<<ԹԵՐԹ>>Ի ԶՐՈՅՑԸ ՀՅԴ ԱՐԵՒՄՏԵԱՆ ԱՄԵՐԻԿԱՅԻ ԿԵՆՏՐՈՆԱԿԱՆ ԿՈՄԻՏԷԻ ԱՏԵՆԱՊԵՏ ԴՈԿՏՈՐ ՎԻԳԷՆ ՅՈՎՍԷՓԵԱՆԻ ՀԵՏ

Tert.am-ի հետ զրոյցում ՀՅԴ Բիւրոյի նախկին անդամ, ներկայումս ՀՅԴ Արեւմտեան Ամերիկայի Կենտրոնական Կոմիտէի ատենապետ դոկտոր Վիգէն Յովսէփեանն անդրադառնալով ԱՄՆ Կոնգրեսում առաջիկայում ԼՂ հարցով լսումներին, նշեց, որ թէժ հարցադրումներ են անելու, որ յանկարծ ԵԱՀԿ ՄԽ ԱՄՆ համանախագահը <<ոլորապտոյտ>> բաներ չասի: Վ. Յովսէփեանը չթաքցրեց, որ æէյմս Ուորլիքից որոշակի դժգոհութիւն եւ հիասթափութիւն ունեն:

<<ԹԵՐԹ>> - Պարոն Յովսէփեան, յայտնի է, որ Յունուարին ԱՄՆ Կոնգրեսում քննարկուելու է Լեռնային Ղարաբաղի հակամարտութեան հարցը: Սա կարծես առաջին անգամն է. ինչո՞վ էք պայմանաւորում, որ Կոնգրեսը աւելի մեծ հետաքրքրութիւն է ցուցաբերում ղարաբաղեան հիմնախնդրի նկատմամբ:

ՎԻԳԷՆ ՅՈՎՍԷՓԵԱՆ - Պէտք է նշել, որ հայկական լոբին ու յատկապէս Հայ Դատի յանձնախումբը հսկայական դերակատարութիւն ունեցաւ այս վերջին երկու ամիսներին՝ ընդգծելու այն անհաւասար մօտեցումը, որ ամերիկեան պաշտօնատարները սկսել են ցուցաբերել, յատկապէս՝ ԵԱՀԿի եւ ԵԱՀԿ Մինսկի խմբի շրջանակում: Գլխաւորաբար, այս ամէնը պէտք է յետ տանենք մինչեւ այնտեղ, երբ հրապարակուել էր Էդ Ռոյսի եւ Էլիոթ Ինգըլի նամակը՝ մօտ 85 կոնգրեսականների ստորագրութեամբ: Այդ նամակը գլխաւորում են երկու ազդեցիկ կոնգրեսականներ, մէկը՝ Էդ Ռոյսը, ով Հանրապետական կուսակցութեան անդամ է եւ Կոնգրեսի Արտաքին յարաբերութիւնների յանձնաժողովի նախագահն է, իսկ Ինգըլը՝ դեմոկրատ իր գործընկերը, որը այդ յանձնաժողովում ամենաաւագ ներկայացուցիչն է: Այս երկուսի ճիգերով՝ մի նամակ դուրս եկաւ, որում ԵԱՀԿի Մինսկի խմբի ամերիկացի համանախագահ Ջէյմս Ուորլիքին նաեւ ԱՄՆին եւ ԵԱՀԿին կոչ է արւում՝ հրաժարուել ագրեսիայի ակտերին անդրադառնալիս <<կեղծ հաւասարակշռութիւն>> պահպանելու իրենց քաղաքականութիւնից: Նաեւ սահմանին լրացուցիչ դիտորդներ ներգրաւուելու, դիպուկահարների հետքանշման ուղղութեամբ քայլեր կերտելու: Հիմա. այս ամէնի հետ համաձայնել են բոլորը՝ երեք երկրների՝ ԱՄՆի, Ֆրանսիայի եւ Ռուսաստանի համանախագահները, բայց այդպէս էլ սա գործածութեան մէջ չդրուեց եւ միշտ մեզ ասւում էր, որ ադրբեջանական կողմը չի ցանկանում, որ այդ դիտորդները եւ յատուկ սարքերը, որոնք պէտք է արձանագրէին դիպուկահարներին, տեղադրուէին ադրբեջանական հողի վրայ: Երբ հայկական կողմը եկաւ ասելու, որ լաւ, կարելի է մեր կողմում դնել այդ սարքերը, այս անգամ ադրբեջանցիները սկսեցին լրիւ անտրամաբանական ու անհեթեթ խնդիրներ բարձրացնել, թէ եթէ դրանք տեղադրուեն, հայ զինուորները կը կարողանան անցնել-հատել սահմանը եւ ներսում կրակոցներ ու դիւերսիաներ իրականացնել եւ այդ բոլոր մեղքը բարդել Ադրբեջանի գլխին: Նման անհեթեթութիւններից յետոյ, Կոնգրեսի ղեկավարութեան հետ միասնաբար, եզրակացուեց, որ ժամանակն է արդէն Ուորլիքին հրաւիրել Կոնգրես եւ լսումների միջոցով հասկանալ, թէ, իրօք, ինչ է կատարւում: Վերջին մի քանի օրերին, ԵԱՀԿի Ամերիկայի ներկայացուցիչ դեսպան Բէյրը մէկ արտառոց ակնարկ կատարեց՝ ասելով, որ կարեւոր է, որ Թուրքիան իր դրական դերակատարութիւնն ունենայ արցախեան հարցի կարգաւորման ընթացքին, ինչը իրապէս աբսուրդ է, որովհետեւ մենք լաւ գիտենք, որ տարիների ընթացքում Թուրքիան միշտ բացասական դերակատարում է ունեցել, միշտ հրահրել է Ադրբեջանին: Եւ այս հանգրուանում, երբ արդէն այլ լուծումներ են որոնւում, Թուրքիայի քարտը մէջտեղ նետելն անընդունելի է: Ու արդէն մի քանի օր է՝ սկսուած են բողոքներ, նամակներ՝ կոնգրեսականների կողմից ուղղուած Արտգործնախարարութեանը, ԵԱՀԿին եւ Օբամայի վարչակարգին:

<<ԹԵՐԹ>> - ԱՄՆում հայկական լոբին Կոնգրեսում այդ լսումներին պատրաստւո՞ւմ է, հայ համայնքից ելոյթ ունեցողներ կը լինե՞ն:

ՎԻԳԷՆ ՅՈՎՍԷՓԵԱՆ - Անշուշտ, շատ-շատ լուրջ աշխատանք է կատարւում, նախեւառաջ, այդ յանձնաժողովի անդամներին տեղեկացնելու, կոնկրետ իրականութիւններով իրենց զինելու, որ յանկարծ չստացուի այնպէս, որ ինչ որ ընթացիկ մի բան կամ շօու կատարուի, որ գան, օրինակի համար՝ եւ ոլորապտոյտ ֆորմուլաներ ներկայացնեն: Պատրաստ ենք լինելու հարցապնդումերի:

<<ԹԵՐԹ>> - Ուորլիքից դժգոհ էին նաեւ Ադրբեջանում, որի կայքերից մէկը ԱՄՆում իրազեկ դիւանագիտական աղբիւրին յղումով տպագրեց տեղեկատուութիւն, որ նրան ադրբեջանական դժգոհութիւնների հիմքով շուտով փոխարինելու է մէկ այլ անձ:

ՎԻԳԷՆ ՅՈՎՍԷՓԵԱՆ - Դէ մենք յստակեցրել ենք, որ ակնկալելու ենք, որ ամերիկեան պետութեան որեւէ ներկայացուցիչ պէտք է լինի բաւականին առարկայական եւ առարկայական լինելով հանդերձ պէտք է կարողանայ հասկանալ, տեսնել պատմական իրողութիւնները: Եւ կարող եմ ասել, որ վերջին շրջանում մենք որոշ յուսախաբութիւններ ապրել ենք՝ տեսնելով, որ այդ առարկայական, շատ օբյեկտիւ կեցուածքներից սկսել է հեռանալ պարոն Ուորլիքը: Եւ ուրեմն՝ դա որոշ դժգոհութիւն պատճառած է: Լիայոյս ենք, որ պարոն Ուորլիքը եւ իր պատասխանատուները, այս լսումների առիթը կ՛օգտագործեն, որպէսզի մեզ վստահեցնեն, որ իրենք երկու կողմերին մօտենում են առարկայօրէն եւ հաւասարապէս: Սա պէտք է փաստուի, իսկ եթէ չփաստուեց, այդ պարագայում մենք՝ որպէս այս երկրի քաղաքացիներ, մեզ ընձեռուած հնարաւորութիւնների ու կարողութիւնների ճամբով կ՛իրագործենք մեր քայլերը:

<<ԹԵՐԹ>> - Լսումների օրը յայտնի՞ է:

ՎԻԳԷՆ ՅՈՎՍԷՓԵԱՆ - Կոնկրետ օր տակաւին չեմ կարող յայտնել: Բայց շատ չի ուշանայ:

<<ԹԵՐԹ>>.- Նաեւ ԱՄՆի Կոնգրեսում ներկայացուել է Ադրբեջանում ժողովրդավարութեան վերաբերեալ 4264 օրինագիծը, համաձայն որի՝ ադրբեջանական կառավարութեան անդամներին ամերիկեան վիզաներ չեն տրամադրուի: Եթէ այդ փաստաթուղթն ընդունուի, ապա նաեւ տնտեսական պատժամիջոցներ կը կիրառուեն Ադրբեջանի նկատմամբ: Բայց փաստօրէն, եթէ սա ուժ ստանայ, ապա ամերիկա-թուրքական յարաբերութիւններում կնճիռներ կ՛առաջանան:

ՎԻԳԷՆ ՅՈՎՍԷՓԵԱՆ - Եթէ բացառելու լինենք այդ եզակի երեւոյթը, պէտք է նշեմ, որ նման կնճիռ մենք չենք նկատել: Հակառակը, մերձեցում ենք նկատել, ինչի մասին բարձրաձայնել ենք: Եւ առաջիկայում այս լսումների եւ այլ քննարկումների միջոցով ու դրանցից յետոյ, մենք աւելի շեշտուած կերպով կ՛անդրադառնանք այս բոլորին: