ՈՒԱՇԻՆԿԹԸՆ.- Ամերիկայի Հայ Դատի յանձնախումբը կը հաղորդէ, որ Միացեալ Նահանգներու նախագահ Պարաք Օպամայի կողմէ Երկուշաբթի, Փետրուար 13ին ներկայացուած 2013ի ամավարկի նախագիծին մէջ առաջարկուած է 19 առ հարիւրով կրճատել Հայաստանին յատկացուելիք տնտեսական օժանդակութիւնը:
Օպամա առաջարկած է 27,219,000 տոլար տնտեսական օգնութիւն տրամադրել Հայաստանին, ինչ որ 32 առ հարիւրով նուազ է 2012ին Քոնկրեսին կողմէ վաւերացուած տնտեսական օգնութեան չափէն, որ 40 միլիոն տոլար էր։
Ամերիկայի Հայ Դատի յանձնախումբը կը հաղորդէ, որ 2013ին տնտեսական օժանդակութեան մէջ ներառնուած չեն թմրեցուցիչներու եւ իրաւակարգի նկատմամբ միջազգային վերահսկողութեան ծրագիրի ծիրէն ներս՝ Միացեալ Նահանգներուն կողմէ Հայաստանին յատկացուելիք 2,824,000 տոլարը եւ Առողջապահութեան համաշխարհային ծրագիրներու ծիրէն ներս յատկացուելիք 2,500,000 տոլար օգնութիւնը։ «Եթէ այդ երկու գումարները աւելցնենք տնտեսական օժանդակութեան հիմնադրամի ծիրին մէջ առաջարկուելիք 27,219,000 տոլար օգնութեան, ապա Հայաստանին համար նախատեսուած տնտեսական օգնութեան ընդհանուր գումարը 32,543,000 պիտի կազմէ, ինչ որ փաստօրէն 19 առ հարիւրով նուազ է 2012ի օժանդակութենէն», նշուած է Հայ Դատի յանձնախումբի հաղորդագրութեան մէջ։
«Մենք տխուր ենք, սակայն զարմացած չենք, որ Օպամա անգամ մը եւս կը փորձէ կրճատել Հայաստանի տնտեսական օգնութեան չափը։ Անոր վարչակազմը առաջարկած է այս տարի 19 առ հարիւրով կրճատել Հայաստանի օգնութեան չափը՝ հակառակ Թուրքիոյ եւ Ատրպէյճանի շրջափակումէն բխող կործանիչ հետեւանքներուն, ինչպէս նաեւ Աֆղանիստանի, Իրաքի ու Քոսովոյի մէջ ամերիկեան առաքելութիւններուն ու Ուաշինկթընի տարածաշրջանային նախաձեռնութիւններուն՝ Հայաստանի աջակցութեան», յայտարարած է Ամերիկայի Հայ Դատի գործադիր վարիչ Արամ Համբարեան։
Ինչ կը վերաբերի ռազմական օգնութեան, ապա Օպամայի վարչակազմը առաջարկած է օտարերկրեայ ռազմական օժանդակութեանց եւ միջազգային ռազմական կրթութեան ու ուսուցման ծիրին մէջ Հայաստանի եւ Ատրպէյճանի հաւասարաչափ օժանդակութիւն տրամադրել՝ յաջորդաբար՝ 2.7 միլիոն տոլար եւ 600,000 տոլար։ 2013ի ամավարկի նախագիծին մէջ Լեռնային Ղարաբաղին յատկացուելիք օժանդակութեան մասին չի խօսուիր։
Ատրպէյճանի յատկացուած օժանդակութեան գումարը 2012ի 16.6 միլիոն տոլարէն նուազած է 11,029,000 տոլարի, իսկ Վրաստանին յատկացուած օգնութիւնը՝ 66 միլիոնէն 42,660,000 տոլարի։
Միջազգային ռազմական կրթութեան եւ ուսուցման ծիրին մէջ Օպամա առաջարկած է Թուրքիոյ յատկացնել 3.6 միլիոն տոլար։ Առաջարկին մէջ նաեւ կը շեշտուի, թէ Թուրքիա կարեւոր դաշնակից մը կը նկատուի Ուաշինկթընի համար:
Նշենք, որ ամավարկին առաջարկը պէտք է քննուի Ներկայացուցիչներու տան եւ Ծերակոյտին կողմէ: Քննարկումներուն ընթացքին յատկանշական փոփոխութիւններ կրնան տեղի ունենալ:
