ՀՕՄը Պէտք Է Նոր Մտածելակերպ Մտցնէ Իր Գործունէութեան Մէջ

 

ՀՕՄի 70րդ Համահայկական ժողովի կազմակերպման առիթով,  «Ազատ Օր»ի խմբագրութիւնը առիթը ունեցած է հարցազրոյց մը ունենալու կեդրոնական վարչութեան ատենապետուհի Վիքի Մարաշլեանի հետ: Մարաշլեան այս ժողովին վերընտրուեցաւ ՀՕՄի կեդրոնական վարչութեան անդամ, ապա դարձեալ ընտրուեցաւ վարչութեան ատենապետ: Սոյն զրոյցին հիմնական կէտերը կը հրատարակենք ստորեւ.

«ԱԶԱՏ ՕՐ».- Երեք տարի առաջ կեանքի կոչուած կեդրոնական վարչութեան ձեր կազմը իր ընտրութեան օրէն ի վեր սեղանի վրայ ունէր ՀՕՄի 100ամեակին առնչուած ծրագիրները, շարունակելով նաեւ ամբողջ գործունէութիւնը: Ի՞նչ էր ձեր փորձառութիւնը այս ընթացքէն:

ՎԻՔԻ ՄԱՐԱՇԼԵԱՆ.- ՀՕՄի 70րդ Համահայկական ժողովը անկիւնադարձ մըն է մեր միութեան համար: Արդէն բոլորած ենք 100 տարուան գործունէութիւն, ունինք գիտակցութիւնը մեր միութեան իրագործած բազմակողմանի ու բազմերանգ աշխատանքներու կարեւորութեան, իսկ ապագայ թիրախները ճշդելու հանգրուանին  կը գտնուինք: Շատ կարեւոր է, որ միայն անմիջական ապագայի համար թիրախներ չճշդենք մեր միութեան համար, այլ երկարաշունչ ծրագիրներ մշակենք՝ որպէս միջազգային կազմակերպութիւն:

«ԱԶԱՏ ՕՐ».- Հսկայ տիտան ՀՕՄի աշխարհատարած միութիւնը ո՞ր հանգրուանին կը գտնուի ներկայ պահուս: Իսկ ձեր փորձառութեան հիմամբ, դէպի ո՞ւր պէտք է ըլլայ ապագայի ուղղութիւնը:

ՎԻՔԻ ՄԱՐԱՇԼԵԱՆ.- ՀՕՄի աշխատանքը, այսօր, սփիւռքեան գաղութներու ազգային-միութենական կառոյցներու ընդհանուր գործունէութեան սահմաններէն անդին անցած է եւ հասած է նոր մակարդակի մը: Անշուշտ միջազգային մեր կառոյցը կատարելապէս կը գործէ 27 երկիրներու մէջ, ուր ունինք 29 միաւորներ: Մեր մնայուն ծրագիրները ունինք, որոնք պիտի շարունակենք Հայաստանի, Արցախի, æաւախքի եւ Սփիւռքի մէջ:

Յաջորդ հանգրուանին պէտք է աւելի հետամուտ ըլլանք կիներու առողջապահութեան եւ իրաւունքներու պաշտպանութեան հարցերով:

«ԱԶԱՏ ՕՐ».- ՄԱԿի մէջ ՀՕՄի ներկայութիւնն ու մասնակցութիւնը ինչպիսի՞ օգտակարութիւն ունին այս ծրագիրներու կապակցութեամբ:

ՎԻՔԻ ՄԱՐԱՇԼԵԱՆ.- Յառաջիկայ տարիներուն մէջ մեր աշխատանքը պէտք է ընդլայնի օտար կազմակերպութիւններուն մօտ: Ինչպէս ըսինք, ՄԱԿի ոչ կառավարական կազմակերպութիւններու մէջ արդէն շատոնց աշխուժացած ենք, իսկ համագործակցաբար կը մշակենք ու կ’իրագործե՛նք ծրագիրները: Նոյնը պէտք է ըլլայ այլ օտար կազմակերպութիւններու հետ եւս:

Այլեւս կը խօսինք ՄԱԿի կամ ԵՈՒՆԻՍԵՖի օրինակով միջազգային համբաւ ու կշիռ ունեցող կազմակերպութիւններուն մէջ աշխատանքներու մասին: Այսպիսի բարձր մակարդակի յարաբերական աշխատանքը դրական իր օգտակարութիւնը կ՛ունենայ մեր միութեան եւ ընդհանրապէս հայութեան համար: Այս կառոյցներու ճամբով ՀՕՄը իր աշխատանքի ծիրը ընդլայնած է՝ մասնակից դառնալով համաշխարհային տարողութեամբ ընկերային, բարեսիրական եւ մարդկային իրաւանց յարգումի ու պաշտպանութեան բազմազան աշխատանքներու:

ՀՕՄը վերջապէս դարձած է միջազգային ճանաչում ստացած կազմակերպութիւն մը: Եւ երբ միջազգային ճանաչում ունիս, տարբեր երկիրներու մէջ աշխատանքդ աւելի դիւրին եւ մատչելի կը դառնայ, իսկ պետական շրջանակներու եւ տեղական կառոյցներու հետ շփման հնարաւորութիւններդ կ՛ընդլայնուին:

ՀՕՄը ասկէ առաջ, տարիներու ընթացքին, կարծես առանձնացած էր որպէս հայկական կազմակերպութիւն, մենք մեր մէջ մնացած ենք եւ պէտք է այդ ծիրէն դուրս գանք:

«ԱԶԱՏ ՕՐ».- Ինչպէ՞ս կը կարծէք, որ կրնանք ընդլայնել այս աշխատանքը:

ՎԻՔԻ ՄԱՐԱՇԼԵԱՆ.- Ինչպէս որ ըսի, մենք ՄԱԿի մէջ պաշտօնեայ մը ունինք, որ շատ աշխոյժ ձեւով գործունէութիւն կը տանի: ՄԱԿի յանձնախումբ ունինք, որ շատ գիտակից  կազմուած է ընկերուհիներէ, որոնք ուսումնասիրեցին ՄԱԿի գործելաձեւը, ինչպէս նաեւ՝ թէ ինչպիսի ձեւով մենք կրնանք համագործակցութիւններ կնքել կամ ծրագիրներու մասնակցիլ:

Ճանչցուած ու հաստատուած կազմակերպութիւն մը ըլլալը եւ մեր նպատակներուն բացայայտ օգտակարութիւնը, բնականաբար, կարեւորութիւն կը ստանայ նաեւ տուեալ շրջանակներուն մէջ:

Եւրոպայի մէջ եւս նմանօրինակ աշխատանք կը տարուի: ՄԱԿի մէջ Հայաստան-Եւրոպա-Ամերիկա օղակը միասնաբար կ’աշխատի:

Բաւական գործ ունինք ընելիք: Մենք պէտք է պատրաստ ըլլանք նոր մտածելակերպ բերելու մեր գործունէութեան մէջ, արդիականանալու ու յարմարելու ժամանակներուն: Երիտասարդ  ուժերու պէտք ունինք, մեր փորձառու ընկերուհիներուն կողքին, որոնք միասնաբար յառաջ պիտի տանին եւ պիտի արդիականացնեն մեր միութիւնը:

«ԱԶԱՏ ՕՐ».- Հսկայական գործունէութիւն ծաւալած էք Սփիւռքի եւ Հայաստանի մէջ: Ինչպէ՞ս կարելի է մատակարարել այսպիսի լայնածաւալ ու բազմերես գործունէութիւն:

ՎԻՔԻ ՄԱՐԱՇԼԵԱՆ.- Մեր ընկերուհիներու նուիրումի ոգին է, որ հսկայական է: Այդ է, որ մեր միութեան ուժին կը վերածուի, որ կը հասնի՝ ո՛ւր որ պէտք է: ՀՕՄը մնայուն ծրագիրներ ունի՝ կրթական, խնամատարական, դաստիարակչական, բարեսիրական, ամառնային արձակուրդի, որբախնամ, առողջապահական ծրագիրներ եւ այլն:

Ես շատ ուրախ եմ, որ կը ներկայացնեմ այս կազմակերպութիւնը եւ շատ հպարտ եմ ՀՕՄի բոլոր շրջաններուն կատարած գործունէութեամբ: Ամէն տեղ մեր ՀՕՄուհիները անսակարկօրէն կը նուիրուին մեր միութեան աշխատանքները յաջողութեամբ կատարելու համար:

Իսկ իւրաքանչիւր անդամուհիի անձը, փորձառութիւնը, կեանքի կամ մասնագիտութեան ընդմէջէն, էութեան մէջ մեր հիմնական դրամագլուխն է: Շատ գիտակից ընկերուհիներ ունինք, որոնք պետական մակարդակով նոյնիսկ կրնան պարտականութիւններ ստանձնել եւ ներգործօն քաղաքական դերակատարութիւն ունենալ կիներու հարցերու դիմագրաւման մէջ:

«ԱԶԱՏ ՕՐ».- Հազիւ քանի մը օր առաջ, Երեւանի մէջ ՀՕՄի արձանի պաշտօնական բացման արարողութեամբ, փաստօրէն ամբողջացաւ 100ամեակի ծրագիրներու շարքը:

ՎԻՔԻ ՄԱՐԱՇԼԵԱՆ.-  Յուշարձանի զետեղման հարցը  նախորդ Կեդրոնական վարչութեան կազմէն յառաջ եկած որոշում մըն էր: 100ամեակի բոլոր ծրագիրներուն մաս կը կազմէր հայրենիքի հողին վրայ ՀՕՄին նուիրուած յուշարձան մը ունենալու գաղափարը: Ուրախ եմ, որ թէեւ ուշացումով, իր աւարտին հասաւ այս ծրագիրը: Անցեալ տարուան Հոկտեմբերին պէտք էր զետեղուած ըլլար յուշարձանը, երբ հայրենիքի մէջ կատարեցինք ՀՕՄի 100ամեակի նշումները: Բայց քաղաքապետարանի եւ այլ հարցերու պատճառով ուշացաւ զետեղումը: Վերջապէս իրագործուեցաւ: Ներկայ գտնուեցան պետական անձնաւորութիւններ, ՀՅԴ Բիւրոյի ընկերներ. շատ յաջող արարողութիւն մըն էր: Կոմիտասի զբօսայգիի մուտքին զետեղուեցաւ յուշարձանը. այն կը մարմնաւորէ հայ կինը, որ իր պարզուած բազուկներուն վրայ կռունկներ վերցուցած է՝ որպէս մեր ժողովուրդի հոգերը վերցնող, հայրենիքին եւ աշխարհացրիւ հայ ժողովուրդին ծառայելու մշտական խորհրդանիշ:

«ԱԶԱՏ ՕՐ».- ՀՕՄի կազմակերպական վիճակը ի՞նչ պատկեր կը ներկայացնէ:

ՎԻՔԻ ՄԱՐԱՇԼԵԱՆ.- Կազմակերպական հարցեր ունինք, յատկապէս այն շրջաններուն մէջ, ուր գաղութային հարցեր ալ կը դիմագրաւուին: Նաեւ 27 երկիրներու մէջ գործող հսկայական մեր միութիւնը երբեմն արագութեան կամ հաղորդակցութեան հարցերու դէմ յանդիման կը գտնուի: Այս 70րդ Համահայկական ժողովը, իր օրակարգերու շարքին, պիտի զբաղի կազմակերպական հարցերու քննարկումով: Կարեւոր է, որ միութիւնը պահպանէ եւ անշուշտ կատարելագործէ իր կազմակերպական մեքենան:

Ինչ կը վերաբերի աւելի երիտասարդ ընկերուհիներ ունենալու հարցին, կան դժուարութիւններ: Բայց ըսեմ, որ 100ամեակին առիթով կատարուած զօրաւոր քարոզչութիւնը հոս եւս իր արդիւնքը ունեցաւ եւ բաւական մեծ թիւ մը ներգրաւուեցաւ մեր միութեան շարքերէն ներս: Սուրիոյ մէջ գրեթէ 100 երիտասարդ ուժեր եկան եւ միացան մեզի, Արեւմտեան Ամերիկայի մէջ նոյնպէս մեծ թիւ մը անդամագրուեցաւ: Շատ անգամ խօսած ենք աւելի երիտասարդ տարիքի անձեր ներգրաւելու մասին: Նկատի առնելով, որ երիտասարդներու ժամանակը միշտ աւելի սահմանափակ է, յանձնարարելի է, որ յանձնախումբերու մէջ գործեն անոնք՝ ըստ իրենց մասնագիտութեան եւ ըստ իրենց հետաքրքրութեան:

«ԱԶԱՏ ՕՐ».- Նոր շրջաններ միացա՞ն ՀՕՄԻ կառոյցին:

ՎԻՔԻ ՄԱՐԱՇԼԵԱՆ.- Այո: Ուրախ եմ յայտարարելու, որ վերջին երեք տարիներուն ընթացքին նոր միաւոր մը ստեղծեցինք Տուպայի, ինչպէս եւ Վասթերոսի (Շուէտի) մէջ: Ռուսիոյ մէջ միաւոր մը ունեցած ենք, բայց բաւական աշխատանք պէտք է տարուի, որպէսզի աշխուժանայ եւ ընդարձակուի տուեալ մասնաճիւղի թէ՛ կազմը, թէ՛ գործունէութիւնը, մանաւանդ որ մեծ թիւով հայութիւն կայ (2 միլիոն Ռուսիոյ մէջ, գրեթէ 1 միլիոնը՝ Մոսկուա):

Արցախի եւ æաւախքի մէջ նաեւ կը գործեն մասնաճիւղերը: æաւախքի միաւորը շատ դժուար վիճակ կը դիմագրաւէ: Վրաստանի իշխանութիւնները լուրջ նեղութիւն կը պատճառեն: Իրական հալածանք է. վերջերս շրջանի մասնաճիւղի ատենապետուհին գործէ արձակուեցաւ առանց պատճառաբանութեան: Նոյնպէս՝ այլ վարչական ընկերուհի մը: Երկու ամիս առաջ առիթը ունեցայ æաւախք այցելելու եւ ականատես եղայ այն փաստին, որ վախի պատճառով նոյնիսկ մեր Ընդհանուր ժողովին չկարողացան մասնակցիլ շատ մը ընկերուհիներ, իսկ ժողովը փակուած դուռ-պատուհանով կատարեցինք, դժուար պայմաններու տակ: Բայց ըսեմ, որ մեր ընկերուհիները շատ զօրաւոր կամք ունին, ՀՕՄական ոգիով կաշխատի՛ն եւ չեն ընկճուիր հալածանքի մթնոլորտէն:

Մենք կը շարունակենք æաւախքի մէջ մեր ծրագիրները: Հաւաքական մկրտութիւն կ՛ընե՛նք, շարադրութեան եւ հայոց պատմութեան մրցոյթներ կը  կազմակերպենք, երիտասարդական կեդրոնները կը գործեն: Բազմաթիւ բուժկէտերու բժշկական նոր սարքաւորումներ տրամադրուած են, վերանորոգուած են դպրոցներ:

«ԱԶԱՏ ՕՐ».- Ի՞նչ է ձեր մաղթանքը ժողովին առիթով:

ՎԻՔԻ ՄԱՐԱՇԼԵԱՆ.- Մեր միութիւնը զօրացած կը մտնէ իր գոյութեան երկրորդ դարաշրջանը: ՀՕՄը վայելած է գուրգուրանքն ու առատաձեռնութիւնը մեր ժողովուրդին: Ինքն ալ իր կարգին միշտ փոխադարձած է հայ կարիքաւոր անհատներուն թէ կազմակերպութիւններուն:

ՀՕՄը գործած է զգացական մօտեցումով: Հո՛ն, ուր կարիքը զգացուած է (երկրաշարժ, Արցախի պատերազմ, հայապահպանում, դպրոցներ եւ այլն): Յաջորդ 100ամեակին համար պէտք է գործել աւելի քաղաքական, աւելի ընկերային ծրագիրներու ընդմէջէն: Ներկայիս անհրաժեշտ է թափ տալ ու յաւելեալ ճիգ գործադրել, որպէսզի ապահովուին ՀՕՄի յառաջընթացն ու զարգացումը՝ սփիւռքեան գաղութներու եւ Հայաստանի ընկերութեան զարգացման ի խնդիր:

Ես կը հաւատամ, որ նոր սերունդ մը պատրաստելու պարտականութիւնն ալ ունինք մեր ուսերուն վրայ: Լեզուի, մտածելակերպի, նոր ու արդիական ընկերութեան մը հիմքը դնող գիտակից ու աշխոյժ նոր սերունդ մը պէտք է դաստիարակենք ու պատրաստենք: