«Պի.Պի.Սի.» լրատու գործակալութիւնը հաղորդեց, թէ Ուրբաթ, Հոկտեմբեր 1ին, Թուրքիոյ Ազգայնական շարժում կուսակցութեան ղեկավար Տեւլեթ Պահչելիի գլխաւորութեամբ, Անիի Մայր տաճարին մէջ, որ վերածուած է մզկիթի, տեղի ունեցաւ ցուցադրական նամազ մը, որուն մասնակցած են հարիւրաւոր թուրք ազգայնամոլներ, մինչ տասը հազար հոգիի մասնակցութիւնը կ՛ակնկալուէր:

Մշակոյթի նախարարութիւնը, որ նախապէս վերապահութեամբ մօտեցած էր այս ծրագիրին, Հինգշաբթի կէսօրին արտօնութիւն տուած էր, որ այս նախաձեռնութիւնը իրականացուի, ապա, ըստ «Մարմարա»ի, կուսակցութիւնը տենդագին պատրաստութեան լծուած է՝ նամազի այս արարողութիւնը լիարժէք կերպով օգտագործելու համար: Կարսի մէջ բարձրախօսներ զետեղուած են՝ տեղւոյն բնակչութիւնը, ինչպէս նաեւ մերձակայ նահանգներու ժողովուրդը հրաւիրելով նամազին մասնակցելու ու ներկայ գտնուելու Պահչելիի ճառախօսութեան։ Նաեւ, որոշուած է աղօթքի եկողներուն գորգ տրամադրել Անի մտնելու ընթացքին: Հակառակ այն իրողութեան, որ որոշուած էր որեւէ տեսակի դրօշակի կամ վերտառութեան գործածութիւնը չարտօնել, երկու հազար թրքական դրօշակ բաժնուած է եկուորներուն։

Թրքական մամուլը դիտել կու տայ, որ նամազի այս որոշումը կը յաջորդէ Սումելայի մէջ՝ յոյներուն, իսկ Աղթամարի մէջ՝ հայերուն տրուած աղօթքի արտօնութեան։

Նամազի նախաձեռնութիւնը պատճառ դարձաւ, որ թրքական մամուլը տեղեկութիւններ հաղորդէ Անիի Մայր տաճարի պատմութեան ու ճարտարապետական մանրամասնութիւններուն մասին։ Թերթերը նաեւ կը նշեն, թէ 1064 թուականին, երբ Ալփասլան առաջին անգամ Կարս մտաւ, այս եկեղեցիին մէջ նամազ ըրաւ ու այս պատճառաւ, ներկայիս նախկին եկեղեցին կը կոչուի «Ֆեթհիյէ» մզկիթ։

Անիի աւերակները մինչեւ 2002 թուական, զինուորական առաջին կարգի արգիլեալ գօտի էին, սակայն 2002ին արգելքը վերցուեցաւ, ու այդ թուականէն ի վեր Թուրքիա այցելող հայերը մնայուն հետաքրքրութիւն կը ցուցաբերեն Անիի նկատմամբ։ 2006ին վարչապետ Էրտողան, իսկ 2008ին նախագահ Կիւլ այցելած են Անիի աւերակները։