Թրքական <<Թուտէյզ Զաման>> օրաթերթը կը հաղորդէ, որ ըստ թուրք ազգայնամոլներու <<Էրկէնէքոն>> ահաբեկչական կազմակերպութեան առնչուող երրորդ ամբաստանութեան թղթածրարին մէջ ներառուած փաստաթուղթին, Պոլսոյ <<Ակօս>> օրաթերթի խմբա-գրապետ Հրանդ Տինքի սպանութիւնը գործն էր ոստիկանութեան գաղտնի սպասարկութեան, հակառակ անոր պաշտօնատարներու հերքումներուն։
Ըստ Թուրքիոյ իշխող Արդարութիւն եւ բարգաւաճում կուսակցութեան անդամ եւ նախկին երեսփոխան Թուրհան Չէօմեզի համակարգիչէն գրաւուած փաստաթուղթին, Եուսուֆ Զիատ կոչուած անձ մը, որ կ՛ըսուի, թէ հիւսիսային Իրաքի մէջ բնակող քիւրտ մըն է, հանգստեան կոչուած զօրավար Վէլի Քիւչիւք, որ <<Էրկէնէքոն>>ի հարցով ձերբակալուած է եւ ոստիկանութեան գաղտնի սպասարկութիւնը կը կանգնին Տինքի սպանութեան ետին։
Փաստաթուղթին մէջ նաեւ կ՛ըսուի, որ Քիւչիւք եւ հանգստեան կոչուած այլ զօրավար մը՝ Հ.Ք., կը կանգին հիւսիսային Իրաքի մէջ շարք մը անլոյծ ոճիրներու եւ ահաբեկչական արարքներու ետին։ Փաստաթուղթին 13րդ էջին վրայ <<այս միաւորները ղեկավարողները>> խորագիրին տակ Չէօմեզի կողքին կը գտնուին հետեւեալ անունները՝ հանգստեան կոչուած զօրավար Հուրշիթ Թոլոն, ազգային ոստիկանութեան յատուկ գործողութիւններու բաժինի նախկին փոխնախագահ Իպրահիմ Շահին, հանգստեան կոչուած զօրավար Շէնէր Էրույղուր, հանգստեան կոչուած գնդապետ Մուզաֆար Թէքին, փաստաբան Քէմալ Քէրինչսըզ, Աշխատաւորական կուսակցութեան նախագահ Տողու Փէրինչէք եւ ուրիշներ։
Ամբաստանագիրին մէջ նշուած է ներկայիս <<Էրկէնէքոն>>ի հարցով ձերբակալուած օգնական դասախօս Էմին Կիւրսէսի եւ զօր. Մուսթաֆա Տէօնմէզի միջեւ զրոյց մը, ուր Տինքի սպանութեան մասին տեղեկութիւններ կը փոխանցուին։
Տէօնմեզի հետ Կիւրսէսի հեռաձայնային զրոյցի արձանագրութեան մէջ, այս վերջինը իր զրուցակիցին կ՛ըսէ, թէ <<Հրանդ Տինքի սպանութիւնը այդ մարդոց լաւ ձեւի զգուշացում մը եղաւ>>։
