«ԱՍՊԱՐԷԶ».- Հայաստանեան մամուլին մէջ վերջերս հրապարակուած են լուրեր, ըստ որոնց ՀՅԴէն ներս «սկսուել են խմորումներ, մասնաւորապէս ՀՅԴ լիբանանեան ու ամերիկեան կառոյցները պահանջում են արտահերթ ժողով անցկացնել, որպէսզի քննարկուի կուսակցութեան վերնախաւում տիրող իրավիճակը, այդ թւում՝ ՀՅԴ Գերագոյն մարմնի ու Բիւրոյի նոր ղեկավարութեան ընտրութեան հարցը»:

Այս թեմայով «Ժողովուրդ»ը զրոյց ունեցած է ՀՅԴ Բիւրոյի անդամ Վահան Յովհաննիսեանի հետ: Ստորեւ սոյն հարցազրոյցը.

«ԺՈՂՈՎՈՒՐԴ».- Ըստ շրջանառուող լուրերի՝ ՀՅԴում որոշակի դժգոհութիւններ կան, ու ցանկանում են արտահերթ ժողով անցկացնել՝ կուսակցութեան ղեկավար կազմում որոշակի փոփոխութիւններ կատարելու նպատակով: Ինչպէ՞ս էք մեկնաբանում այդ լուրերը:
ՎԱՀԱՆ ՅՈՎՀԱՆՆԻՍԵԱՆ.- Ցանկացած կուսակցութեան ներսում պարբերաբար արւում են փոփոխութիւններ, շտկումներ կուսակցութեան կուրսի (ընթացքի-Խմբ.), ադմինիստրատիւ (վար-չական-Խմբ.) կազմի մէջ եւ այլն, եւ այլն: Դա նորմալ երեւոյթ է: Թէ ինչու է դա հիստերիա (նեարդայնացաում-Խմբ.) առաջացնում, ա՛յ դա ես չեմ հասկանում:

«ԺՈՂՈՎՈՒՐԴ».- Եւ ե՞րբ է կուսակցութիւնը պատրաստւում անել այդ փոփոխութիւնները:
ՎԱՀԱՆ ՅՈՎՀԱՆՆԻՍԵԱՆ.- Այդ հարցով արդէն դիմէ՛ք ՀՅԴ Գերագոյն մարմնին, որովհետեւ  Բիւրօն իր ժողովի ժամկէտը կ՛որոշի այս ամռանը, քանի որ մենք դեռ քննարկումներ ունենք: Իսկ ինչ վերաբերում է հայաստանեան Գերագոյն ժողովին, այդ հարցով դիմէ՛ք նրանց:

«ԺՈՂՈՎՈՒՐԴ».- Այս փոփոխութիւնների համատեքստում մատնանշւում է հենց Հրանտ Մարգարեանի անունը. ըստ շրջանառուող լուրերի՝ նրանից դժգոհութիւններ կան իշխանութիւնների հետ ունեցած կապերի պատճառով, ուստի եւ ցանկանում են փոխել նրան:

ՎԱՀԱՆ ՅՈՎՀԱՆՆԻՍԵԱՆ.- Նախ՝ յիմարութիւն է փոփոխութիւնը կապել անհատների հետ: ՀՅԴն, բացի նրանից, որ գաղափարական, այլեւ կարգապահ կուսակցութիւն է: Մեր յարաբերութիւնները ե՛ւ ընդդիմութեան, ե՛ւ իշխանութեան, ե՛ւ արտաքին ուժերի հետ պայմանաւորուած են Ընդհանուր ժողովի, իսկ Հայաստանում՝ Գերագոյն ժողովի որոշումներով: Ոչ մէկն այդ որոշումներից դուրս չի գործում՝ ո՛չ  Հրանտ Մարգարեանը, ո՛չ Արմէն Ռուստամեանը, ո՛չ ես: Դրա համար էլ հարցը դնել այդ ձեւով, որ Դաշնակցութեան քաղաքականութիւնը կապուած է այս կամ այն անհատի քմահաճոյքի կամ իշխանութիւնների հետ ունեցած յարաբերութիւնների հետ, սխալ է: Եւ յետոյ, ցանկացած նորմալ երկրում ցանկացած կուսակցութիւն՝ արմատական ընդդիմութիւնն անգամ, պէտք է իշխանութեան հետ կարեւորագոյն, ազգային անվտանգութեան նշանակութիւն ունեցող հարցերի շուրջ որոշակի յարաբերութիւններ ունենայ:

«ԺՈՂՈՎՈՒՐԴ».- Իսկ միթէ՞ անձերի, տուեալ դէպքում Հրանտ Մարգարեանի յարաբերութիւններն իշխանութիւնների հետ չէին կարող դեր խաղալ ՀՅԴ գործելակերպի հարցում:

ՎԱՀԱՆ ՅՈՎՀԱՆՆԻՍԵԱՆ.- Կուսակցութիւնների, առաւել եւս Դաշնակցութեան մէջ, անհատը կարող է իր տեսակէտներն արտայայտել ու աշխատել այն բանի վրայ, որ դրանք ուղղորդող դառնան: Բայց միեւնոյն է, իր անհատական ցանկութիւններով, նախասիրութիւններով նա չի կարող ընդհանուր որոշումների շրջանակից դուրս գալ: Այդ յարաբերութիւնները լաւագոյն դէպքում կարող են տալ տակտիկական ճկունութիւն, բայց ոչ մի անհատ չի կարող կատարել ստրատեգիական (ռազմավարական-Խմբ.) փոփոխութիւն: Այդ փոփոխութիւնը կարող է կատարել միայն ՀՅԴ Ընդհանուր ժողովը, Հայաստանում՝ Գերագոյն ժողովը: Իսկ ինչ վերաբերում է տակտիկական ճկունութեանը, ապա այստեղ խնդիրը կոնկրետ անհատի՝ քաղաքականութիւն վարելու արուեստի մէջ է: Այստեղ իւրաքանչիւրն ունի քաղաքականութիւն վարելու իր ոճը, եւ եթէ ոճն այդքան խնդրոյ առարկայ է, ապա հասարակութիւնը, ինչպէս միշտ, ընկած է կեղծ օրակարգի հետեւից:

«ԺՈՂՈՎՈՒՐԴ».- Պարզապէս ասում են, որ Հ. Մարգարեանը ՀՅԴում համարւում է նախագահականի մարդը:

ՎԱՀԱՆ ՅՈՎՀԱՆՆԻՍԵԱՆ.- Ինքը նախագահականի մարդը չէ, եւ ընդհանրապէս, ՀՅԴում չկայ ո՛չ նախագահականի մարդ, ո՛չ խորհրդարանականի մարդ, ո՛չ կառավարութեան մարդ: Մենք միայն ու միայն Դաշնակցութեան մարդիկ ենք, իսկ ՀՅԴն ծառայում է Հայաստանին: Հայաստանը շատ աւելի լայն հասկացողութիւն է, քան Հայաստանի իշխանութիւնները:

«ԺՈՂՈՎՈՒՐԴ».- Իսկ իշխանութիւնների հետ որոշակի յարաբերութիւն պահպանելը, հարցեր քննարկելը որքանո՞վ է արդիւնաւէտ, այն դէպքում, երբ իշխանութիւնն ամենատարրական հարցերում անգամ չի ցանկանում լսել ընդդիմութեան կարծիքը, որովհետեւ, ինչպէս կ՛ասէր Գալուստ Գրիգորիչը, իրենք ամենախելօքն են:

ՎԱՀԱՆ ՅՈՎՀԱՆՆԻՍԵԱՆ.- Կան հարցեր, որոնցում, իհարկէ, արդիւնաւէտ չէ: Բայց կան հարցեր, որոնցում ոչ միայն արդիւնաւէտ է, այլեւ, անկախ արդիւնաւէտութիւնից, անհրաժեշտ: Դու առնուազն պէտք է նախազգուշացնես եկող հարուածի մասին, դու առնուազն պէտք է իշխանութեանը ցոյց տաս, թէ որտեղ նրա սխալի հետեւանքը կարող է դառնալ ճակատագրական: Դա քո պարտքն է, եթէ դու Հայաստանի Հանրապետութեան քաղաքացի ես, առաւել եւս՝ պատասխանատու քաղաքական կուսակցութեան անդամ: