Համազգայինի Գօլստըն Ճեմարանին մէջ Յիշատակուեցաւ Հայաստանի հանրապետութեան 93-րդ տարեդարձը եւ Մեծ Հայրերու ու Մայրերու Օրը

Ուրբաթ 27 Մայիսի առաւօտեան տարբեր տեսք ստացած էր Համազգայինի Գօլստըն Ճեմարանը. աննախընթաց ոգեւորութիւն մը կը տիրէր մանաւանդ փոքրերուն մօտ, որոնք կը զգային թէ արտասովոր օր մըն էր եւ իրենք պիտի վայելէին մեծ հայրերու ու մայրերու ներկայութիւնը:

Ճշդուած ժամէն առաջ, վայելելու համար իրենց թոռներու աշխատանքն ու ներկայութիւնը, մեծաթիւ մեծ հայրեր ու մայրեր սկսան ժամանել ճեմարան եւ այցելելէ ետք իրենց թոռներուն դասարանները, անոնք սկսան համախմբուիլ Նալպանտեան սրահը, ուր տեղի պիտի ունենար օրուան պատշաճ յայտագիրը:

Կրթական բաժնի պատասխանատու Տիկ. Գ. Պլանտըն բարի գալուստ մաղթելով ներկաներուն բացուած յայտարարեց յայտագիրը: Մինչ ներկաները կը համտեսէին ծնողական յանձնախումբի համեղ ճաշերը, աշակերտները յաջորդաբար սկսան ելոյթ ունենալ: Ճեմարանի հայերէնի ուսուցչակազմի առաջնորդութեամբ, աշակերտները ներկայացուցին աւելի քան մէկ ժամ տեւողութեամբ յայտագիր, բաղկացած երգերէ, ասմունքներէ եւ փոքր թատերական արարներէ:

Զգալի էր մեծ հայրերու ու մայրերու հոգեկան ուրախութիւնը, ներկայացուած իւրաքանչիւր ելոյթի ընթացքին:

Յայտագրի վերջին բաժինով աշակերտները ունեցան հայոց պատմութեան դաս, նուիրուած Մայիս 28-ով կերտուած Հայաստանի անկախութեան:

խանդավառուած օրուան մթնոլորտէն եւ գնահատելու համար իրենց թոռնիկներուն համար ճեմարանի կատարած մարդակերտման ու հայակերտման աշխատանքները, եղան մեծաթիւ նուիրատուութիւններ, որոնց գումարը հասաւ $3200: Իսկապէս զգացական էր տեսնել թէ ինչպէս մեր մեծ հայրերն ու մայրերը խնայելով իրենց օրապահիկէն գումարներ կը նուիրէին ճեմարանին, որովհետեւ վստահ էին որ նուիրեալ գործ կը կատարուէր հոն եւ իրենց թոռները կը մեծնային ազգային մաքուր ու ապահով միջավայրի մէջ:

Աւարտին հայերէն բաժնի պատասխանատու Պրն. Ասատուր Շուկայեանը անդրադարձաւ Մայիս 28-ի խորհուրդին եւ եզրակացուց թէ ճեմարանը միշտ ջանացած է այս օրը կապել մեծ հայրերուն ու մայրերուն հետ, որովհետեւ 1918-ին մեծ հայրերն ու մայրերն էին, որ ընդառաջելով Արամ Մանուկեանի ու Թովմաս Նազարբեկեանի կոչերուն իջան ռազմաճակատները եւ Սարդարապատի, Ղարաքիլիսէի ու Բաշ Ապարանի յաղթանակներով կերտեցին հայաստանի անկախութիւնը:

Ան բեմ հրաւիրեց հայերէն բաժնի ուսուցիչները առ ի գնահատանք իրենց կատարած աշխատանքին համար, որոնք դիմաւորուեցան բոլորին կողմէ խանդավառ ծափահարութիւններով:

Աւարտին ան առողջութիւն մաղթեց բոլորին, յուսալով որ յաջորդ տարի անգամ մը եւս կը հանդիպին իրարու ու կը տօնակատարեն հայութեան յաղթանակի այս մեծ օրը: