Յ. Շ.

Նոյեմբեր 5ին, Փարիզի մէջ տեղի ունեցաւ Հայ Ոսկեգործներու Ընկերակցութեան (AJA) ճաշը, որ վայելեց հովանաւորութիւնը եւ ներկայութիւնը՝ Սփիւռքի նախարարուհի Հրանոյշ Յակոբեանի եւ Հայաստանի Փարիզի դեսպան Վիգէն Չիտեչեանի:

Ձախէն աջ՝ AJA-ի գանձանպահ՝ Սիմոն Ղանիմեան, փոխ նախագահ՝ Պերճ Աբաջեան, նախագահ՝ Գագիկ Գէորգեան եւ քարտուղար՝ Յովել Շնորհօքեան

Այս երեկոյթը նորութիւն հանդիսացաւ այն իմաստով, որ առաջին անգամ ըլլալով ան բաց էր բոլորին առջեւ՝  այսինքն կրնային  մասնակցիլ ոչ-հայ ոսկեգործներ եւ հայ համայնքէն դուրս՝ ասպարէզին առնչուող անձնաւորութիւններ:

Ձեռնարկը իսկական յաջողութիւն արձանագրեց: Ներկայ էին աւելի քան 200 հոգի: Անոնց մէջ այս առթիւ յատկապէս Հայաստանէն, Ռուսաստանէն, ԱՄՆէն եւ Գանատայէն եկածներ կային:

15ամեայ իր գոյութեան ընթացքին ինչ որ լաւագոյնս յաջողած է Ընկերակցութիւնը՝ իր ցանցերու ծաւալումն է աշխարհի չորս ծայրերը, զանազան միջոցառումներու՝ բանախօսութիւններու, սալոններու, երեկոյթներու շնորհիւ, զորս կը կազմակերպէ ամէն տարի: Այսօր, Հայաստանէն Աւստրալիա, անցնելով ԱՄՆէն, Չինաստանէն, Ռուսաստանէն, Ֆրանսայէն եւ Պելճիքայէն՝ ունի աւելի քան 3000 անդամ:

Մօտ օրէն մասնաճիւղ մը պիտի բանայ Տուպայ: Այս ցանցը ուժ մը կը ներկայացնէ, զոր ընկերակցութիւնը կը դնէ ի սպաս Սփիւռքի հայկական ընկերութիւններու եւ Հայաստանի ոսկեգործութեան ոլորտին:

AJA-ի նոր նախագահն է Գագիկ Գէորգեան, որ ընտրուեցաւ շուրջ վեց ամիս առաջ: Ֆրանսայի մասնաճիւղի նախագահ Յուել Շնորհօքեան ալ ընտրուեցաւ ընկերակցութեան քարտուղար:

Գագիկ Գէորգեան Ռուսաստանի մէջ՝ գոհարեղէններու արտադրութեան թիւ մէկն է: Այս ընտրութեամբ AJA նոր անկիւնադարձ ապրեցաւ, որ իրեն թոյլ պիտի տայ ամրապնդել իր կառոյցը եւ բարգաւաճիլ:

Իր նախաձեռնութեամբ է նաեւ որ լոյս տեսաւ ընկերակցութեան հանդէսին առաջին թիւը: AJA-ի նպատակն է օգնել փոքր արհեստաւորին, որ դեռ միջազգային գործառնութեան մակարդակի չէ հասած. միանալով ընկերակցութեան՝ ան կրնայ որոշ կարելիութիւններէ օգտուիլ եւ իր գործառնութիւնը զարգացնել: Մասնակցելով AJA-ի սալոններուն, ճաշերուն, կրնայ հետաքրքրական հանդիպումներ ունենալ տուեալ արհեստի մարդոց հետ: Գլխաւորաբար այս աշխատանքն է որ ընկերակցութիւնը կ՛ուզէ ծաւալել յառաջիկայ տարիներուն, թէ՛ Հայաստանի եւ թէ՛ Սփիւռքի մէջ:

Ինչ կը վերաբերի Հայաստանի, Հանրապետութեան նախագահին հետ անցեալ Օգոստոսին Ընկերակցութիւնը ստորագրեց համաձայնագիր մը, որ կը նախատեսէ ազատ գօտիի մը ստեղծումը՝ ամբողջութեամբ վերահսկուած AJA-ի կողմէ: Ասիկա հազարաւորներու գործ պիտի ապահովէ, ինչ որ քիչ բան չէ միջազգային տագնապի այս օրերուն:

Ոսկեգործութիւնը այլապէս կարեւոր բնագաւառ կրնայ ըլլալ Հայաստանի համար, մանաւանդ որ ան շատ հանգիստ ձեւով կրնայ շրջանցել թուրքեւազէրի շրջափակումը:

Գալով հայ ոսկեգործութեան իւրայատկութեան, կարելի է ըսել որ ան կը կայանայ սերունդներէ ժառանգուած անզուգական արհեստագործութեան մէջ: Հայերը բնատուր յատկութիւն ունին ոսկեգործութեան արհեստին համար, ինչ որ կը բացատրէ այս բնագաւառէն ներս անոնց համեմատաբար մեծ թիւը:

Այսպէս, մինչ հայերը աշխարհի բնակչութեան շուրջ 0,1 տոկոսը կը կազմեն, ոսկեգործութեան ոլորտին մէջ 6 էն 7 է անոնց տոկոսը: Մինչեւ Ցեղասպանութիւն, Օսմանեան կայսրութեան գրեթէ ամբողջ ոսկեգործութիւնը հայոց ձեռքն էր: Նոյնիսկ այսօր, Պոլսոյ ոսկեգործներուն 60 տոկոսը հայեր են: Գաղթերու ժամանակ հայերը իրենց հետ տարած են արհեստի իրենց գաղտնիքները: Անոնք Միջին Արեւելքի, Աւստրալիոյ, Ռուսաստանի, ԱՄՆի եւ Ֆրանսայի մէջ ոսկեգործութեան առաջնակարգ արտադրողներ դարձած են: Փարիզի ոսկեգործներու համբաւաւոր պողոտայ Ռիւ տը լա Փէի վրայ՝ Waskoll եւ Herzo վաճառատուները կը պատկանին հայերու:

Երկու խօսք ալ AJA-ի 2012ի ծրագիրներուն մասին:

 

Ընկերակցութեան ներկայի հեռանկարն է երիտասարդ հայերու արհեստագործութիւնը բարելաւել թեքնիք, գեղագիտական եւ վաճառքի մարզերուն մէջ: Ընկերակցութիւնը նաեւ հիմնադրամ մը ստեղծած է որ հինգ հոգիի կրթական թոշակ կ՛ապահովէ, Իտալիոյ մէջ տարի մը ուսանելու համար:

Ֆրանք Միւլլէր ընկերութիւնը արտադրած է հայկական Այբուբենով սահմանափակ քանակով ժամացոյցներ, որոնց վաճառքէն ձեռք ձգուելիք հասոյթը պիտի գանձէ վերոնշեալ հիմնադրամը: Ընկերակցութիւնը կը նախատեսէ նաեւ 2012ին հրատարակել հայկական ոսկեգործութեան պատմութեան նուիրուած հատոր մը: Իսկ յառաջիկայ Յունուարին, AJA-ի անդամները քով քովի պիտի գան յատուկ ժողովի մը առթիւ, որու օրակարգը նուիրուած պիտի ըլլայ շօշափելի լուծումներու որոնումին՝ տնտեսական ներկայ դժուարութիւնները յաղթահարելու համար:

«ՆՈՐ ՅԱՌԱՋ»