ՍՏԵՓԱՆԱԿԵՐՏ - Կիրակի, 7 Յունուարին, Արցախի հիւսիս-արեւելեան սահմանի հայկական դիրքերուն վրայ հակառակորդի կրակոցներէն զոհուած է Պաշտպանութեան բանակի (ՊԲ) զինծառայող, 1998ի ծնունդ Վաչէ Նուէրի Չիլինգարեան: Աւելի ուշ Հայաստանի զինուած ուժերու գլխաւոր շտապի պետ, զօրավար-գնդապետ Մովսէս Յակոբեան յայտնեց, որ 19ամեայ զինծառայողը զոհուած է հակառակորդ դիպուկահարի կրակոցէն: Ըստ անոր՝ կան նաեւ երկու վիրաւորներ, որոնք թեթեւ մարմնական վնասուածքներ ստացած են. անոնց վիճակը բաւարար է:
Նահատակ զինուոր Վաչէ Չիլինգարեան Գեղարքունիքի մարզի Շողակաթ գիւղէն էր: Ան ընտանիքի միակ որդին էր:
Շողակաթի գիւղապետ Սուլիկօ Շուշանեան յայտնեց, որ 19ամեայ Վաչէն բանակին կը զինծառայէր մէկ տարիէ ի վեր:
«Յունուարի 23ին ծառայութեան 1 տարին կը լրանար: Ընտանիքի միակ որդին էր, իրենից փոքր երկու քոյր ունի», ըսաւ Շուշանեան:
Նախագահ Բակo Սահակեան 8 Յունուարին ստորագրեց հրամանագիր մը, որուն համաձայն՝ Արցախի Հանրապետութեան պետական սահմանը պաշտպանելու ատեն ցուցաբերած արիութեան համար Արցախի Հանրապետութեան պաշտպանութեան բանակի N զօրամասի զինծառայող Վաչէ Չիլինգարեան յետմահու պարգեւատրուած է «Մարտական ծառայութիւն» մետալով:
Պաշտօնական Ստեփանակերտը ահաբեկչական որակած է Ատրպէյճանի գործողութիւնները: «Արմէնփրէս»ի հետ զրոյցի մը ընթացքին, Արցախի նախագահի մամլոյ քարտուղար Դաւիթ Բաբայեան անդրադարձաւ հակառակորդի կրակոցէն հայ զինուորի մահուան:
«Յանձին Ատրպէյճանի՝ գործ ունինք ահաբեկչական պետութեան մը հետ: Մենք գործ ունինք ստոր հակառակորդի մը հետ: Ամանորեայ օրերուն զինադադարի խախտումը, որ որեւէ ձեւով չ՛ազդեր ռազմաքաղաքական հաւասարակշռութեան վրայ, իրավիճակը չի փոխեր յօգուտ Ատրպէյճանի: Ասիկա պարզապէս ստորութիւն է, ահաբեկչութիւն, անմարդկային վերաբերմունք: Ահա այսպիսի աննորմալ հակառակորդի հետ գործ ունինք», ըսաւ ան:
Դաւիթ Բաբայեան յիշեցուց, որ պաշտօնական Ստեփանակերտը, իբրեւ կայունութեան, խաղաղութեան միջոց, տակաւին տասը տարի առաջ առաջարկած էր յատկապէս միջազգային, ազգային եւ կրօնական տօնական օրերուն զինադադարը չխախտել:
«Տօնական օրերուն նման քայլի երթալը ստորութիւն է, որեւէ բանականութեան մէջ չի տեղաւորուիր: Մեզի համար ասիկա անդառնալի կորուստ է, զոհուած զինուորի յիշատակը միշտ վառ պիտի մնայ բոլորի սիրտերուն մէջ», աւելցուց Դաւիթ Բաբայեան:
