By Asbarez | Tuesday, 14 January 2020
ԵՐԵՒԱՆ, «Էրմենիհապեր».- Թուրքիոյ մէջ զինուորական պարտադիր ծառայութիւն կատարելու ընթացքին 2011ի Ապրիլ 24ին սպաննուած հայ քաղաքացի Սեւակ Պալըքչըի գործով դատարանը նոր որոշում տուաւ:
Արդարեւ, Սեւակի ծառայակից Քըւանճ Աղաօղլուն դիտաւորեալ սպանութեան մեղադրանքով դատապարտուեցաւ 16 տարի եւ 8 ամիս բանտարկութեան: Աղաօղլու կալանաւորուեցաւ դատական նիստին ընթացքին:
Սեւակի դատական գործը վերաբացուեցաւ 2018ին: 2013ին, ռազմական դատարան մը որոշած էր Աղաօղլուի ոճիրը որակել «ոչ-դիտաւորեալ» եւ «զէնքի հետ անփոյթ վարուելու հետեւանք», որուն համար ենթական դատապարտուած էր միայն 4.5 տարուան բանտարկութեան: Սակայն, Պալըքճըի ընտանիքը բողոքարկած էր վերոնշեալ որոշումը:
Քանի որ Թուրքոյ մէջ 2016ի Յուլիս 15ին տեղի ունեցած ռազմական յեղաշրջման փորձէն ետք փակուած էին բոլոր ռազմական դատարանները, Սեւակի գործը յանձնուեցաւ քաղաքացիական դատարանի մը:
Հակազդելով նոր որոշումին, Թուրքիոյ խորհրդարանի հայ պատգամաւոր Կարօ Փայլան նշեց, որ հակառակ թրքական դատարանի վճիռին, երկրին մէջ կը շարունակուի պահպանուիլ ատելութեան մթնոլորտը:
«Սեւակ Պալըքչըն սպաննուած է 9 տարի առաջ, Ապրիլ 24ին, որ Հայոց Ցեղասպանութեան զոհերու յիշատակի օրն է: Ոճիրին այդ օրը կատարուած ըլլալուն իրողութիւնը արդէն մեծցուցած է անոր ատելութեան հողի վրայ կատարուած ըլլալուն հաւանականութիւնը: Վերջապէս, 9 տարի անց, դատարանին կողմէ հաստատուեցաւ, որ Սեւակը սպաննուած է դիտումնաւոր կերպով, եւ ամբաստանեալը դատապարտուեցաւ 16 տարի 8 ամիս բանտարկութեան», գրեց հայ պատգամաւորը:
Փայլան նկատել տուաւ, որ Թուրքիոյ մէջ ցարդ չէ ապահովուած այնպիսի միջավայր, ուր տեղի պիտի չունենան ատելութեան հողի վրայ յանցագործութիւններ:
«Ուստի անհրաժեշտ է, որ Թուրքիոյ մէջ ատելութեան հողի վրայ կատարուած յանցագործութիւնները վերացնելու համար քաղաքական նախաձեռնութիւններ կեանքի կոչուին: Պէտք է ստեղծենք այնպիսի մթնոլորտ, որ ոչ մէկը նման յանցագործութիւններու թիրախ դառնայ», ընդգծեց ան, աւելցնելով. «13 տարի է ի վեր կը շարունակուի Հրանդ Տինքի դատական գործը: Այս շաբաթ պիտի շարունակենք Հրանդ Տինքի համար պայքարը»:
comments
Australia Live by Armenia Media: Victor Karapetyan
Australia Live by Armenia Media: Professor Navoyan
Australia Live By Armenia Media: Reverend Sarkissian
Australia Live By Armenia Media: Zarouhi Manoukian
Australia Live By Armenia Media: Hayk Arsenyan
Australia Live By Armenia Media: Hasmik Movsisyan & Zhanna Nazaryan
Australia Live By Armenia Media: Sarkis Yedelian
Australia Live By Armenia Media: Kaylar Michaelian
Australia Live By Armenia Media: Kevork Vartanian & Harmig Hagopian
Australia Live By Armenia Media: Margaret Chater and Houri Demirdjian