Թրքական «Ռատիքալ» օրաթերթը կը հաղորդէ, որ Նոպէլեան մրցանակակիր, թուրք գրող Օրհան Փամուք, յունական «Քաթիմերինի» օրաթերթին հետ ունեցած իր հարցազրոյցին ընթացքին յայտարարած է. «Ես չեմ հրաժարիր հայերուն եւ քիւրտերուն վերաբերեալ ժամանակին կատարած իմ յայտարարութիւններէս։ Ես ոչ թէ քաղաքական գործիչ եմ, այլ՝ գրականագէտ», ըսած է ան՝ աւելցնելով, որ կարեւոր կը նկատէ արժանապատուութիւնն ու ազնուութիւնը»։

Հարցազրոյցին ընթացքին, Օրհան Փամուք մասնաւորաբար խօսած է Թուրքիոյ մէջ գոյութիւն ունեցող իրավիճակին, թրքական մշակոյթին, իր ստեղծագործութիւններուն, ինչպէս նաեւ ազգայնական շրջանակներու կողմէ իր խօսքերն ու միտքերը աղաւաղելու փորձերուն մասին։

«Թուրքիան երկու տարբեր աշխարհներու միջեւ ամէնէն ճգնաժամային կէտին վրայ կը գտնուի։ Անիկա ունի երկու տարբեր կողմեր, ինչ որ բնական է։ Այդ իրավիճակը կ՛ազդէ նաեւ մեր մշակոյթին վրայ։ Շատ յաճախ մեր մշակութային դէմքը ձեւաւորուած է քաղաքական որոշումներու իբրեւ արդիւնք», յայտարարած է Փամուք:

Միւս կողմէ, «Զաման» օրաթերթը կը հաղորդէ, որ Թուրքիոյ փոխվարչապետ Պիւլենտ Արընչ, իշխող Արդարութիւն եւ բարգաւաճում կուսակցութեան Ալեքսանտրեթի նահանգային ընդհանուր ժողովին ընթացքին իր արտասանած խօսքին մէջ անդրադարձած է նաեւ Հայոց Ցեղասպանութեան հարցին։ Արընչ նշած է. «Համաշխարհային Ա. պատերազմի տարիներուն հայերը ապստամբեցան եւ զէնք օգտագործեցին։ Այն ժամանակ ստիպուած եղած ենք հայերը տեղահանել, եւ այս ընթացքին տեղի ունեցած բացասական դէպքերուն պատճառով, Հայաստանը եւ հայկական Սփիւռքը արդէն 90 տարիէ ի վեր մեզ կը մեղադրեն 2 միլիոն հայերու սպանութեան համար։ Մենք հայերը ցեղասպանութեան չենք ենթարկած, մենք ուրիշ երկիրներու նման չենք։ Ցեղասպանութեան մասին խօսողները թող Պոսնիոյ օրինակը բերեն»։