ԵՐԵՒԱՆ, «Առաւօտ».- Անցեալ Ուրաբթ օր, «Առաւօտ» թերթը հրատարակած է իր աշխատակից Աննա Իսրայլեանի կողմէ ՀՅԴ Գերագոյն Մարմնի ներկայացուցիչ Արմէն Օուստամեանի հետ հարցազրոյց մը՝ «Այս պլատֆորմը ՀՍԿի օրակարգն է» վերնագրով:
Ստորեւ կը ներկայացնենք սոյն հարցազրոյցի կարեւոր մէկ հատուածը.

ԱՆՆԱ ԻՍՐԱՅԷԼԵԱՆ.- Ընդդիմադիր ուժերին Լեւոն Տէր-Պետրոսեանի առաջարկած միաւորման պլատֆորմի 12 կէտերից առնուազն 7-8ը խնդիրներ են, որոնք միշտ կարեւորել է Դաշնակցութիւնը: Ուրեմն՝ ի՞նչն է խոչընդոտում համագործակցութեանը՝ ՀՅԴիի եւ Լեւոն Տէր-Պետրոսեանի միջեւ աւանդական վատ յարաբերութիւննե՞րը, թէ՞ մէկ այլ գործօն:

ԱՐՄԷՆ ՌՈՒՍՏԱՄԵԱՆ.- Մենք աւանդական յարաբերութիւնների զոհ չենք դառնում: Խնդիրը շատ յստակ է մեզ համար. քաղաքական դաշտում մեր փոխուած տեղի ու որպէս կուսակցութիւն մեր առաքելութեանը համապատասխան՝ դերակատարութիւն ճշդելու հարցն օրակարգի վրայ է: Այս պահին մենք հէնց այդ քննարկումների մէջ ենք: Մեզ համար յստակ է, որ նախ եւ առաջ պիտի հասարակութեան առջեւ հանդէս գանք այցեքարտով, որպէսզի շատ աւելի յստակ պատկերացնի, թէ որպէս քաղաքական ուժ ի՛նչ ենք ուզում, ի՛նչ ձեւերով ենք պատկերացնում լուծումները եւ դրա համար ի՛նչ գործունէութիւն ենք ծաւալելու: Եթէ այս խնդիրը մենք չլուծենք՝ յստակութիւն չի լինի, ամէն ինչ կը լղոզուի (կ՛ապականուի-Խմբ.) ու ձեւը կը դառնայ աւելի կարեւոր, քան բովանդակութիւնը:

ԱՆՆԱ ԻՍՐԱՅԷԼԵԱՆ.- Կարծում էք, թէ հասարակութիւնն անցած տարիների ընթացքում այդպէս էլ չի՞ տեղեկացել, թէ ՀՅԴն ինչ է ուզում:

ԱՐՄԷՆ ՌՈՒՍՏԱՄԵԱՆ.- Գիտի մի մասով, բայց ոչ միւս մասը, որը շատ կարեւոր է մեզ համար: Հասարակութիւնը գիտի, որ ՀՅԴն ազգային գաղափարների պաշտպան կուսակցութիւն է, այն էլ փորձել են անընդհատ աղաւաղել, թէ ինչպիսի պաշտպան է: Ուստի պէտք է յստակեցնել մեր պլատֆորմը 3 գլխաւոր ուղղութիւններով՝ ազգային խնդիրներ, ընկերվարական արժեհամակարգ եւ ժողովրդավարութիւն: Օրինակ՝ ընկերվարական արժեհամակարգը, սոցիալիզմ ասուածը լիարժէք ընկալուած չէ, շփոթ կայ, եւ սրա հետ կապուած մենք ունենք լուրջ անելիքներ: Ինչ վերաբերում է ժողովրդավարութեանը՝ այստեղ հատման դաշտը կարող է շատ աւելի լայն լինել, քանի որ բոլորն ուզում են ժողովրդավարութիւն, բայց մեզ համար խնդիր է հետեւեալը. եթէ ժողովրդավարութեան համար բոլորս՝ քաղաքական ուժերով չենք ստեղծել նախադրեալներ՝ չպիտի ակնկալենք, որ ընտրութիւնների ժամանակ յանկարծ այդ ժողովրդավարութիւնը պիտի ծաղկի: Եւ մենք այդ նախապատրաստման գործը չափազանց կարեւորում ենք: Բայց մեր կողմնորոշման համար ուղենիշ, գլխաւոր սկզբունք, չափորոշիչ են լինելու ազգային հարցերը: Եւ դրանց հետ կապուած՝ այն, ինչ այսօր յայտարարւում է, շատ մակերեսային է ու շատ ընդհանուր: Մեր պատկերացրած պլատֆորմը բոլորովին այլ բան է:

Եթէ ընդհանուր գնահատենք այն, ինչ հիմա առաջարկւում է՝ չնայած պրն Տէր-Պետրոսեանը շեշտեց, թէ խօսքը վերաբերում է ոչ թէ Կոնգրէսի, այլ քաղաքական պլատֆորմի շուրջ միաւորուելուն, բայց իրականում սա հէնց ՀԱԿին միանալու առաջարկ է: Եւ այս հարցը նա պէտք է շատ աւելի յստակեցնի: Այդ տարանջատումը նա չի կարողանում իր մէջ կատարել՝ միշտ այնպէս է ներկայացնում, որ ի վերջոյ դառնում է իրեն միանալ: Եւ եթէ չես միանում, իր հետ չես, ուրեմն՝ իրենց դէմ ես, դաւաճան ես եւ այլն: Յաջորդ քայլը դա՛ է. եթէ մենք իր 12 առաջարկները չենք ընդունում՝ նշանակում է, վաղը նորից յայտնուելու ենք դաւաճանների իր ցուցակում: Սա մօտեցու՛մ չէ: Մի քանի կարեւոր հարցերի վերաբերեալ օգտագործուած բառապաշարն ու գնահատականները, որոնք պահանջների տեսքով ներկայացուած են այս պլատֆորմում՝ այդ հաստատումը կատարելու լիարժէք հնարաւորութիւն են տալիս ինձ. սա ՀԱԿի օրակարգն է ամբողջութեա՛մբ:

ԱՆՆԱ ԻՍՐԱՅԷԼԵԱՆ.- Խնդրեմ որոշակիացրէք՝ 12 կէտերից ո՞ր մէկում էք արձանագրել դա:

ԱՐՄԷՆ ՌՈՒՍՏԱՄԵԱՆ.- Լեւոն Տէր-Պետրոսեանի ոճին ես վաղուց եմ ծանօթ. նա կարող է ասել 10 արտայայտութիւն, որից 6-8ը կարող են չափազանց ճիշդ լինել ու բոլորի համար ընդունելի: Բայց շատ կարեւոր է միւս 1-2-ը, որոնք ոչ այնքան ճիշդ են կամ ուղղակի սխալ: Խօսքը տուեալ դէպքում պլատֆորմի 11 եւ 12 կէտերի մասին է, որոնցով առաջարկւում է անցկացնել արտահերթ խորհրդարանական եւ նախագահական ընտրութիւններ ու պահանջել Սերժ Սարգսեանի անյապաղ հրաժարականը: Սա, ըստ էութեան, իշխանափոխութեան իր սխեման է, որին առաջարկում է, որ միանան բոլորը: Իսկ մեզ համար դա ինքնանպատակ չէ. մենք ասում ենք՝ այս փուլում ,սայլը չդնենք եզներից առաջէ: Նկատի ունենք, որ իշխանութեան գալու խնդիրը, բնական է, բոլոր քաղաքական ուժերն էլ հետապնդում են, եւ դա նորմալ է: Բայց իշխանութեան համար պայքարը չպիտի դառնայ գերակայող խնդիր, երբ փորձում ես յարաբերութիւններ հաստատել քաղաքական այլ ուժերի հետ: Քանի որ հարց է առաջանում՝ ես էլ եմ ուզում իշխանութեան գալ, դու էլ, էն միւսն էլ. ես ինչի՞ պիտի նպաստեմ իշխանութեան քո գալուն:

Եւ թող չթուայ, թէ խօսքը միայն 11 ու 12 կէտերի մասին է: Թւում է, թէ մենք ամբողջութեամբ կարող ենք համաձայնել պլատֆորմի այն կէտերին, որոնք վերաբերում են հայ-թուրքական յարաբերութիւններին ու ԼՂին: Բայց մեզ համար շատ քիչ է «թոյլ չտալ անհարկի զիջումների գնալ ղարաբաղեան հակամարտութեան կարգաւորման գործում» ձեւակերպումը: Ին՞չ է դա նշանակում: Ինձ համար դա շատ պարզ է, բայց իր համար կարող է մէկ այլ բան է նշանակում «անհարկի» բառը: Եւ ի վերջոյ՝ կարող է պարզ չդառնայ, թէ մենք միասին պայքարելու ենք ինչպիսի՞ զիջումներից խուսափելու դէմ: ՀՅԴ պլատֆորմում, ասենք, գրուելու է, որ զիջումների դաշտն արդէն սահմանել է ժողովուրդը՝ 1991 եւ 2006 թուականների հանրաքուէներով. դրանից ո՛չ մի զիջում: Համաձա՞յն են դրան: Կամ՝ հայ-թուրքական յարաբերութիւնների վերաբերեալ դրոյթը միայն չպիտի վերաբերի պատմաբանների յանձնաժողովի ստեղծման վիժեցմանը: Այնտեղ այլ հարցեր էլ կան, որոնք մեզ համար չափազանց կարեւոր են:

ԱՆՆԱ ԻՍՐԱՅԷԼԵԱՆ.- Նկատու՞մ էք, որ անգամ ընդդիմութիւն դառնալուց յետոյ էլ ՀՅԴն առաւել քննադատաբար հանդէս է գալիս ընդդիմութեան մէկ այլ հատուածի դէմ, քան իշխանութեան:

ԱՐՄԷՆ ՌՈՒՍՏԱՄԵԱՆ.- Բացարձակապէ՛ս: Մենք նախ դա առաջին պահից զգացինք հէնց մեր նկատմամբ՝ կասկածանք, թէ խաղ է... ի՜նչ ասես ասացին: Եւ հէնց ես առաջինն առաջարկեցի, որ ընդդիմութիւնը չպիտի պայքարի ընդդիմութեան դէմ: Այն, ինչ ես ասում եմ‘ ոչ թէ պայքարի բնոյթ ունի, այլ առողջացման:

Ես իրենց կադրային բանկին վատ գնահատական չեմ տալիս՝ ի վերջոյ, փորձ ունեցող մարդիկ ունի ՀՀՇն, ճանապարհ են անցել: Եւ այո՛, կարող են շատ օգտակար գաղափարներ հրապարակ բերել, ու դրանք քննարկուեն՝ այստեղ տարանջատման կամ խանդի խնդիր չունենք: Բայց ճի՛շտ ձեւակերպենք հարցը: Եւ թիւ 1 հարցը սա է լինելու՝ ինչպէ՞ս ենք մենք նպաստելու, որ յաջորդ ընտրութիւնների ընթացքում մեր քաղաքացին իր ձեռքում պահի սեփական ընտրական իրաւունքը: Մենք պիտի նպաստենք, որ նախ քաղաքացին գայ այդ գիտակցութեանը, եւ երկրորդը՝ բոլոր նրանք, ովքեր ոտնձգութիւն են կատարելու ընտրական իրաւունքի դէմ՝ իմանան, որ իրենց դէմ կանգնած կայ հզօր ճակատ: Կեղծիքները սահմանափակելու հարցում մենք բոլորի՛ հետ պիտի համագործակցենք եւ ինչքան լաւ գաղափար կայ՝ օգտագործենք: