By Aztag Daily | Friday, 11 October 2019
Դարերէ ի վեր ծանօթ ըլլալով Թուրքիոյ անցեալին ու ներկային, ամբողջովին ըմբռնած ըլլալով անոր վարած ծաւալապաշտ քաղաքականութիւնը եւ մարդկային բոլոր չափանիշներէ զուրկ գործելաոճը, անսպասելի չթուեցաւ Թուրքիոյ ներխուժումը Սուրիոյ հիւսիսարեւելեան շրջաններ:
Ամբողջ շրջանի ապահովութիւնը վտանգող այս յարձակումը, Թուրքիոյ իշխանութիւններուն հեղինակութեամբ, նոր սկիզբ կը դնէ միջազգային օրէնքներու եւ մարդկային իրաւունքներու ոտնահարման Թուրքիոյ բազմաբնոյթ արարքներուն: Այսօր, երբ սուրիական տագնապի լուծման համար ներքին եւ արտաքին ճակատներու վրայ քաղաքական լուրջ աշխատանք կը ծաւալի, Թուրքիա իր նկրտումներով կրկին խոչընդոտներ կը յառաջացնէ այս ուղղութեամբ:
Թուրքիոյ այս ներխուժումով Սուրիոյ հիւսիսարեւելեան շրջանի բնակչութեան բոլոր բաղադրիչները կը յայտնուին գոյութենական վտանգի դէմ յանդիման: Ուստի, Սուրիոյ Հայ դատի յանձնախումբը խստիւ կը դատապարտէ Թուրքիոյ` սուրիական հողեր ներխուժումը, հաստատելով, որ սուրիահայութիւնը, կառչած մնալով սուրիական հայրենիքին, զօրավիգ կը կանգնի անոր տարածքային ամբողջականութեան եւ Սուրիոյ պետականութեան գերիշխանութեան պահպանման:
Կոչ կ՛ուղղենք միջազգային ընտանիքին միասնական ճիգերով սանձելու դարերու ընթացքին իր գործած ոճիրներուն համար անպատիժ մնացած Թուրքիոյ ոտնձգութիւնները` կանխելու համար մարդկային նոր աղէտներ:
ՍՈՒՐԻՈՅ ՀԱՅ ԴԱՏԻ ՅԱՆՁՆԱԽՈՒՄԲ
Հալէպ, 10 հոկտեմբեր 2019
comments
Արամ Ա. Պահանջատիրութիւնը Մեր Ժողովուրդին Համար Լօզունգ Չէ, Այլ Ամէնօրեայ Տագնապ, Ապրում Ու Ձգտում Է
Անընդունելի է Պահանջատիրութիւնը դուրս հանել մեր օրակարգէն. Հարցազրոյց Արամ Ա. Վեհափառի հետ
Յակոբ Տէր Խաչատուրեան Շնորհաւորեց Արցախի Նորընտիր Նախագահ Արայիկ Յարութիւնեանը
Համաճարակի միջոցառումներ. ՀՅԴի նախաձեռնութիւնները Կիպրոսի մէջ.
Շահան Գանտահարեան. Համաճարակը կրնայ նոր աշխարհակարգի մը յանգեցնել
Համաճարակի միջոցառումներ. ՀՅԴի նախաձեռնութիւնները Սուրիոյ մէջ
Քորոնա Ժահրին Պատճառով Մահացաւ Սփիւռքահայ նկարիչ, Ճարտարապետ Էդման Այվազեան
