Լաւրով Եւ Պայրամով Քննարկեցին Եռակողմ Յայտարարութիւններու Գործադրութիւնը

By Asbarez | Wednesday, 23 March 2022

ՊԱՔՈՒ, «Էյ․Փի․Էյ․»․- Ատրպէյճանի եւ Ռուսիոյ արտաքին գործոց նախարարներ Ճէյհուն Պայրամով եւ Սերկէյ Լաւրով հեռաձայնային զրոյցի մը ընթացքին քննեցին շրջանի ներկայ կացութիւնը եւ Ռուսիոյ, Հայաստանի եւ Ատրպէյճանի ստորագրած եռակողմ յայտարարութիւններու գործադրութեան հարցը:

Նախարարները կարծիքներ փոխանակեցին Ուքրանիոյ շուրջ ստեղծուած կացութեան, ինչպէս նաեւ փոխադարձ հետաքրքրութիւն ներկայացնող այլ հարցերու շուրջ:

Ռուսիոյ արտաքին գործոց նախարարութեան մամլոյ ծառայութիւնը աւելցուց, թէ արտաքին գործոց նախարարները քննեցին Հայաստանի եւ Ատրպէյճանի միջեւ խաղաղութեան համաձայնագիր կնքելու հարցը:

«Քննարկուեցաւ նաեւ «3+3» (Ատրպէյճան-Հայաստան-Վրաստան+Ռուսիա-Իրան-Թուրքիա) շրջանային խորհրդատուական հարթակի հետագայ աշխատանքին վերաբերեալ ժամանակագրութիւնը», կ՛ըսուի Ռուսիոյ արտաքին գործոց նախարարութեան տարածած հաղորդագրութեան մէջ:

Ըստ աղբիւրին, Լաւրով եւ Պայրամով քննարկեցին նաեւ երկկողմ համագործակցութեան լայն շրջանակ մը, ներառեալ` երկու երկիրներու նախագահներուն կողմէ ստորագրուած դաշնակցային համագործակցութեան մասին հռչակագիրի կէտերուն գործադրութիւնը, ինչպէս նաեւ Ապրիլին Ռուսիոյ եւ Ատրպէյճանի միջեւ դիւանագիտական յարաբերութիւններու հաստատման 30ամեակին նուիրուած տօնակատարութեան նախապատրաստութիւնը:

comments

Advertisement