ՍՏԵՓԱՆԱԿԵՐՏ - Փետրուար 20ին, նախագահ Սահակեան հետեւեալ ուղերձը յղած է Արցախեան պահանջատիրական շարժման տարեդարձի՝ վերածնունդի օրուան առիթով.
Սիրելի՛ հայրենակիցներ,
Արցախի Հանրապետութեան իշխանութիւնների եւ անձամբ իմ անունից ի սրտէ շնորհաւորում եմ ձեզ կարեւոր պետական տօնի՝ Արցախի վերածննդի օրուայ առթիւ:
27 տարի առաջ՝ այս օրը, հիմնովին փոխուեց մեր ողջ ժողովրդի պատմութեան ընթացքը եւ սկիզբ դրուեց նոր ժամանակաշրջանի, որը նշանաւորուեց հայոց անկախ պետականութեան վերածննդով: Դարեր շարունակ առանց պետականութեան գոյատեւած եւ այդ իսկ պատճառով բազում փորձութիւնների ենթարկուած հայութիւնն ի վերջոյ կարողացաւ մէկտեղել բոլոր ուժերը եւ ոտքի ելնել՝ պաշտպանելու իր ոտնահարուած իրաւունքներն ու ազատութիւնները: Դա համազգային հզօր պոռթկում էր, որը հասունացել էր հարիւրամեակների ընթացքում եւ որի դէմն առնել այլեւս անհնարին էր:
Մէկ գաղափար, մէկ մարմին, մէկ բռունցք. պատմական 1988ին հայն այդպէս ներկայացաւ աշխարհին: Եւ այդ կուռ ու անսասան միասնութիւնն ու համախմբուածութիւնն էր, որ յաղթանակներ բերեց մեր ժողովրդին՝ դարեր ի վեր երազած յաղթանակներ:
Այսօր մենք բոլորս՝ իւրաքանչիւր հայ, պարտաւոր ենք ամէն ինչ անել մեր հերոս նահատակների սուրբ արեան գնով ձեռք բերուած յաղթանակներն օր օրի ամրապնդելու համար: Նման պատմական հնարաւորութիւն է տրուել մեր սերնդին, եւ մենք պէտք է ըստ ամենայնի օգտագործենք այն ու հասնենք մեր վերջնական նպատակին՝ միասին, ուս-ուսի կառուցելով ուժեղ, զարգացած եւ յաւէրժ ծաղկող Հայրենիք, որը մէկն է բոլոր հայերի համար:
Թանկագի՛ն արցախցիներ,
Մէկ անգամ եւս շնորհաւորում եմ բոլորիս եւ մաղթում խաղաղութիւն, քաջառողջութիւն, մեծագոյն յաջողութիւններ ու նոր յաղթանակներ՝ ի բարօրութիւն հերոսական Արցախի եւ մեր ժողովրդի:
