By Asbarez | Friday, 01 October 2021
ԵՐԵՒԱՆ, «Արմէնփրէս», «Ազատութիւն».- Չորեքշաբթի օր, Սոչիի մէջ տեղի ունեցաւ Վլատիմիր Փութինի եւ Ռեչեփ Թայիփ Էրտողանի միջեւ հանդիպումը, որուն ընթացքին անոնք կարծիքներ փոխանակեցին երկկողմանի յարաբերութիւններու եւ տարածաշրջանին ու միջազգային ասպարէզին մէջ համագործակցութեան վերաբերեալ:
Ռուսիոյ նախագահը պնդեց, որ Արցախի մէջ Թուրքիոյ ազդեցութիւնը կը նպաստէ կողմերուն հաշտեցման:
«Ղարաբաղի մէջ զինադադարի վերահսկման կեդրոնը աշխուժ գործունէութիւն կը ծաւալէ: Այդ համագործակցութիւնը տարածաշրջանին մէջ կայունութեան եւ հաշտեցման ուղղուած հետագայ քայլերու շուրջ կողմերու դիրքորոշումներու համաձայնեցման լուրջ երաշխիք է», ըսաւ Փութին:
Ան նաեւ ընդգծեց, որ Ռուսիա եւ Թուրքիա յաջող համագործակցութիւն կը ծաւալեն նաեւ միջազգային մակարդակի վրայ, ներառեալ՝ Լիպիոյ եւ Սուրիոյ մէջ:
Փութին աւելցուց, որ երկու երկիրներուն միջեւ համագործակցութիւնը կայունութեան երաշխիք է: «Բանակցութիւնները երբեմն բարդ են, սակայն կ՛աւարտին դրական արդիւնքով: Մեր նախարարութիւնները սորված են գտնել փոխադարձ զիջումներ, որոնք շահաւէտ են երկու երկիրներուն համար», ըսաւ ան:
Իր կարգին, Էրտողան Փութինին շնորհակալութիւն յայտնեց յատկապէս զբօսաշրջութեան ոլորտին մէջ համագործակցութեան համար՝ ընդգծելով, որ մեծ թիւով ռուս զբօսաշրջիկներ սկսած են իր երկիրը այցելել:
Էրտողան նաեւ ընդգծեց ռազմապաշտպանական ոլորտին մէջ կատարուող միացեալ քայլերը՝ պնդելով, որ տարածաշրջանին մէջ կայունութիւնը անմիջականօրէն պայմանաւորուած է ռուս-թրքական յարաբերութիւններով:
Ան նշեց, որ Սուրիոյ մէջ Ռուսիոյ եւ Թուրքիոյ միացեալ քայլերը մեծ կարեւորութիւն ունին, եւ այս տարածաշրջանին մէջ խաղաղութիւնը կախեալ է երկու երկիրներու յարաբերութիւններէն:
Էրտողանի եւ Փութինի դռնփակ հանդիպումը տեւեց 2 ժամ 45 վայրկեան:
«Մենք Սոչիէն կը վերադառնանք գործընկերոջս՝ Փութինի հետ արդիւնաւէտ հանդիպումէն ետք», գրած է Էրտողան, իսկ լրագրողներու հետ զրոյցին ընթացքին ան դարձեալ անդրադարձաւ «Զանգեզուրի միջանցք»ին՝ կարեւոր համարելով անոր կարեւորութիւնը ամբողջ տարածաշրջանին համար:
«Այդ հատուածին մէջ գործարկուելիք ցամաքային եւ երկաթուղային ճամբաները տարածաշրջանի բոլոր երկիրներուն համար առեւտրական-տնտեսական հնարաւորութիւններ պիտի բերեն: Ատրպէյճան այս միջանցքին համար լայնածաւալ աշխատանքներ կը տանի: Անշուշտ, Հայաստան եւս պէտք է իր պարտաւորութիւնները կատարէ», ըստ TRT Haber-ի՝ ըսաւ Թուրքիոյ նախագահը:
comments
ԵԽԽՎի Համազեկուցողները Կոչ Ըրին Պաքուին՝ Հայաստանէն Դուրս Բերելու Զօրքերը Եւ Ազատ Արձակելու Գերիները
Խրիմի Կամուրջի Պայթումին Գործով Ձերբակալուած Են 5 Մեղադրեալներ, Որոնցմէ Երեքը Հայ Են
Իրան Դարձեալ Յիշեցուց Ալիեւին, Թէ Պատմական Սահմաններու Փոփոխութիւնը Անընդունելի Է
Ալիեւ Հայաստանը Կը Զգուշացնէ Սադրանքներու Դիմելէ
Պրիւքսէլ Ուշադիր Կը Հետեւի Հայ-Ատրպէյճանական Սահմանագօտիի Կացութեան
Ատրպէյճան Կը Ծրագրէ Բերձորի Եկեղեցին Մզկիթի Վերածել
Անգարա Դատապարտեց ՄԱԿի Ընդհանուր Ժողովի Նախագահին Ծիծեռնակաբերդ Այցելութիւնը
Սուրիա Պիտի Դիմադրէ Իր Հողերուն Վրայ Որեւէ Թրքական Գործողութեան. Ասատ