էր:
<<Մենք երախտապարտ ենք այս մարդոց, որոնք այստեղ կ՛ապրին>>, յայտնեց Թանքեան:
<<8 տարի առաջ այցելած եմ Արցախ եւ այդ տպաւորութիւններն են, որոնք այսօր զիս այստեղ բերած են: Այս անգամ ես ետ կ՛երթամ նոր տպաւորութիւններով: Յուսամ, որ սփիւռքահայութիւնը եւս ժամանակ կը տրամադրէ Արցախի հետ ծանօթանալու>>, յայտնեց դերասանուհի Արսինէ Խանճեան:
Նորակառոյց 6 տուները կառուցուած են <<Թուֆէնքեան բարեգործական հիմնադրամի եւ Միացեալ Նահանգներու <<Արցախ>> ֆոնտի ֆինանսաւորումով եւ Արցախի կառավարութեան աջակցութեամբ:
<<Մենք ուրախ ենք եւ երջանիկ այդ պարտականութիւնը մեր վրայ վերցնելուն համար: Արցախը մեր հայ ազգի ուժն է, եւ այն, ինչը մենք ըրած ենք, նուազագոյնն է>>, ըսաւ <<Արցախ>> ֆոնտի ներկայացուցիչ Ռաֆֆի Կիլիեան:
Նազարեաններու ընտանիքը 2013ին Արարատէն տեղափոխուած է Արցախ: Մինչ այդ տարբեր բնակավայրերու մէջ վարձով կը բնակէին:
<<Վերջապէս մեր սեփական տունը ունեցանք: Աշխատանքն ալ խնդիր չէ այստեղ: Քանի որ նախկին զինծառայող եղած եմ, հիմա ալ կը պատրաստուիմ վերադառնալ զինուորական գործիս, բայց արդէն Արցախի մէջ>>, պատմեց Նազարեաններուն հայրը:
Այսօր գիւղը 18 նորակառոյց առանձնատուն ունի: Ծրագիրին համաձայն՝ պէտք է կառուցուին եւս 32 տուներ: Նախատեսուած է նաեւ ընդարձակել գիւղի դպրոցն եւ բուժկէտ կառուցել:
<<Թուֆէնքեան>> հիմնադրամի հոգաբարձու Անդրանիկ Գասպարեան նշեց, որ այսուհետեւ Առաջամուղի ծրագիրը պիտի իրականացնէ <<Արցախ>> ֆոնտը:
<<Նպատակ ունինք մեր հիմնադրամի ծրագիրներուն միջոցով այլ բարերարներու ուշադրութիւնը սեւեռել դէպի Արցախ>>, նշեց Անդրանիկ Գասպարեան եւ աւելցուց, որ պէտք չէ հպարտանանք մէկ գիւղով, սահմանամերձ գօտիին վրայ պէտք է 20 նման գիւղ ունենանք:
Այգեստանի մէջ ապրող Նախշուն Յակոբեանի ընտանիքը քանի մը օրէն պիտի տեղափոխուի Առաջամուղի իր նոր բնակարանը:
<<Պատրաստ տուները մեզի յանձնեցին, մենք ալ մեր ընտանիքներով պիտի շէնցնենք այս տարածքը>>, ըսաւ Նախշուն եւ աւելցուց, որ լուացքի մեքենայի համար վարկ վերցնելու անհրաժեշտութիւն այլեւս չկայ, քանի որ բնակարանամուտի ատեն բարերար մը խոստացած է բոլորին լուացքի մեքենայ, սառնարան ու հեռուստեսիլ նուիրել: