Հայրենիքի փրկութեան շարժումը ժամ առ ժամ թափ կը հաւաքէ ու կը վայելէ հասարակութեան բաւական ընդարձակ շրջանակներու աջակցութիւնը:

Դիմատետրի իր էջին վրայ այս մասին գրառում կատարեց ՀՅԴ Հայաստանի Գերագոյն մարմինի ներկայացուցիչ Իշխան Սաղաթէլեանը: Ստորեւ` ամբողջութիւնը.

«Հայրենիքի փրկութեան շարժումը ժամ առ ժամ թափ է հաւաքում` ստանում հասարակութեան ամենալայն շրջանակների աջակցութիւնը:

Այս փաստից ահաբեկուած վարչակարգը` բռնութեամբ, ստով, շանթաժով եւ երեսպաշտութեամբ փորձում է կասեցնել ժողովրդի համախմբումը:

Վստահաբար ասում եմ` չի ստացուելու, չէք յաջողելու:

Փաստօրէն, Հայրենիքի փրկութեան շարժման առաջարկած լուծումներին միակ հակադարձումը հանրութեանը քաղաքացիական պատերազմով սպառնալն է:

Հոգեվարքի մէջ գտնուող վարչակարգը, նրան աջակցող, քաղաքացիական բախումների հրահրման հարուստ փորձ ունեցողները պէտք է յստակ գիտակցեն.

– Հայրենիքի փրկութեան շարժումն առաջին իսկ օրից բացառել է բռնութիւնը: Յստակ է, որ Նիկոլ Փաշինեանի հրաժարականը եւ անցումային կառավարութեան ձեւաւորումը տեղի է ունենալու միայն իրաւական, սահմանադրական ճանապարհով:

– Նիկոլը չունի հանրային աջակցութիւն: Այս պահին նրա կողքին են մի խումբ` իրենց դիրքորոշումներում տատանուող ՔՊ-ականներ (Քաղաքացիական պայմանագիրի անդամներ), մի քանի սադրիչ արկածախնդիրներ: Հետեւաբար` բախումն բացառուած է. հակամարտող կողմեր պարզապէս չկան:

Կայ խոցուած արժանապատուութեամբ, դաւաճանուած մի ողջ ժողովուրդ, որն օր օրի արթնանում է թմբիրից եւ գիտակցում կորուստը:

Նիկոլ Փաշինեանը հեռանալու է: Մենք զերծ ենք պահելու Հայաստանը նոր ցնցումներից եւ ողջամիտ ժամկէտներում երաշխաւորելու ենք Հայաստանի քաղաքացիների ազատ եւ արդար ընտրութեան իրաւունքը:

Մնում է միայն զարմանալ իմաստունի համարում ունեցող որոշների անտրամաբանական եզրակացութիւնների եւ իշխանութիւններին պաշտպանելու յուսահատ փորձերի վրայ:

Նիկոլ Փաշինեանի օր առաջ հեռացումը կենսական անհրաժեշտութիւն է:

Հեռացնե՛նք Նիկոլին, փրկե՛նք հայրենիքը: Առանց Նիկոլ Հայաստան»: