By Asbarez | Tuesday, 14 July 2009
ՀՅԴ ԲԻՒՐՈՅԻ ՆԵՐԿԱՅԱՑՈՒՑԻՉ ՀՐԱՆՏ ՄԱՐԳԱՐԵԱՆԻ ԲԱՑՄԱՆ ԽՕՍՔԸ ՍՏԵՓԱՆԱԿԵՐՏԻ ՄԷՋ ԳՈՒՄԱՐՈՒԱԾ ՀԱՄԱՀԱՅԿԱԿԱՆ ԽՈՐՀՐԴԱԺՈՂՈՎԻՆ
Պարտաւոր Ենք Սրբագրել Սխալները
ԱՍՊԱՐԷԶ.- Ստորեւ կը հրապարակենք Յուլիս 11ին, Ստեփանակերտի մէջ, համահայկական համաժողովի բացման ընթացքին ՀՅԴ Բիւրոյի ներկայացուցիչ Հրանտ Մարգարեանի խօսքը:
Ամէնքս մեր երկրի զաւակներն ենք: Ապրել ու ապրում ենք պատմական, պատասխանատու ժամանակաշրջանում եւ պարտաւոր ենք դիրքորոշում ունենալ այն հարցերի վերաբերեալ, որոնք ուղղակիօրէն առնչւում են մեր պետութեան, մեր ժողովրդի ապագային: Այս խորհրդաժողովը, հայութեան տարբեր հատուածների ու շերտերի ներկայացուցիչների այս կազմը մեր գերակայ շահերը ձեւակերպելու, հնարաւորինս միասնական դիրքորոշում ներկայացնելու բացառիկ առիթ է:
Աշխարհը, թշնամի, բարեկամ, միջնորդ երկրները, միջազգային հանրութիւնը պէտք է իմանան, որ գործ ունեն հայութեան հաւաքական կամքի հետ, եւ որ մենք պատրաստ ենք պայքարելու երկնքի տակ մեր ինքնուրոյն, արժանապատիւ տեղն ունենալու համար: Մենք չենք արհամարհում ոչ ոքի, բայց նաեւ թոյլ չենք տայ ոտնահարել մեր շահերը: Մենք պարտաւոր ենք ապացուցել աշխարհին, որ արժանի ենք յարգանքի ոչ միայն մեր պատմութեամբ, մշակոյթով, քաղաքակակրթական արժէքներով, այլեւ ուրիշների կողքին հաւասար իրաւունքներով ապրելու նորօրեայ կամքով ու ապագայի մտապատկերով:
Մենք կարող ենք նաեւ ուժ, վստահութիւն եւ հեռատեսութիւն հաղորդել մեր երկու պետութիւնների այսօրուայ ու վաղուայ ղեկավարներին, որ նրանք ամուր թիկունքով առաջնորդուեն բացառապէս հայութեան ու Հայաստանի շահերով, գալիք սերունդների հանդէպ պատասխանատուութեամբ:
Մենք հաւաքուել ենք այստեղ՝ համայն հայութեան ուժերով, զոհողութիւններով ու զրկանքներով ազատագրուած Լեռնային Ղարաբաղի Հանրապետութեան մայրաքաղաքում, ի նշան այն բանի, որ սա Հայաստան է եւ մնալու է Հայաստան: Ի նշան այն բանի, որ հերոսական Արցախը շարունակում է մնալ ազգային շարժման դրօշակակիրը: Ի նշան այն բանի, որ Արցախում իրագործուող բարեփոխումները, պետականաստեղծ աշխատանքը, իշխանութիւն-ժողովուրդ միասնութիւնը արժանի են ճանաչման ու ընդօրինակման:
Այո, մեր օրակարգում Արցախի հիմնախնդիրն է, հայ-թուրքական յարաբերութիւնները:
Բայց սա չպէտք է խանգարի գիտակցել, որ հարցերի հարցը, մեր գերագոյն նպատակը Հայաստանի անկախ պետականութիւնն է, նրա լիարժէք կայացման, անվտանգութեան, զարգացման կարողականութեան ապահովումը: Առանց այդպիսի Հայաստանի վտանգուելու են մեր բոլոր ազգային-պետական հարցերը:
Չկայ առանձին Ղարաբաղի հարց, չկան առանձին պատմական հարցեր, չկայ առանձին հայ-թուրքական յարաբերութիւն, չկայ առանձին ներքին քաղաքականութիւն: Ամէն բան ամբողջական է՝ ներկայով, անցեալով, ապագայով շաղկապուած:
Եւ միայն այս ընկալմամբ, այս գիտակցութեամբ ձեռնարկուած քայլերով է հնարաւոր ապահովել մեր արժանապատիւ տեղը աշխարհում: Եւ դարձեալ ու կրկին միամտութիւն է կարծել, թէ կարելի է զիջել ազգային որեւէ հարցում չվտանգելով ամբողջը: Ընդհակառակը մի հարցում զիջելը շղթայական զիջումներ է պարտադրելու այլ ասպարէզներում:
Այս առումով համոզուած եմ՝ պաշտօնական Ստեփանակերտը, ընդհանրապէս Արցախն ու արցախցին, հէնց Արցախի շահերից մեկնելով, իրաւունք չունեն անտարբեր լինել, թէ ինչ է կատարւում հայ-թուրքական յարաբերութիւնների, ցեղասպանութեան միջազգային ճանաչման, æաւախքի ինքնավարութեան իրաւունքի, ընդհանրապէս Հայ Դատի պայքարի հարթակներում:
Կրկնում եմ՝ մենք ամբողջի մասերն ենք եւ միայն այս մտասեւեռմամբ ու նպատակադրումով ենք կարողանալու ճիշդ ճանապարհ դուրս գալ:
Այս գիտակցութիւնը պէտք է դառնայ մեր ժողովրդի քաղաքական, տնտեսական, հոգեւոր-մշակութային ընտրախաւի կենսակերպը: Այս գիտակցութիւնը պէտք է փոխանցուի երիտասարդութեանը: Այս գիտակցութիւնը պէտք է արմատաւորուի հայ ժողովրդի լայն զանգուածների մէջ: Միայն այդպէս մենք կը կարողանանք լիարժէք հաւաքականութիւն դառնալ ու հետապնդել մեր անհատական ու ընդհանրական նպատակները:
Մենք հաւաքուել ենք քննարկելու մեր ժամանակի համար ազգային-պետական կարեւորագոյն հիմնահարցերը, որովհետեւ վտանգներ ենք տեսնում, սխալ ընթացք ենք տեսնում, ինչը կարող է ծանր հետեւանքներ ունենալ: Թուրքիան մեզ հետ խօսում է նախապայմաններով, միջազգային բոլոր հանդիպումներում ու բոլորի հետ քննարկում է Ղարաբաղի հարցը, Ալիեւը հրապարակայնօրէն կարգաւորման իր պատկերացումն է ներկայացնում:
Բնականաբար, մենք էլ պարտաւոր ենք կարելի ու անկարելի միջոցներով կանխել, սրբագրել սխալները, ուժ տալ միմեանց եւ ուժ առնել:
Բայց նաեւ յատուկ ուզում եմ շեշտել, որ սա միտինգ չէ, պոպուլիզմի (ամբոխավարութիւն-Խմբ.) տեղ չէ: Ընդհակառակը՝ մեր քննարկումները պէտք է այս դահլիճին համապատասխան բարձրութիւն ունենան, իսկ եզրակացութիւնները լինեն իրատեսական ու ծանրակշիռ:
Թէեւ միւս կողմից յայտնի ասոյթ կայ. «եղի՛ր ռէալիստ՝ անհաւանական նպատակներ ունեցիր»: Այս հակասական մտքի ճշմարտութիւնը մենք ապացուցել ենք հէնց Արցախում:
Սիրելի՛ բարեկամներ, բացման այս խօսքում ես յատուկ չեմ ներկայացնում օրակարգային հարցերի վերաբերեալ Հայ Յեղափոխական Դաշնակցութեան ձեւակերպուած մօտեցումները: Մեր նպատակն այդ չէ: Մեր նպատակը ներկայացուցչական այս խորհրդաժողովի ազատ քննարկումներն են եւ վստահութիւնը, որ մենք նոյնն ենք արել, անում ու անելու ենք նոյնը՝ յանուն մեր ժողովրդի ու մեր անկախ պետականութեան:
Յաջողութիւն մեր աշխատանքին:
comments
