Ամերիկահայ գրող Քրիս Բոհջալեանը Washington Post պարբերականում յօդուած է հրապարակել՝ յոյս յայտնելով, որ Բարաք Օբաման կը կատարի նախկինում տուած խոստումն ու կը հետեւի Հռոմի պապի օրինակին՝ հայոց ողբերգութիւնն անուանելով այնպէս, ինչպէս որ կայ՝ Ցեղասպանութիւն, տեղեկացնում է tert.am-ը:
<<Անցեալ Կիրակի մամուլը ողողուած էր Հռոմի պապի ու ամենայայտնի ամերիկահայերից մէկի՝ Քիմ Քարդաշեանի յայտարարութիւններով: Հռոմի պապը Սուրբ Պետրոս տաճարում Օսմանեան կայսրութեան օրօք իրականացուած զանգուածային կոտորածներն անուանեց <<ցեղասպանութիւն>> եւ ընդգծեց, որ <<չարը ժխտելն ու թաքցնելը նշանակում է թողնել՝ վէրքն արիւնահոսի, առանց վիրակապելու>>:

Այժմ յոյս եմ յայտնում, որ նախագահ Օբաման կը հետեւի նրանց օրինակին եւ վերջապէս կ՛օգտուի հնարաւորութիւնից՝ կատարելու 2008ին ընտրական քարոզարշաւի ժամանակ տուած խոստումը: Քանի որ վերջին 7 տարում նա իրական քաղաքականութիւն է վարում՝ խուսափելով <<ցեղասպանութիւն>> բառի օգտագործումից, որպէսզի այդպիսով հանգստացնի ԱՄՆի ռազմական դաշնակից Թուրքիային, որն ի պատասխան շատ քիչ է տալիս>>, մեկնաբանել է <<Աւազէ Ամրոցի Աղջիկները>> եւ 17 այլ գրքերի հեղինակը:

Ամերիկահայ գրողի դիտարկմամբ՝ աշխարհի մեծ մասի համար Հայոց Ցեղասպանութիւնը վերաձեւակերպւում է <<կոտորած>> բառով, իսկ թուրք առաջնորդները մշտապէս ժխտել են այն՝ խեղաթիւրելով պատմական արձանագրութիւնները, թէեւ Ցեղասպանագէտների միջազգային ասոցիացիան այն ցեղասպանութիւն է անուանում:

<<Թուրքիային յաջողուել է խուսափել պատասխանատուութիւնից, մասամբ նաեւ այն պատճառով, որ արեւմտեան երկրները մշտապէս դիտարկել են Թուրքիան՝ որպէս Սառը պատերազմի ժամանակ խորհրդային ազդեցութեան ընդլայնման վերջին սահմանակէտ, իսկ այնուհետեւ՝ որպէս դաշնակից Մերձաւոր Արեւելքում: Ի հարկէ, ԱՄՆը նպաստել է դրան: Վաշինգտոնն այնքան է վախենում Անկարայից, որ մեզ երբեք չի յաջողուել այստեղ Հայոց Ցեղասպանութիւնը դատապարտող բանաձեւ ընդունել: 2008ին, նախընտրական արշաւի ժամանակ սենատոր Բարաք Օբաման նշել է, որ <<Ամերիկան արժանի է այնպիսի առաջնորդի, ով անկեղծօրէն կ՛ասի Հայոց Ցեղասպանութեան մասին եւ յստակօրէն կ՛արձագանգի բոլոր ցեղասպանութիւններին: Ես մտադիր եմ լինել այդպիսի նախագահ>>: Սակայն որպէս նախագահ՝ վերջին վեց տարում, ամէն տարի Ապրիլի 24ին նա գտնում է <> բառին փոխարինող որեւէ արտայայտութիւն՝ խուսափելով Թուրքիային բարկացնելուց>>, գրել է յօդուածագիրը:

Ինչպէս նկատում է Բոհջալեանը՝ ԱՄՆի զգուշաւոր քաղաքականութիւնը չի տալիս ակնկալած արդիւնքը, քանի որ ՆԱՏՕի անդամ Թուրքիան չի թոյլատրում ԱՄՆի ուժերին ԻԼԻՊի դէմ յարձակումների համար թռիչքներ իրականացնել <<Ինջիրլիկ>> աւիաբազայից:

<<Այս տարում, երբ քրիստոնէական հաւատքի ամենանշանաւոր առաջնորդը եւ Քարդաշեան կայսրութեան ամենայայտնի դէմքը կանգնած են միասին՝ պահանջելու յստակութիւն, աշխարհը եւ մեր երկիրը պարտաւոր են ճանաչելու, սգալու եւ դատապարտելու այս չարագործութիւնը:

Այսօր յոյս ունեմ, որ նախագահը կ՛ամրապնդի իր ժառանգութիւնը՝ որպէս յստակ բարոյական կողմնորոշում ունեցող պետական գործիչ, եւ կ՛ասի այն, ինչ նախկինում անասելի էր, կը ցուցաբերի նոյն քաջութիւնը, ինչ Հռոմի պապը, եւ մեր ողբերգութիւնը կը կոչի իր անունով՝ Ցեղասպանութիւն>>, եզրափակել է Քրիս Բոհջալեանը: