By Asbarez | Sunday, 26 September 2010
ՈՒԱՇԻՆԿԹԸՆ.- Երեքշաբթի, Սեպտեմբեր 21ի երեկոյեան, Միացեալ Նահանգներու Ծերակոյտի անդամ Պարպարա Պաքսըր եւ Ռապըրթ Մենենտեզ որոշեցին կասեցնել Ատրպէյճանի մօտ Միացեալ Նահանգներու դեսպանը Մեթիու Պրայզան նշանակելու որոշման վաւերացումի գործընթացը:
Ամերիկայի Հայ Դատի յանձնախումբը ողջունեց այս քայլը, որ կու գար Պրայզայի թեկնածութիւնը վաւերացնող Ծերակոյտի Արտաքին յարաբերութեանց յանձնախումբին որոշումէն քանի մը ժամ ետք: Նշանակումը պէտք է վաւերացուի նաեւ Ծերակոյտի լիագումար նիստին կողմէ, սակայն Պաքսըրի եւ Մենենտեզի սոյն միջամտութեան շնորհիւ՝ այդ քննարկումը տեղի պիտի չունենայ:
Ամերիկայի Հայ Դատի յանձնախումբի վարիչ գործավար Արամ Համբարեան յայտարարեց, թէ Պաքսըրի եւ Մենենտեզի այս որոշումին շնորհիւ կարելի եղած է «լուրջ սխալէ մը փրկել» ոչ միայն ամերիկեան արտաքին քաղաքականութիւնը, այլ նաեւ Կովկասի մէջ խաղաղութիւն հաստատելու ջանքերը:
Համբարեան աւելցուց, թէ Ատրպէյճանի իշխանութեանց հետ սերտ կապեր ունեցող Պրայզա սխալ դիւանագէտն է Ատրպէյճանի մօտ Միացեալ Նահանգներու դեսպանի պաշտօնին համար, եւ շեշտեց, թէ յատկապէս այս օրերուն, երբ Ատրպէյճան աւելի եւս սաստկացուցած է իր յարձակողապաշտ քաղաքականութիւնը, Պրայզայի նշանակումը կրնայ աղէտալի հետեւանքներ ունենալ:
Նախքան Ծերակոյտի Արտաքին յարաբերութեանց յանձնախումբին կողմէ Պրայզայի թեկնածութիւնը վաւերացնելու որոշումը, Պաքսըր եւ Մենենտեզ դէմ արտայայտուեցան Պրայզայի նշանակման:
Յիշեցնենք, թէ Մենենտեզ նման քայլի մը դիմած էր 2006ին՝ կասեցնելով Ռիչըրտ Հոլպրուքը Հայաստանի մօտ Միացեալ Նահանգներու դեսպան նշանակելու գործընթացը:
comments
Կոչ Հայութեան ու Հայրենիքի Իշխանութեան
Australia Live by Armenia Media: Dr Hrayr & Arda Jebedjian
Australia Live by Armenia Media: Victor Karapetyan
Australia Live by Armenia Media: Professor Navoyan
Australia Live By Armenia Media: Reverend Sarkissian
Australia Live By Armenia Media: Zarouhi Manoukian
Australia Live By Armenia Media: Hayk Arsenyan
Australia Live By Armenia Media: Hasmik Movsisyan & Zhanna Nazaryan