- Նշան ՊասմաճեանՍեպտեմբեր 14էն 2 Հոկտեմբեր 2013 , 10րդ դասարանի աշակերտութեան ուխտագնացութիւնը դէպի Հայաստան եւ Արցախ անգամ մը եւս եկաւ փաստելու թէ Համազգայինն ու Ճեմարանը իրենց գործնական առաքելութեան մէջ են :
Տարիներէ ի վեր այս գեղեցիկ սովորութիւնը անընդմէջ կը կրկնուի : Ուսուցչուհիներ՝ Սալի Պանտի եւ Վիգի Վարդանեանցի ընկերակցութեամբ 21 ուխտաւորները Տուպայի վրայով ժամանեցին Երեւան: Խումբը կը ղեկավարէր Տնօրէն Նշան Պասմաճեան: Կ'ընկերանային 7 ծնողներ:
Շրջապտոյտը իր յետին մանրամասնութիւններով եւ փրոֆէսիոնալ ձեւով կազմակերպուած էր Թրավըլ Քաֆէի , Համազգայինի Երեւանի Գրասենեակի , Ճեմարանի Տնօրէնութեան եւ պատասխանատու երկու ուսուցչուհիներու համագործակցութեամբ : Խումբը այցելեց պատմական զանազան վայրեր ինչպէս Գառնիի Տաճար, Գեղարդի Վանք, Ծիծեռնակաբերդի Ապրիլեան Եղեռնի Յուշակոթող եւ թանգարան , Մատենադարան, Սեւան , Դիլիճան, Հաղարծնի վանք , Կիւմրի, Էջմիածին, Ամբերդ,Օշական, Սաղմոսավանք, Խոր Վիրապ, Նորավանք, Սարդարապատ , Տաթեւայ Վանք եւ Ճօպանուղի . իսկ Արցախի մէջ՝ Ստեփանակերտ , Գանձասար, Շուշի, Ասկերան , Տիգրանակերտ՝ անցնելով Աղտամ աւերակուած քաղաքի փէշերէն :
Ասոնց առընթեր , Կիրակի 22 Սեպտեմբերին խումբը այցելեց Էջմիածինի Մայրավանք ուր ներկայ գտնուեցաւ Ս. Պատարագին , ստացաւ հաղորդութիւն Պատարագիչ Արքեպիսկոպոսէն եւ վայելեց զոյգ կաթողիկոսութեանց (Ամենայն Հայոց եւ Կիլիկիոյ) Եպիսկոպոսական միացեալ շքերթը ու ստացաւ Վեհափառ Հօր օրհնութիւնը:
Խումբը նաեւ մասնակցեցաւ Սեպտեմբերի 21ի Անկախութեան տօնակատարութեանց եւ ըմբոշխնեց տիրող տօնական մթնոլորտը : Չորս տարբեր միջոցառումներու ներկայ եղան ուխտագնացները ՝ «Բարեկամութիւն» պարի ելոյթին, Գայանէ Պալէին , Կառավարական Համերգին եւ հայ Էսթրատային երգիչներու համոյթին :
Խումբը այցելեց Եռաբլուր եւ ի մեծ զարմանք պատասխանատուներուն՝ անտեսանելի հաղորդակցութիւն մը ստեղծուեցաւ կարծէք ցուրտ շիրիմներու տակ յաւէտ ննջող հայ ազատամարտիկներու եւ կեանքով լեցուն մեր երիտասարդներուն միջեւ: Աշակերտները այցելեցին 5 տարբեր բնոյթ կրող դպրոցներ ինչպէս Այբ Դպրոց, ուր ծանօթացան իրենց սերնդակիցներուն , ունեցան նաեւ ոտնագնդակի մրցում մը ԱՅԲի ֆութպոլի խումբին դէմ , այցելեցին Հայաստանի Ամերիկեան Համալսարան , ուր անձնակազմէն յատուկ ուսուցիչներ ներկայացուցին համալսարանի ընձեռած բարիքներն ու դիւրութիւնները , անոնք այցելեցին Թումօ Ստեղծարար Տէխնոլոկիաների Կենտրոն , (Tumo Center for Creative Technologies www.tumo.org ) ուր տեղեկացան Հայրենիքի մէջ կատարուող համակարգչային եւ ռոպոթային նուաճումներուն եւ անոնց ուսուցման ՝ 5000է աւելի հայ պատանիներու:
Եղան Ստեփանակերտի ՀՕՄի Սօսէ Մանկապարտէզ , ուր ականատես եղան աւելի քան հարիւր մանուկներու ելոյթին ՝պարեր, երգ եւ արտասանութիւններ : Բացառիկ հետաքրքրութիւն ստեղծեց մեր երեխաներուն մօտ Հայ Միասնութեան Խաչը www.cau.am , ուր անոնք ծանօթացան գորգագործութեան , կաւաշինութեան, հաց թխելու եւ «գաթա» շինելու արուեստներուն : Ազգագրական նկարագիր ներկայացնող այս հաստատութիւնը ամէնօրեայ յաճախականութեամբ կ'ուսուցանէ հայկական աւանդութեանց հետ առնչուած նիւթեր , որոնցմէ մի քանին վերեւ յիշեցինք : Յաջողեցանք մեր ուխտագնացները առաջնորդել ՀԲԸՄի AVC (Armenian Virtual College)ը , www.agbu-avc.org , ուր լայն բացատրութիւն տրուեցաւ թէ ինչպէ՞ս կարելի էր հայերէնը , հայոց պատմութիւնը , մշակոյթն ու ճարտարապետութիւնը ուսուցանել հեռակայ եւ համակարգչային կարգով:
Այցելութիւն տրուեցաւ նաեւ Հայաստանի եւ Լեռնային Ղարաբաղի Հանրապետութեանց Ազգային Ժողովներուն , ուր , առաջինին պարագային դիմաւորուեցան Ազգային Ժողովի ուսանողական գրասենեակի պատասխանատուներուն կողմէ (որոնց միջոցաւ Ազգ. Ժողովին լսելի կը դառնայ երիտասարդութեան խօսքը): ԼՂՀեան Ազգ Ժողովի Նախագահ Պրն Ղուլեան լայն բացատրութիւն տուաւ տնտեսական թէ քաղաքական անցուդարձերուն մասին : Յատկանշական էր խումբի այցը Ստեփանակերտի Զօրամասը , ուր աշակերտները ականատես եղան Արցախը պաշտպանող զինուորներու զինուորական մարզումներուն . անոնք հաղորդ դարձան այն բոլոր դժուարութեանց , որ հայ զինուորը իր մորթին վրայ կը կրէ ի պաշտպանութիւն հայրենիքին:
Խումբը հիւրը եղաւ նաեւ Սփիւռքի Նախարարուհի Տիկին Հրանուշ Յակոբեանին , որ իր անմիջական հայուհիի վերաբերումով, իր տուած բացատրութիւններով ու իրեն յատուկ հիւմուրով կարողացաւ ամրապնդել մեր երիտասարդներուն մօտ հաւատքը հայրենիքին նկատմամբ :
2 Հոկտեմբերին, Երեւան – Տուպայ – Սիտնի վերադարձի ճամբուն վրայ խումբը պէտք էր որ 12 ժամ սպասէր Տուպայի օդակայանին մէջ : Նախապէս կատարուած կարգադրութեան շնորհիւ կարողացանք կազմակերպել 6 ժամուան շրջապտոյտ մը Տուպայի տեսարժան վայրերը :
Անմոռաց պիտի մնայ այս ուխտագնացութիւնը Ճեմարանի 21 ուխտաւորներուն համար :
