ՈՒԱՇԻՆԿԹԸՆ.- Խախտելով Հայկական Ցեղասպանութեան բանաձեւերուն յստակօրէն ընդդիմանալու ամերիկացի արտաքին գործոց նախարարներու աւանդութիւնը՝ Միացեալ Նահանգներու արտաքին գործոց նախարար Հիլըրի Քլինթըն Հինգշաբթի, Փետրուար 25ին, Քոնկրեսի երկու յանձնախումբերու առջեւ վկայութեանց ընթացքին ուղղակիօրէն դէմ չարտայայտուեցաւ Ցեղասպանութեան ճանաչումը պահանջող բանաձեւին:
Բանաձեւին մասին հանրապետական Ճան Պուզմէնի հարցումին պատասխանելով՝ Քլինթըն կրկ-նեց, թէ Օպամայի կառավարութիւնը կ՛ուզէ <<պատմական իրականութեանց ամբողջական, անկեղծ ու արդար ճանաչումը>>, սակայն աւելցուց, թէ այդ մէկը ընելու լաւագոյն ձեւը Թուրքիոյ եւ Հայաստանի ժողովուրդներուն միջեւ քննարկումի ճամբով պիտի ըլլայ:
Հարցումը հարցնելու ոճէն եւ անոր շարժուձեւերէն բացայայտ էր, որ Ներկայացուցիչներու տան Արտաքին յարաբերութեան յանձնախումբի անդամ Ճան Պուզմէն հարցին մօտէն ծանօթ չէր ու դրուած էր այդ հարցումը Քլինթընին ուղղելու պարտադրանքին տակ:
Քլինթըն նաեւ աւելցուց, թէ Հայաստանի եւ Թուրքիոյ միջեւ յարաբերութիւնները բնականոնացնելու նպատակով սկսած գործընթացը պէտք չէ կապել որեւէ այլ հարցի, ու անոր առջեւ պէտք չէ նախապայմաններ դնել:
Աւելի ուշ, Ներկայացուցիչներու տան Պետական եւ արտաքին գործողութեան ենթայանձնախումբին առջեւ Քլինթընի վկայութիւն տալու ընթացքին, Քոնկրեսի Հայկական հարցերու համախմբումի համանախագահ Մարք Քըրքը շնորհակալութիւն յայտնեց անոր, որ անցեալին նեցուկ կանգնած է Ծերակոյտի մէջ շրջանառութեան դրուած Հայկական Ցեղասպանութիւնը ճանչցող բանաձեւերուն, եւ յոյս յայտնեց, թէ արտաքին գործոց նախարարութիւնը նեցուկ կը կանգնի նաեւ թիւ 252 բանաձեւին, որ Մարտ 4ին պիտի քննուի Ներկայացուցիչներու տան Արտաքին յարաբերութիւններու յանձնախումբին կողմէ:
Քլինթըն ուղղակիօրէն չպատասխանեց այս ակնարկութեան, այլ բաւարարուեցաւ ըսելով, թէ ինք նեցուկ կը կանգնի Թուրքիոյ եւ Հայաստանի միջեւ կապերը բարելաւելու նպատակով տարուող դիւանագիտական աշխատանքներուն:
Քլինթըն նաեւ ուղղակիօրէն չպատասխանեց թիւ 252 բանաձեւի հեղինակ Էտըմ Շիֆի այն ակնարկին, թէ՝ ինք կը յուսայ, որ արտաքին գործոց նախարարութիւնը դէմ չի դներ բանաձեւի վաւերացման:
Ամերիկայի Հայ Դատի յանձնախումի վարիչ գործավար Արամ Համբարեան ողջունեց այն իրողութիւնը, որ վերջին քանի մը շաբաթներուն, Օպամայի կառավարութեան բարձրաստիճան անդամ մը, երեք տարբեր առիթներով նախընտրած է չընդդիմանալ Ցեղասպանութեան բանաձեւին, աւելցնելով, որ ներկայ կառավարութեան կեցուածքը յստակօրէն տարբեր է նախորդ կառավարութեան որդեգրած Անգարայի ի նպաստ դիրքորոշումէն:
