ԵՐԵՒԱՆ, «Արմէնփրէս».- Արցախի նախագահ Բակօ Սահակեան յղեց շնորհաւորական ուղերձ մը Նոր Տարուան առիթով՝ հաստատելով, որ բոլորս նոր յոյսերով, բարի ցանկութիւններով եւ ակնկալութիւններով կը դիմաւորենք 2020 թուականը:

«Բնական է, որ մեր ժողովուրդը առաջին հերթին ցանկանում է խաղաղութիւն, ցանկանում է ապրել, արարել, ստեղծագործել, շէնացնել, զարգացնել ու զօրացնել հարազատ երկիրը: Մեզնից իւրաքանչիւրը ցանկանում է երջանիկ ու առողջ տեսնել իր հարազատներին ու բարեկամներին:

«Այս ամէնը իրականութիւն դարձնելու կարեւորագոյն գրաւականը մեր յաղթական պաշտպանութեան բանակն է, որի քաջ զինուորներն ու հրամանատարները ամէն վայրկեան, այդ թւում նաեւ այս պահին կանգնած են դիրքերում ու խրամատներում, ապահովում են մեր պետութեան ու հայրենիքի անվտանգութիւնը եւ անկախութիւնը, նրա սահմանների անառիկութիւնը:

«Այս տօնական օրը ուզում եմ նախ եւ առաջ շնորհաւորել մեր զինուորներին՝ շարքայինից մինչեւ գեներալ, մաղթել նրանց բարի ծառայութիւն, քաջառողջութիւն եւ յաջողութիւններ:

«Ուզում եմ յիշել բոլոր նրանց, ովքեր մարտիրոսուել են հայրենիքի պաշտպանութեան համար, ովքեր այսօր ֆիզիքապէս ներկայ չեն իրենց օճախներում եւ ընտանիքներում: Թող Աստուած լուսաւորի մեր բոլոր նահատակների հոգիները», կ՛ըսէ նախագահը։

Բ. Սահակեան կը նշէ, որ 2019ը, ընդհանուր առմամբ, յաջող տարի էր Արցախի ընկերային-տնտեսական զարգացման տեսանկիւնէն: Գրեթէ բոլոր ոլորտներուն մէջ պահպանուած է վերջին տարիներուն արձանագրուած զարգացման թափը:

«Բնական է՝ կան նաեւ շատ անելիքներ: Գալիք տարում մեր ժողովրդի բարեկեցութեան աստիճանի բարձրացման ուղղութեամբ կ՛իրականացուեն մի շարք կարեւոր ծրագրեր բնակարանաշինութեան, գիւղատնտեսութեան, առողջապահութեան, կրթութեան ու գիտութեան, մշակոյթի, ենթակառուցուածքների եւ այլ ոլորտներում: 2020 թուականը Արցախի համար լինելու է նաեւ քաղաքական գործընթացներով հարուստ տարի, տեղի են ունենալու համապետական նշանակութեան իրադարձութիւններ, մասնաւորապէս՝ նախագահական եւ խորհրդարանական ընտրութիւններ, ընտրուելու են նոր նախագահ եւ Ազգային ժողով:

«Ես աւելի քան վստահ եմ, որ մեր ժողովուրդը, ինչպէս միշտ, կը ցուցաբերի քաղաքացիական բարձր պատասխանատուութիւն, եւ ընտրութիւնները կ՛անցնեն արդար, թափանցիկ, ժողովրդավարական սկզբունքներին համահունչ: Այս ամէնի հետ մէկտեղ պէտք է ապահովուի պետութեան բնականոն ու դինամիկ զարգացումը, նախանշուած ծրագրերի եւ խնդիրների արդիւնաւէտ լուծումը: Համոզուած եմ, որ այդպէս էլ կը լինի:

«Թող 2020 թուականը մեր ժողովրդի եւ հայրենիքի համար լինի յաջողութիւններով լի տարի, եւ իրականանան բոլոր նուիրական իղձերն ու ցանկութիւնները, մեր ընտանիքներում տիրի սէր ու ջերմութիւն», իր ուղերձի աւատին կը յայտնէ Արցախի նախագահը։