ՈՒԱՇԻՆԿԹԸՆ.- Արցախի Ազգային ժողովի մամլոյ ծառայութիւնը կը տեղեկացնէ, թէ աշխատանքային այցով Ուաշինկթըն գտնուող ԼՂՀ Ազգային ժողովի նախագահ Աշոտ Ղուլեան Դեկտեմբեր 2ին Միացեալ Նահանգներու Քոնկրեսին մէջ առանձին հանդիպումներ ունեցած է քոնկրեսականներ Լինտա Սանչեզի, Էտըմ Շիֆի, Տէյվիտ Սիսիլինի եւ Ներկայացուցիչներու տան Արտաքին յարաբերութիւններու յանձնաժողովի նախագահ Էտ Ռոյսի հետ: Լեռնային Ղարաբաղի Հանրապետութեան խորհրդարանի նախագահը շնորհակալութիւն յայտնած է քոնկրեսականներուն՝ Արցախին վերաբերող հարցերը ուշադրութեան կեդրոն պահելնուն համար, ինչպէս նաեւ ներկայացուցած է Արցախի եւ տարածաշրջանի վերջին զարգացումները:

Աշոտ Ղուլեան բարձր գնահատած է Քոնկրեսի անդամներու անաչառ եւ համարձակ դիրքորոշումը՝ Արցախի հակամարտութեան կարգաւորման հարցին մէջ, մասնաւորապէս՝ Յուլիս-Օգոստոս ամիսներուն եւ Նոյեմբեր 12ին ատրպէյճանական կողմին կազմակերպած սադրանքներու արագ արձագանգումը եւ դատապարտումը: Հանդիպումներուն ընթացքին զրուցակիցները անդրադարձած են Միացեալ Նահանգներու եւ Արցախի միջեւ յարաբերութիւններու ընդարձակման հեռանկարներուն, կարեւոր համարած են քաղաքական ու տնտեսական կապերու զարգացումը, ինչպէս նաեւ քննարկած են ընկերային ծրագիրներու իրականացման կարելիութիւնները:

Նոյն օրը, Քոնկրեսի շէնքին մէջ տեղի ունեցած է ԼՂՀ անկախութեան 23րդ տարեդարձին նուիրուած միջոցառումը: Հանդիսաւոր երեկոն կազմակերպած էին Քոնկրեսի Հայկական հարցերու յանձնախումբը, Հայաստանի Հանրապետութեան դեսպանատունը, Միացեալ Նահանգներու մօտ Արցախի Հանրապետութեան մշտական ներկայացուցչութիւնը, Ամերիկայի Հայ Դատի յանձնախումբն ու Ամերիկայի հայկական համագումարը:

Միջոցառման մասնակցած են շարք մը քոնկրեսականներ, որոնք իրենց ելոյթներուն մէջ շնորհաւորած են Արցախի ժողովուրդը եւ միջոցառման մասնակիցները, անդրադարձած են պետականաշինութեան եւ ժողովրդավարականացման ընթացակարգերուն եւ անկախ պետականութեան կառուցման գործին մէջ Արցախի այլ ձեռքբերումներուն: Անոնք շեշտած են նաեւ Արցախի Հանրապետութեան միջազգային ճանաչում ապահովելու անհրաժեշտութիւնը:

Միջոցառման ելոյթ ունեցած է նաեւ Հայաստանի դեսպան Տիգրան Սարգսեան եւ ԼՂՀ մշտական ներկայացուցիչ Ռոբերտ Աւետիսեան: Երեկոյին մասնակցած են Ուաշինկթընի եւ մերձակայ նահանգներու հայ համայնքի ներկայացուցիչներ:

ԼՂՀ անկախութեան հերթական տարեդարձին նուիրուած միջոցառման գլխաւոր բանախօսը եղած է Արցախի Ազգային ժողովի նախագահ Աշոտ Ղուլեան: Իր ելոյթին մէջ, Ղուլեան մասնաւորապէս ընդգծած է, որ Հարաւային Կովկասի մէջ տեւական խաղաղութեան ու կայունութեան հաստատման միակ ճամբան Լեռնային Ղարաբաղի Հանրապետութեան փաստացի անկախութեան միջազգային ճանաչումն է՝ միաժամանակ շեշտելով Արցախի անվտանգութիւնը միջազգային երաշխիքներով ապահովելու կարեւորութիւնը: Խորհրդարանի նախագահը ըսած է, որ Լեռնային Ղարաբաղի Հանրապետութեան ժողովուրդը լաւ գիտէ ազատութեան եւ զայն պաշտպանելու գինը, որովհետեւ արցախցին ստիպուած է պայքարելու ամէն օր:
Հանդիպումներուն եւ միջոցառումներուն ընթացքին, ԼՂՀ ԱԺ նախագահին ուղեկցած է Ռոբերտ Աւետիսեանը եւ ԼՂՀ արտաքին գործոց նախարարութեան միջազգային կառոյցներու եւ մարդասիրական համագործակցութեան վարչութեան պետ Արմինէ Ալեքսանեանը: