Հայ-թրքական յայտնի արձանագրութիւններու կնքման դէմ Հայ Յեղափոխական Դաշնակցութեան նախաձեռնութեամբ համախմբուած ուժերը, երէկ, Երեւանի մէջ, խորհրդակցական հանդիպումէ մը ետք, հրապարակած են յայտարարութիւն մը, զոր կը ներկայացնենք ամբողջութեամբ.

<<Մենք՝ հայ-թուրքական յայտնի արձանագրութիւնների կնքման դէմ համախմբուած ուժերս, վերահաստատելով մեր պայքարի վճռականութիւնը, արձանագրում ենք, որ.

Չնայած արձանագրութիւնների պարունակած վտանգներին եւ այդ կապակցութեամբ հայութեան արտայայտած բողոքին, ՀՀ իշխանութիւնները, այդուամենայնիւ, ստորագրեցին յիշեալ փաստաթղթերը: Հարկ է նշել, որ արձանագրութիւններում առկայ տերմինները եւ ձեւակերպումները այլեւս մեկնաբանուելու են ոչ թէ կողմերի կամայական եւ իրարամերժ պարզաբանումների հիման վրայ, այլ միջազգային նորմերին (չափանիշերուն-Խմբ.) եւ պրակտիկային (ընթացիկ կարգի-Խմբ.) համապատասխան, անփառունակ վախճան ունեցաւ բանակցային փուլը եւ սկիզբ առաւ արձանագրութիւնների կնքման ներպետական գործընթացը:

Այսուհետ հակաազգային եւ հակապետական այս փաստաթղթերի վերջնական վաւերացման կանխումը Սահմանադրական դատարանի եւ Ազգային ժողովի իրաւասութիւնների մէջ է:

Անվիճելի իրողութիւն է, որ Թուրքիան այս արձանագրութիւնների միջոցով հասել է իր երկու նախապայմանների իրականացման համար անհրաժեշտ նախադրեալների ամրագրմանը:

Այն է՝ Ցեղասպանութեան փաստը քննարկման առարկայ դարձնելուն եւ այս կապակցութեամբ միջազգային ճանաչման գործընթացի խոչընդոտմանը, ինչպէս նաեւ առկայ հայ-թուրքական ապօրինի սահմանի օրինականացմանը: Միեւնոյն ժամանակ Թուրքիան, հետեւողականօրէն չհրաժարուելով իր յաջորդ նախապայմանից, օրէցօր աւելի մեծ հնարաւորութիւն է ստանում միջամտելու ԼՂՀ հարցի կարգաւորմանը եւ, օգտագործելով այս երկու գործընթացների միաժամանակեայ ակտիւացումն ու դրանց շուտափոյթ հանգուցալուծման հարցում միջազգային կառոյցների եւ միւս երկրների շահագրգռութիւնը, ձգտում է Հայաստանից կորզել Ադրբեջանին ձեռնտու զիջումներ:

Ստեղծուած իրավիճակում դեռեւս ուշ չէ անյապաղ քայլեր ձեռնարկելու միջոցով շտկել իրադարձութիւնների զարգացման այս վտանգաւոր ընթացքը:

Առ այդ, Սահմանադրական դատարանը, նկատի ունենալով առնուազն այն, որ արձանագրութիւնները հակասում են Հայաստանի Անկախութեան Հռչակագրով եւ ՀՀ Սահմանադրութեամբ ամրագրուած հայոց պետականութեան հիմնարար սկզբունքներին եւ համազգային նպատակներին, եւ խախտուել են ՀՀ Սահմանդրութեան 83.5 յօդուածի 9րդ կէտով եւ միջազգային պայմանագրերի մասին ՀՀ օրէնքով սահմանուած պայմանագրերի կնքման կարգը եւ պայմանները, պարտաւոր է այս արձանագրութիւններով Հայաստանի Հանրապետութեան կողմից ստանձնուող պարտաւորութիւնները ճանաչել ՀՀ Սահմանադրութեանը հակասող:

Իսկ ՀՀ նախագահի կողմից յիշեալ արձանագրութիւնները Ազգային ժողով ուղարկելու դէպքում խորհրդարանը այս բովանդակութեամբ չպէտք է վաւերացնի դրանք:

Մենք վճռական ենք միասնաբար պայքարելու ներկայ տեսքով արձանագրութիւնների կեանքի կոչման դէմ եւ այդ նպատակով դիմելու ենք բոլոր անհրաժեշտ քայլերին:

Կոչ ենք անում Հայաստանի Հանրապետութեան բոլոր քաղաքացիներին եւ համայն հայութեանը միանալ հայ-թուրքական արձանագրութիւնների վաւերացման դէմ ուղղուած ստորագրահաւաքին եւ մեր յետագայ գործողութիւններին: