Կոչ Աւստրալահայութեան



Աւելի քան տարիէ մը ի վեր քաղաքական ցնցումներու թատերաբեմ դարձած է սփիւռքի հայ իրականութեան մէջ նշանակելի դերակատարութիւն ունեցող Սուրիահայ գաղութը:

Սուրիահայ գաղութը Պարսկաստանի ու Լիբանանի հայկական գաղութներու նման ռազմավարական կարեւոր նշանակութիւն ունի հայութեան ու Հայաստանի համար: Ան եղած է ցեղասպանութենէն ճողոպրած հայորդիներու ազատութեան առաջին կայանը: Ան եղած է հայութեան մշակութային ու կրթական կեանքի ջահակիրը, որուն ազգային մթնոլորտին մէջ կերտուած են բազմահազար մշակութային ու կրթական գործիչներ, որոնք այսօր առաջնորդող դեր կը կատարեն մեր զանազան գաղութներու ազգային կեանքին մէջ: Ան եղած է ու կը շարունակէ ըլլալ սերտ համագործակցութեան հաստատուն կամուրջը թուրքիոյ սահմաններուն մօտ, որ կը կամրջէ միջին Արեւելքի հայկական գաղութները մայր հայրենիքին:

Այս բոլորէն մեկնած Սուրիահայութիւնը չափազանց կարեւոր դերակատարութիւն ունի մեր ազգային նպատակներու իրականացման աշխատանքներուն մէջ եւ որպէս այդպիսին անհրաժեշտ է մեր բոլոր ոյժերով պահել ու պահպանել անոր կենսունակութիւնը, մինչեւ որ անցնին Սուրիոյ գլխին կուտակուող մռայլ ամպերը եւ երկիրը գտնէ իր անդորրութիւնը:

Ահազանգային վիճակի մէջ գտնուող Սուրիահայութեան օժանդակութիւն ապահովելը այսօր դարձած է առաջնահերթ հարց եւ Աւստրալիոյ շրջանի ՀՕՄ-ը այս կոչով շարժման կը դնէ իր ամբողջ կառոյցները ճակատագրական այս օրերուն օգնութեան ձեռք մեկնելով Սուրիահայութեան, որպէսզի անոնք զգան համազգային տարողութեամբ հայութեան միահամուռ կեցուածքը իրենց կողքին:

Մեր նպատակն է Աւստրալիոյ մէջ ստեղծել հանգանակութիւններու միջոցով օժանդակութիւն Սուրիոյ Ազգային վարժարաններուն եւ ՍՕԽ-ի պատսպարանին:

Առ այդ յարգելի՛ հայրենակիցներ, նուիրեցէք ձեր լուման այս բարի նպատակին, որուն համար ՀՕՄ-ի Աւստրալիոյ Շրջանային վարչութիւնը հաստատած է նուէրահաւաքի հետեւեալ կեդրոնները.-

1-Հայ Մշակութային Կեդրոն, 259 Penshurst Street, Willoughby  (Monday, Tuesday & Wednesday night’s 6.30-9.30 pm.)

2- Հայ Մշակութային Բանոյեան Կեդրոն, 685 Cabramatta Rd, Bonnyrigg.  (Monday, Tuesday & Wednesday night’s 6.30-9.30 pm.)

3- «Նայիրի» եւ «Արարատ» Սկաուտական Կեդրոն,     255 Quarry Rd, Santa Rosa Park, North Ryde.   (Monday, Tuesday & Wednesday night’s 6.30-9.30 pm.)

4- Հ.Մ.Ը.Մ. «Անդրանիկ» մասնաճիւղի Սկաուտական սրահ.     Corner of Park Rd and Station Street, Artarmon. (Միայն Ուրբաթ երեկոներ). (Friday nights only)

5- Ryde Multicultural Centre - Րայտ Բազմամշակութային Կեդրոն         Shaftsbury Road, West Ryde. (Day time only).

6- DIRECT DEBIT  Commonwealth Bank     ARS Regional Executive Of Australia INC.    RELIEF  FOR  SYRIAN  ARMENIAN  SCHOOLS FUND  BSB- 062192 -  Account No. 10314290 

Մեր այս միջոցառումը կը միտի Սուրիահայ գաղութը իր ամբողջական կառոյցով  միահամուռ ու կանգուն պահել, որպէս գրաւական մեր համազգային նպատակներուն:

9 Օգոստոս, 2012
Աւստրալիոյ ՀՕՄ-ի Շրջանային վարչութիւն