6 Փետրուարի երեկոյեան հանգամանօրէն տօնակատարուեցաւ  Աւստրալիոյ եւ Նոր Զելանտայի Հայոց Թեմի Բարեջան Առաջնորդ Գերաշնորհ Տէր Հայկազուն Եպիսկոպոս Նաճարեանի քահանայական ձեռնադրութեան քառասնամեայ յոբելեանը Լը Մոնթաժ հանդիսասրահին մէջ, ներկայութեամբ՝ Աւստրալիոյ Վարչապետ Թոնի Ապոթի ներկայացուցիչ Պրն Ֆիլիփ Րատոքի, Նիւ Սաութ Ուէյլզ նահանգի Վարչապետ Պրն Մայք Պէյրտի ներկայացուցիչ՝ Պարոն Ճէֆ Լիի, քաղաքական անձնաւորութեանց, հայ եւ ոչ հայ կրօնապետներու եւ համայնքապետներու , Սիտնիի եւ Մելպուրնի հայկական հոգեւոր,   քաղաքական, մշակութային, բարեսիրական, մարզական , կրթական եւ հայրենակցական կազմակերպութեանց ներկայացուցիչներուն եւ աւելի քան երեք հարիւր հայորդւոց , որոնց շարքին յատուկ այս առիթով Սիտնի ժամանած հիւրեր Ծայրագոյն Արեւելքէն եւ Ամերիկայի Միացեալ Նահանգներէն: Թեմական Խորհուրդի հրաւէրով ԱՄՆէն Սիտնի ժամանած էր Տիրամայր Մաքրուհի Նաճարեանը : Հանդէսը վարեցին Օրդ Արտա Լէփէճեան եւ Պրն Արթին Էլիասեան:

ՆՍՕՏՏ Գարեգին Բ. Ամենայն Հայոց Կաթողիկոսի ներկայացուցիչ Գերաշնորհ Տէր Վարդան Եպիսկոպոս Նաւասարդեան ընթերցեց Նորին Սրբութեան ուղարկած Հայրապետական Կոնդակը:

Դրուատիքի խօսքերով հանդէս եկան Տիարք Ֆիլիփ Րատոք եւ Ճէֆ Լի, Հայերէն լեզուով՝ Թեմական Խորհուրդի ատենապետ Պրն Սարգիս Տէր Պետրոսեան եւ Անգլերէնով՝ Թեմական Խորհուրդի   փոխ ատենապետ Պրն Ստեփան Գրգեաշարեան: Խօսք առին նաեւ Եկեղեցւոյ Երիտասարդական Միութեան ներկայացուցիչ Օրդ Նաթաշա Ասլանեանը եւ Հոնկ Քոնկի Հայկական գաղութի պատասխանատու Պրն Ճէք Մաքսեանը : Գործադրուեցաւ գեղարուեստական բարձրորակ յայտագիր, որուն մասնակցեցան Իզապէլ Մարգարեան, Վարդան Էլմասեան, Քրիս Նազարեան , Գէորգ Պօղոսեան, Վաչէ Ճամպազեան, Ալէքս Սահակեան , համբաւաւոր  աւստրալացի ջութակահարուհի Քիրսթըն Ուիլիըմզ, Հայաստանէն ժամանած Կոմիտասեան երգերու մեկնաբան Գէորգ Հաճեան եւ միջազգային համբաւի տիրացած օփերայի երգչուհի Նաթալի Արոյեան : Տիար Սարգիս Տէր Պետրոսեան Թեմական Խորհուրդի կողմէ ձեռակերտ յատուկ Պանակէն նուիրեց Սրբազան Հօր իբր խորհրդանիշ Թեմի զաւակներուն սիրոյն եւ յարգանքին:

Խօսք առաւ յոբելեար Սրբազան Հայրը եւ շնորհակալութիւն յայտնելէ ետք բոլոր ներկաներուն անդրադարձաւ իր համեստ ծառայութեան Աստուծոյ եւ եկեղեցւոյ, ի հետեւանք  ազգային քրիստոնէական իր ստացած դաստիարակութեան, առաջին ուսուցիչ  ունենալով իր մայրը: Սրբազան Հայրը շեշտեց այն իրողութեան վրայ, որ ժողովուրդի նեցուկո՛վ միայն իր Առաջնորդի առաքելութիւնը պիտի յաջողի:

Հաւաքը աւարտեցաւ Վարդան Սրբազանի փակման աղօթքով:

Դիւան Ազգային Առաջնորդարանի