ՍՏԵՓԱՆԱԿԵՐՏ, «Նիւթ».– Նախորդ տարի ընթացք առած Ազգային պետական վիճակախաղ ծրագիրը բաւական յաջող ընթացք ու լաւ արդիւնքներ արձանագրեց: 2013ին վաճառուած է 260,000էն աւելի վիճակախաղի տոմս, եղած է 340է աւելի շահող: Որպէս նուէր տրամադրուող գորգերը արդէն յանձնուած են իրենց տէրերուն, իսկ Քաշաթաղի Իշխանաձոր շրջանին մէջ պիտի կառուցուի 10 առանձնատուն: Այս տուեալները «Նիւթ»ի թղթակիցին տրամադրած է Լեռնային Ղարաբաղի փոխվարչապետ Արթուր Աղաբեկեանը: Փոխվարչապետը լրագրողին ներկայացուցած է Ազգային պետական վիճակախաղի նպատակները, ընթացքն ու ձեռքբերումները:

«Ազգային պետական վիճակախաղը երկու ռազմավարական ծրագրի իրականացման նպատակ ունի: Առաջինն՝ աշխատատեղերի ստեղծումն է: Մենք այս նախաձեռնութեամբ խրախուսում ենք արցախեան այն արտադրութիւնները, որոնք մշակոյթի մաս են կազմում եւ կարող են դառնալ շահումային ֆոնդի իրեր՝ մասնաւորապէս արցախեան գորգերը կամ թթի օղու տակառը: Դրանով խրախուսում ենք ե՛ւ տեղական արտադրութիւնը, ե՛ւ մշակութային արժէքները, ե՛ւ աշխատատեղերի ստեղծումը: Ազգային պետական վիճակախաղի միայն առաջին խաղարկութեամբ գորգագործութեան բնագաւառում 2013 թուականին ստեղծուել է 146 աշխատատեղ: Երկրորդ ռազմավարական ծրագիրը, որ կեանքի ենք կոչում՝ վերաբնակեցման կարեւոր ծրագիրն է: Այդ մեծ, պատասխանատու գործի մէջ վիճակախաղը ստանձնել է գիւղեր ընտրելու, այնտեղ առանձնատներ կառուցելու պատասխանատուութիւն», յայտնած է ան։

Խօսելով այս աշխատանքի նպատակին մասին՝ Աղաբեկեան դիտել տուած է. «Նպատակն է՝ ունենալ համայնքներ, որտեղ կ՛ապրի 1000 եւ աւելի բնակիչ:

Վիճակախաղի օրէնքով վիճակախաղում ձեւաւորուած ռեսուրսի՝ իրացուած տոմսերից եկած գումարի առնուազն 50 տոկոսը պէտք է հանդիսանայ շահումային ֆոնդ, իսկ մնացած 50 տոկոսը՝ այլ ծախսեր: Ազգային պետական վիճակախաղը մեծ ծախսեր չունի, մենք ընդամէնը ունենք 10 տոկոս միջնորդավճար այն առանձին անհատների կամ իրաւաբանական անձերի համար, որոնք իրացնում են մեր տոմսերը, եւ մի քանի տոկոս կազմակերպչական ծախսեր: Մնացած գումարը պետական բիւջէ է մուտքագրւում եւ ուղղւում վերաբնակեցման ծախսերին»:

Ան աւելցուցած է. «2014ի նախաձեռնութիւնն արդէն կեանքի է կոչուել, այսօր հայ մամուլում իրացւում են վիճակախաղի տոմսերը, իսկ խաղարկութիւնը կը կայանայ այս տարուայ Դեկտեմբերի 28ին՝ Արցախի համար խորհրդանշական օր՝ Առաջին գերագոյն խորհրդի ընտրութիւնների օրը: Այն շրջանառութեան է դրուել մէկ այլ խորհրդանշական օր՝ Մայիսի 9ին:

Հաւաքուած գումարով նորից շարունակելու ենք Իշխանաձորում առանձնատների կառուցումը: Մէկ վիճակախաղի տոմսն արժէ 2000 դրամ: Այսինքն՝ փոքր ներդրմամբ կոլեկտիւ պատասխանատուութեան ենք հրաւիրում մեր հայրենակիցներին: Մարդը, ձեռք բերելով վիճակախաղի տոմս, իր մասնակցութիւն է ունենում ե՛ւ վերաբնակեցմանը, ե՛ւ մշակութային արժէքների պահպանմանը», եզրափակած է Արթուր Աղաբեկեանը: