By Asbarez | Tuesday, 21 April 2015
ՎԻԵՆՆԱ.- «Հայերն Այսօր».- Աւստրիոյ խորհրդարանը Ապրիլ 21ի առաւօտեան ընդունեց յայտարարութիւն, որ կը դատապարտէ Հայոց ցեղասպանութիւնը եւ Թուրքիոյ կոչ կ՛ընէ առերեսուելու իր անցեալի սեւ էջերուն հետ. այս մասին Սիւիլնեթի յայտնած է ՀՅԴ Եւրոպայի Հայ Դատի յանձնախումբի հաղորդակցութեան պատասխանատու Պետօ Դէմիրճեանը:
Փաստաթուղթին մէջ կը նշուի, որ Աւստրոհունգարիան, Առաջին համաշխարհային պատերազմի տարիներուն ըլլալով Օսմանեան կայսրութեան դաշնակիցը, կը կրէ կատարուածի պատմական պատասխանատուութիւնը: Խորհրդարանական խմբակցութիւններու համատեղ յայտարարութեան մէջ կը յիշատակուին նաեւ Օսմանեան կայսրութեան մէջ զոհուած այլ քրիստոնեաներու ` ասորիներու, արամէացիներու, Պոնտոսի յոյներու ցեղասպանութիւնները:
Փաստաթուղթը կը նշէ, որ Աւստրիա պարտաւոր է կատարուածը ցեղասպանութիւն որակելու եւ դատապարտելու: «Թուրքիոյ իր հերթին կոչ կը կատարուի իր մութ անցեալի ցաւալի էջերը փակելու եւ Օսմանեան կայսրութեան մէջ հայոց ջարդերը ցեղասպանութիւն ճանչնալու, քանի որ ազատութեան, խաղաղութեան եւ մարդու իրաւունքներու մեր անօտարելի արժէքները անմիջականօրէն կապ ունին բռնութեան, տեղահանումներուն եւ զանգուածային սպանութիւններուն զոհ գացածներու յիշատակը յարգելու հետ»,- ըսուած է փաստաթուղթին մէջ:
Նախապէս News.am-ը յայտնած էր, որ Աւստրիոյ ժողովրդական կուսակցութիւնը (ՃVP ) ու Աւստրիոյ սոցիալ-դեմոկրատական կուսակցութիւնը (SPճ) խորհրդարանի լիագումար նիստի ժամանակ Հայոց ցեղասպանութիւնը դատապարտող բանաձեւ պիտի ներկայացնեն: Փաստաթուղթը խորհրդարանի քննարկման դնելու առաջարկով հանդէս եկած են ՃVP խմբակցութեան ղեկավար Ռայնհոլտ Լոպատկան եւ SPճ-ի անդամ Անտրէաս Շիտըրը:
Ապրիլ 22-ին Աւստրիոյ խորհրդարանին մէջ տեղի պիտի ունենայ Հայոց ցեղասպանութեան 100-րդ տարելիցին նուիրուած յուշ-երեկոյ, որ պիտի բացուի մէկ վայրկեան լռութեամբ:
comments
Australia Live by Armenia Media: Victor Karapetyan
Australia Live by Armenia Media: Professor Navoyan
Australia Live By Armenia Media: Reverend Sarkissian
Australia Live By Armenia Media: Zarouhi Manoukian
Australia Live By Armenia Media: Hayk Arsenyan
Australia Live By Armenia Media: Hasmik Movsisyan & Zhanna Nazaryan
Australia Live By Armenia Media: Sarkis Yedelian
Australia Live By Armenia Media: Kaylar Michaelian
Australia Live By Armenia Media: Kevork Vartanian & Harmig Hagopian
Australia Live By Armenia Media: Margaret Chater and Houri Demirdjian