Գարեգին Բ. Ամենայն Հայոց կաթողիկոսի տնօրինութեամբ Հայկազուն եպս. Նաճարեան, կեդրոնական Եւրոպայի եւ Շուետի հայրապետական պատուիրակի պարտականութիւնները աւարտելով նշանակուած է Աւստրալիոյ եւ Նիւ Զելանտայի հայոց թեմի առաջնորդ: Ան իր նոր պարտականութիւնը պիտի ստանձնէ 1 Յունուար 2013ին:

Հայկազուն եպս. Նաճարեան (աւազանի անունը՝ Վրէժ) ծնած է 1952ին, Հալէպ:

1959-1964 յաճախած է Լիբանանի Վահան Թէքէեան վարժարանը, 1964-1967՝ Յովակիմեան-Մանուկեան վարժարանը:

1967ին ան ընդունուած է Էջմիածինի Գէորգեան Հոգեւոր ճեմարան եւ զայն աւարտած է 1973ին: Այնուհետեւ՝ նոյն տարին, Ս. Էջմիածինի մէջ, ձեռամբ Յուսիկ արք. Սանթուրեանի, ձեռնադրուած է սարկաւագ, իսկ 1975ին Լոնտոնի Ս. Սարգիս եկեղեցւոյ մէջ ստացած է քահանայական ձեռնադրութիւն, ձեռամբ Ներսէս արք. Պոզապալեանի:

1973-1974 աշխատած է Մայր Աթոռ Ս. Էջմիածինէն ներս, իբրեւ կաթողիկոսարանի քարտուղար:

1974-1975 ուսած է Քենթըրպերի Ս. Օգոստինոսի համալսարանին մէջ հետեւելով Հովուական աստուածաբանութեան: 1975-1978 Լոնտոնի Քինկզ քոլեճէն ստացած է պսակաւոր աստուածաբանութեան (BD) աստիճան:

1978-1979 ուսած է Սքոթլանտայի Ս. Անտրէոս դպրոցին մէջ:

1979-1981 եղած է Լոնտոնի Ս. Պետրոս եկեղեցւոյ հոգեւոր հովիւ, իսկ 1981-1986 իբրեւ փոխտեսուչ պաշտօնավարած Գէորգեան Հոգեւոր ճեմարանէն ներս:

1983ին «Վանական շարժման սկզբնաւորութիւնը Հայաստանում» թեմայով պաշտպանած է վարդապետական թեզ եւ Օշականի մէջ ստացած է վարդապետական գաւազան, ձեռամբ Ներսէս արք. Պոզապալեանի:

Նոյեմբեր 6 2011ին է, որ ձեռամբ Գարեգին Բ. Ամենայն Հայոց կաթողիկոսի ստացած է եպիսկոպոսական օծում եւ ձեռնադրութիւն: