By Asbarez | Friday, 22 April 2022
ԱՐՄԱՆ ԹԱԹՈՅԵԱՆ
ՀՀ կառավարութեան ղեկավարի երեկուայ յայտարարութիւնները խիստ վտանգաւոր են թէ՛ Հայաստանի, թէ՛ Արցախի համար:
Հայաստանի անվտանգութեան համակարգն ուղղակի աւերւում է նման յայտարարութիւններով, որոնք պայմանաւորուած են քաղաքական նեղ շահերով եւ չունեն մասնագիտական հիմքեր:
Այս կերպ են պատերազմի աւարտից սկսած միջազգային հանրութիւնից թաքցուել ադրբեջանական յանցաւոր արարքները: Այդ փաստերը թաքցուել են նաեւ ներքին հանրութիւնից ու Սփիւռքից:
Լուրջ ճնշումների են ենթարկուել ու շարունակում են ենթարկուել այդ փաստերը բարձրաձայնողները: Տեղի է ունենում պարզապէս ինֆորմացիոն բլոկադա (տեղեկատուութեան խափանաում):
Սեփական սխալները կոծկելու եւ դժգոհութիւններ առաջ չբերելու համար ՀՀ բարձրաստիճան տարբեր ղեկավար պաշտօնեաների կողմից անպատասխանատու կերպով արդարացուել ու օրինականացուել են մեր գիւղերի հարեւանութեամբ ու ճանապարհներին ադրբեջանական անօրինական զինուած տեղակայումները, սեփական քաղաքական շահերի համար արուել են Հայաստանի տարածքային իրաւազօրութիւնը Ադրբեջանին զիջող պաշտօնական յայտարարութիւններ՝ անտեսելով Հայաստանի ու Արցախի բնակչութեան անվտանգութիւնը, կեանքի եւ միւս իրաւունքները:
Այս պաշտօնեաները նաեւ հետեւողականօրէն զրոյացրել են պատմական նշանակութեան մեր հիմնարար թէզերը՝ սկսած նրանից, որ Ադրբեջանի տարածքային ամբողջականութիւնը որեւէ կապ չունի Արցախի հետ եւ չի էլ ունեցել, անտեսուել է, որ ադրբեջանական պետական դոկտրինայում (վարդապետութեան մէջ) Հայաստանի զգալի մասը համարւում է «ադրբեջանական պատմական տարածք» եւ որ մեր նկատմամբ տարւում է ֆաշիզմի հասնող ատելութեան ու թշնամանքի քաղաքականութիւն եւ այլն:
Այս ամէնը միջազգային ասպարէզում ազատել է Ադրբեջանի ձեռքերը եւ հնարաւորութիւն տուել աշխարհը կեղծիքներով լցնելու հաշուին զբաղեցնելու իր շահերի համար նպաստաւոր դիրքեր, իսկ մեզ դրել աշխարհաքաղաքական շահերի յորձանուտի մէջ:
Դատապարտելի կերպով առաջ քաշուեց եւ սկսուեց աշխարհին գովազդուել, այսպէս կոչուած, «խաղաղութեան» օրակարգը այն դէպքում, երբ Ադրբեջանը մեզ հետ խաղաղութեան մասին խօսում է միայն աւերելու ու ոչնչացնելու սպառնալիքներով եւ շարունակում իր յանցաւոր արարքները: Զուգահեռ՝ Հայաստանում սկսուեցին մարդկանց զգօնութիւնը թմրեցնող յայտարարութիւններ՝ առանց մէկ գրամ անգամ տեսնելու այդ օրակարգի արդիւնքները:
Արդիւնքում՝ «խաղաղութիւն»ը մնաց միայն մեզ վրայ եւ ստացուեց այնպէս, որ դա պէտք է իրականացուի մեր իրաւունքների ու արժանապատուութեան, Հայրենիքի հաշուին՝ ինչ է, թէ Հայաստանում կան պաշտօնեաներ, որոնք իրենց քաղաքական շահերն ու պաշտօնների պահպանումը երկրի անվտանգութիւնից աւելի են գերադասում:
Ուստի, ՀՀ կառավարութեան ղեկավարի ու, առհասարակ, որեւէ այլ պաշտօնեայի կամ պետական մարմնի նման որեւէ յայտարարութիւն չունի լեգիտիմութիւն (օրինականութիւն) եւ չի կարող դրուել մեր ժողովրդի շահերի պաշտպանութեան հիմքում:
– Արման Թաթոյեան Հայաստանի Հանրապետութեան նախկին Մարդու իրաւունքներու պաշտպանն էր։ Անցեալ տարի՝ 21 Նոյեմբեր 2021ին, ան ստացաւ Արեւմտեան Ամերիկայի Հայ Դատի յանձնախումբի «Մարդկային Իրաւանց Ախոյեան» մրցանակը։
comments
