By Asbarez | Saturday, 09 March 2019
ՊՐԻՒՔՍԷԼ.- Երեքշաբթի, 5 Մարտին, ՀՅԴ Եւրոպայի Հայ Դատի գրասենեակի նախագահ Գասպար Կարապետեան ընդունեց աշխատանքային այցով Պրիւքսէլ գտնուող Արցախի Հանրապետութեան Ազգային ժողովի նախագահ Աշոտ Ղուլեանի առաջնորդած պատուիրակութիւնը Պրիւքսէլի Հայ Դատի գրասենեակին մէջ:
Հանդիպման ներկայ էին՝ ՀՅԴ Եւրոպայի Հայ Դատի գրասենեակի անձնակազմը, Պելճիքայի ՀՅԴ կոմիտէութեան անդամներ եւ ներկայացուցիչներ Պելճիքայի Հայ Օգնութեան Միութենէն, Համազգայինէն, ՀՅԴ «Արամ Երկանեան» Երիտասարդական Միութենէն Եւ ՀՅԴ Պելճիքայի Հայ Դատի յանձնախումբէն:
Ողջունելով Պարոն Ղուլեանը, Գասպար Կարապետեան վերահաստատեց Հայ Դատի գրասենեակի պատրաստակամութիւնը շարունակելու օժանդակել Արցախի Հանրապետութեան եւ պաշտպանել Արցախի ժողովուրդի իրաւունքները Եւրոպական հաստատութիւններու ներկայացուցիչներու մօտ:
Աշոտ Ղուլեան, իր կարգին գնահատեց Դաշնակցութեան, անոր ուղեկից միութիւններուն եւ Հայ Դատի գրասենեակներուն դերակատարութիւնը ազատ եւ անկախ Արցախի միջազգային ճանաչման պայքարին մէջ:
«Խորհրդարանին մէջ երբ մեր գործունէութիւնը կ՛ամփոփենք յատկապէս արտաքին կապերու վերաբերող նիւթերու մասին, պարբերաբար կ՛ընդգծենք Եւրոպայի Հայ Դատի գրասենեակի աջակցութեամբ արձանագրուած յաջողութիւնները», յայտարարեց Ղուլեան՝ աւելցնելով. «Պայքարը միասնաբար պիտի շարունակենք ջերմեռանդութեամբ»:
Անդրադառնալով հանդիպման՝ Գասպար Կարապետեան ըսաւ. «Այս առաջին անգամը չէ, որ Արցախի Հանրապետութեան բարձրագոյն պաշտօնեաներ կ՛այցելեն մեր գրասենեակը: Այսպիսի հանդիպումները կարեւոր կը համարեմ՝ Սփիւռքի մէջ գործող Հայ Դատի կառոյցներուն եւ Արցախի իշխանութիւններուն համագործակցութիւնը առաւել եւս զարգացնելու եւ համադրելու նպատակով»:
Չորեքշաբթի 6 Մարտին, արցախեան պատուիրակութիւնը, որուն մաս կը կազմէ նաեւ Արցախի արտաքին գործոց փոխնախարար Արմինէ Ալէքսանեան, պիտի մասնակցի Հայ Դատի գրասենեակի կազմակերպած «Հայատեացութիւն. պատմական եւ արդի դրսեւորումները» խորագիրով գիտաժողովին, որ տեղի պիտի ունենայ Եւրոպական խորհրդարանին մէջ:
comments
Australia Live by Armenia Media: Victor Karapetyan
Australia Live by Armenia Media: Professor Navoyan
Australia Live By Armenia Media: Reverend Sarkissian
Australia Live By Armenia Media: Zarouhi Manoukian
Australia Live By Armenia Media: Hayk Arsenyan
Australia Live By Armenia Media: Hasmik Movsisyan & Zhanna Nazaryan
Australia Live By Armenia Media: Sarkis Yedelian
Australia Live By Armenia Media: Kaylar Michaelian
Australia Live By Armenia Media: Kevork Vartanian & Harmig Hagopian
Australia Live By Armenia Media: Margaret Chater and Houri Demirdjian