By Asbarez | Saturday, 11 May 2019
«Վարչապետին Անվստահութիւն Յայտնելու Գործընթաց Այս Պահին Մեր Օրակարգում Չկայ»
ՀԱՅԱՐՓԻ ԲԱՂԴԱՍԱՐԵԱՆ
Վերջին շրջանում մամուլում շրջանառւում են տեղեկութիւններ, ըստ որոնց՝ Հայ Յեղափոխական Դաշնակցութիւն կուսակցութիւնը պատրաստւում է Դեկտեմբերին վարչապետ Նիկոլ Փաշինեանին Անվստահութիւն յայտնելու գործընթաց սկսել:
Սակայն Սահմանադրութեան 115րդ յօդուածի համաձայն՝ վարչապետին անվստահութիւն կարող են յայտնել միայն խորհրդարանական ուժերը, աւելի կոնկրետ (յստակ-Խմբ.)՝ պատգամաւորների ընդհանուր թուի առնուազն մէկ երրորդը՝ միայն այն դէպքում, եթէ որոշման նախագծով միաժամանակ առաջարկւում է նոր վարչապետի թեկնածու:
Իսկ վարչապետին անվստահութիւն կարելի է յայտնել նրա նշանակումից ոչ շուտ, քան մէկ տարի յետոյ: Եւ եթէ վարչապետին անվստահութիւն յայտնելու մասին Ազգային ժողովի որոշման նախագիծը չի ընդունւում, ապա նման նախագիծ կարող է ներկայացուել ոչ շուտ, քան վեց ամիս յետոյ:
ՀՅԴի՝ վարչապետին անվստահութիւն յայտնելու գործընթաց սկսելու հնարաւոր մտադրութեան եւ այլ հարցերի շուրջ զրուցել ենք ՀՅԴ նորընտիր ԳՄ անդամ, ՀՀ տնտեսական զարգացման եւ ներդրումների նախկին նախարար Արծուիկ Մինասեանի հետ:
ՀԱՅԱՐՓԻ ԲԱՂԴԱՍԱՐԵԱՆ.- Պարոն Մինասեան, մամուլի հրապարակումների համաձայն՝ Դաշնակցութիւնը պատրաստւում է վարչապետին անվստահութիւն յայտնելու գործընթաց սկսել: Արդեօք նման նպատակ ունէ՞ք, եւ եթէ այո, ապա ինչպէս էք պատկերացնում ընթացակարգը, երբ դրա լիազօրութիւնն ունեն միայն խորհրդարանական ուժերը:
ԱՐԾՈՒԻԿ ՄԻՆԱՍԵԱՆ.- Այդպիսի գործընթաց այս պահին մեր օրակարգում չկայ: Մենք հետեւողականօրէն քննարկման ա-ռարկայ ենք դարձնում կառավարութեան, ինչպէս նաեւ Ազգային ժողովի գործունէութիւնը: Մեր նպատակն է ոչ միայն յայտարարուած քաղաքականութիւնը եւ իրականացուողը իրար հետ համադրելի վերլուծել, նաեւ մեր հասարակութեան, պետութեան կեանքում բազմաթիւ կարեւոր հարցեր դարձնենք նաեւ կառավարութեան եւ ԱԺի ուշադրութեան առարկայ: Հիմնական հարցերից մէկն օրինականութեան հարցն է: Ինչպէս որ կառավարութիւնն ու դրա ղեկավարը մշտապէս կարեւորում են սահմանադրականութիւնն ու օրինականութեամբ առաջորդուելու սկզբունքը, մենք նոյնպէս սա մեր կենտրոնական հարցերից մէկն ենք համարել: Սա մեզ համար սկզբունքային հարց է, որովհետեւ մի երկիր, որտեղ իշխանութիւնն անտեսում է օրինականութեան սկզբունքը, չի կարող առաջընթաց ունենալ: Գուցէ սա է պատճառ հանդիսացել, որ նման հրապարակումներ են եղել, բայց կարեւոր է նաեւ, որպէսզի մենք կարողանանք ճշգրիտ քաղաքական եւ իրաւական գնահատական տալ այն գործընթացներին, որոնք տեղի են ունենում մեր երկրում:
ՀԱՅԱՐՓԻ ԲԱՂԴԱՍԱՐԵԱՆ.- ՀՅԴն պարբերաբար խօսում է կառավարութեան արած սխալների եւ ձեռքբերումների մասին, բայց այս մէկ տարին բացարա՞ր է արդէն անվստահութիւն յայտնելու մասին մտադրութիւն ունենալու համար:
ԱՐԾՈՒԻԿ ՄԻՆԱՍԵԱՆ.- Անվստահութիւն յայտնելու գործընթացն առնուազն մէկ տարի յետոյ կարող է իրականացնել, իսկ դա նշանակում է, որ տրամաբանական չէ Դեկտեմբերին նման գործընթաց սկսել: Միւս կողմից այս գործընթացը նաեւ ենթադրում է կոնստրուկտիւ (կարուցողական-Խմբ.) անվստահութեան գործընթաց, այսինքն՝ ցանկացած ժամանակ, եթէ խորհրդարանում նախատեսւում է նման գործողութիւն, պէտք է ոչ միայն վարչապետի պաշտօնանկութեան, այլեւ նոր վարչապետի ընտրութիւն կազմակերպուի, իսկ սա նշանակում է, որ ԱԺում առնուազն 50 պլիւս (առաւել-Խմբ.) մէկ տոկոս վստահութիւն լինի, բայց այս պահին «Իմ Քայլը» տիրապետում է շատ աւելի մեծ քուէների, եւ զուտ իրաւական առումով անվստահութիւն յայտնելու սահմանադրական ընթացակարգը գոնէ տեսանելի չի: Միւս կողմից՝ սա չի նշանակում, որ քաղաքական գործընթացները միայն խորհրդարանի ներսում են: Դրանք նաեւ դրսում են, մանաւանդ որ ներկայ իշխանութիւնը պրակտիկայում (գործնականօրէն-Խմբ.) ցոյց է տուել, որ թէեւ կարող է ընտրութիւնների արդիւնքում ձեւաւորուած լեգիտիմ (օրինական-Խմբ.) խորհրդարան լինել, բայց կարող է նաեւ վարչապետը ճնշմամբ հրաժարական տայ: Ես չեմ ուզում կանխատեսելու կամ ակնկալել, որ նման իրավիճակ կ՛առաջանայ, ի վերջոյ մեր նպատակն այն է, որ իշխանութիւնը նոյնպէս յաջողի եւ երկրում իրականացուեն այն փոփոխութիւնները, որոնց մասին մշտապէս խօսուել է: Անցած մէկ տարուայ ընթացքում եղել են թէ՛ թերութիւններ, թէ ինչու չէ՝ ձեռքբերումներ: Սխալների մասին խօսելիս մենք արձնագրել ենք, որ դրանք նախ եւ առաջ այն անորոշութիւններն են, որի մէջ գտնւում ենք մենք: Եւ մենք խուսափողական ենք գնահատում իշխանութեան վարքագիծը արտաքին ճակատում, յատկապէս Արցախի հիմնախնդրի կարգաւորման մասով: Ներքին կեանքում բաւական լուրջ խնդիր է անհանդուրժողականութիւնը եւ ազգային արժէքների նկատմամբ մի շարք ոտնձգութիւնները, որոնք իշխանութեան կողմից ժամանակին չեն կանխւում կամ այդ ուղղութեամբ յստակ մօտեցումներ չկան, օրինակ՝ եկեղեցու նկատմամբ արուող ոտնձգութիւնները: Սա համարում ենք մեր ազգային միասնականութեան համար սպառնալիքի ձեւաւորում: Ցանկացած ազգ յաջողութեան է հասնում, երբ միասնականութիւնն է գերիշխում այդ ազգի մէջ: Մի բացասական բան էլ, որ ուզում եմ արձանագրել, դա մեր իշխանութեան կադրային քաղաքականութեան ոչ բարուոք վիճակն է: Սկսած ԱԺից, աւարտած գործադիրով՝ մենք տեսնում ենք ոչ պրոֆեսիոնալ (արհեստավարժ-Խմբ.) մօտեցումների մի հսկայական ներկայացուածութիւն: Երիտասարդութիւնը մարդու արժանիքն է, բայց մենք տեսնում ենք, որ երիտասարդութիւնը յաճախ պետական կառավարման համակարգում դարձել է վնասարարութեան խորհրդանիշ: Սա պէտք է բացառել:
ՀԱՅԱՐՓԻ ԲԱՂԴԱՍԱՐԵԱՆ.- Այս մէկ տարուայ ընթացքում առաջընթաց չէ՞ք նկատել:
ԱՐԾՈՒԻԿ ՄԻՆԱՍԵԱՆ.- Անշուշտ դրական դինամիկա (յառաջընթաց-Խմբ.) կայ, բայց դա վերաբերում է հնարաւոր զարգացումներում մարդու կաշկանդուածութեան վերացմանը, բայց սա միայն առաջին մակարդակում է: Երբ գալիս ես կոնկրետ օրինակների, մենք տեսնում ենք, որ կան դէպքեր, երբ բիզնեսի (գործառնութիւն-Խմբ.) նախաձեռնութիւն իրականացնողը կարող է վերցնել մէկ այլ դէպք եւ ասել, որ ցանկացած պահի կարող է ԱԱԾն մեր դուռն էլ թակի: Սա տնտեսական զարգացման տեսանկիւնից ճիշդ չէ: Հասարակութեան մօտ անշուշտ կան դրական սպասումներ, եւ շատ կարեւոր է այս էներգիան (կորովը-Խմբ.) ճիշդ ուղղուածութեան վրայ տեղափոխել: Մենք հիմա տեսնում ենք տեղական արտադրութեան նկատմամբ ոչ միայն ոչ պրոֆեսիոնալ վերաբերմունք, այլ նաեւ անհասկանալի անձնաւորուած վերաբերմունք: Սա բացասական է: Ծայրայեղ ազատականութիւնը, որ բնորոշ է մեր իշխանութեան բազմաթիւ մարդկանց, այս մօտեցման հետապնդումը ջարդում է նաեւ միւս նախաձեռնութիւններին, որոնք կարող են ներկայացնել դրական զարգացումներ: Ասածս այն է, որ իշխանութիւնը բիւրեղանալու խնդիր ունի:
ՀԱՅԱՐՓԻ ԲԱՂԴԱՍԱՐԵԱՆ.- Բայց նաեւ ժամանակ ունի, չէ՞:
ԱՐԾՈՒԻԿ ՄԻՆԱՍԵԱՆ.- Այո, բայց ժամանակն անսահման չէ: Շատ կարեւոր է, որ սխալի գիտակցում լինի, եւ դրա ուղղումը լինի:
ՀԱՅԱՐՓԻ ԲԱՂԴԱՍԱՐԵԱՆ.- Պարոն Մինասեան, ՀՅԴն յայտարարել է, որ հանդէս է գալու ընդդիմադիր դիրքերից եւ լուսացոյցի ներքոյ է առնելու կառավարութեան գործունէութիւնը: Գիտենք, որ հանդիպում էք ունեցել արդէն ԱԺ «Լուսաւոր Հայաստան» խմբակցութեան հետ: Ին՞չ հարցեր էք քննարկել, եւ հետաքրքիր է՝ համագործակցելու էք նաեւ խորհրդարանակա՞ն ուժերի հետ:
ԱՐԾՈՒԻԿ ՄԻՆԱՍԵԱՆ.- Մենք յայտարարել ենք, որ այսօր չկայ ձեւաւորուած առանցք՝ ազգային, սոցիալիստական (ընկերվարական-Խմբ.), ժողովրդավարական արժեհամակարգով: Եւ բոլոր քաղաքական ուժերը, որոնք կրում են այս արժէքները, մենք պատրաստ ենք համագործակցել: Այո, հանդիպել ենք, մեր քննարկումները հիմնականում այն հարցի շուրջ են, որ օրինականութեան սկզբունքը պէտք է հիմնարար լինի բոլորի գործողութիւններում: Պատահական չէ, որ կառավարութեան կ՛առուցուածի վերաբերեալ օրէնքի նախագծի մասով մենք ներկայացրինք առաջարկներ: Բոլորին ներկայացրինք, նաեւ «Իմ քայլը» դաշինքին, բայց նրանց կողմից զրօ արձագանք եղաւ՝ անհասկանալիօրէն: Ընդ որում, խմբակցութեան ղեկավարի՝ տիկ. Մակունցի հետ, որի հետ նաեւ նախարար ենք աշխատել, ոչ մի կերպ կապ հաստատել չկարողացանք: Այդ արձագանք չտալը, դիտողութիւնները չընդունելը ենթադրում է, որ իշխանութիւնը որդեգրել է անտարբերութեան քաղաքականութիւնը, որը ընդունելի չէ: Իսկ ԼՀԿն ոչ միայն արձագանքեց, այլ նաեւ մեր առաջարկները էական տեղ գրաւեցին իրենց մշակած տարբերակում: Մենք բազմաթիւ հարցեր ենք հնչեցրել՝ ի՞նչ սկզբունքների վրայ է այդ կառուցուածքը կազմւում, չէ՞ որ մենք ունենք Սահմանադրութիւն, որտեղ յստակ նորմեր (կանոններ-Խմբ.) կան, թէ գործադիրն ինչ պէտք է անի, որ մասով է պարտաւոր գործողութիւն ձեռնարկել, մենք ունենք մարտահրաւէրներ, որոնց լուծման ուղին արտացոլուած է նաեւ իշխող ուժի նախընտրական ծրագրում, եւ հետեւաբար այդ կառավարութիւնը պէտք է սպասարկի նշածներիս իրականցմանը: Եւ եթէ այս հարցերի պատասխանը չկայ, նշանակում է՝ իրենք չեն պատկերացնում այդ համակարգը: Ին՞չ է նշանակում բարձր տեխնոլոգիաների (գիտարուեստներու-Խմբ.) արդիւնաբերութիւն, երբ ունենք էկոնոմիկայի (տնտեսութեան-Խմբ.) նախարարութիւն: Եթէ ճիւղային ենք նայում, էդ դէպքում պէտք է մեր տնտեսութեան բոլոր մրցունակ ուղղութիւնները վերցնենք, եւ դրանց մասով ստեղծենք գերատեսչութիւններ: Կամ ինչ է նշանակում, երբ խօսում ենք աշխարհում եւ տարածաշրջանում մեր մրցունակութիւնը հանդիսացող մշակոյթի մասին ու վերցնում ենք այդ նախարարութիւնը որպէս առանձին գերատեսչութիւն: Այս հարցերի պատասխանները չեն հնչել:
ՀԱՅԱՐՓԻ ԲԱՂԴԱՍԱՐԵԱՆ.- Իսկ արտախորհրդարանական ո՞ր ուժերի հետ էք համագործակցում:
ԱՐԾՈՒԻԿ ՄԻՆԱՍԵԱՆ.- Այս պահին քաղաքական որեւէ ուժ չկայ, որի հետ ունենք կոնկրետ համագործակցութիւն: Մեր պլատֆորմը (բեմը-Խմբ.) ստեղծում ենք եւ բանաձեւումներին համապատասխան, արժէքային մօտեցումները դնելով՝ բաց կը լինենք, եւ բոլորդ ինֆորմացիայ (տեղեկութիւն-Խմբ.) կ՛ունենաք, թէ ում հետ ենք համագործակցում եւ ինչ հարցեր ենք քննարկում: Առաջիկայում աննախադէպ բան ենք անելու, գերագոյն ժողովի մօտեցումները հրապարկուելու են եւ հրաւիրելու ենք քննարկումների: Ի վերջոյ հանրութիւնը, իւրաքանչիւրը պէտք է հնարաւորւթիւն ունենայ թափանցիկ պայմաններում մասնակցել այնպիսի քաղաքական ուժի ծրագրերի մշակմանը, մօտեցմանը, խնդիրների լուծման պատկերացումների ձեւաւորմանը, ինչպիսին Դաշնակցութիւնն է:
comments
