ՏԻԱՐՊԷՔԻՐ, «Ա.Էֆ.Փէ.».- Թուրքիոյ խորհրդարանի անդամ ընտրուած առաջին քիւրտ կինը հանդիսացող յայտնի քաղաքական գործիչ Լէյլա Զանա Երեքշաբթի, Յուլիս 28ին դարձեալ բանտարկութեան դատապարտուեցաւ թրքական ատեանին կողմէ, Լոնտոնի համալսարաններէն մէկուն մէջ իր կատարած մէկ ճառին համար: Ան այս անգամ 15 ամսուան բանտարկութեան դատապարտուեցաւ, որովհետեւ անոր խօսքերը Քիւրտիստանի բանուորական կուսակցութեան ի նպաստ քարոզչութիւն նկատուեցան:
Ան իր ելոյթին ընթացքին յայտարարած էր, թէ Քիւրտիստանի բանուորական կուսակցութիւնն ու անոր բանտարկուած ղեկավար Ապտուլլահ Օչալանը, «քիւրտերուն համար կարեւոր են այնքան, որքան մարդ արարածին համար կարեւոր են անոր ուղեղն ու հոգին»:
Զանայի դէմ բացուած դատը կը քննուէր Տիարպէքիրի Քրէական բարձրագոյն ատեանին կողմէ, որուն վերջին նիստին ընթացքին Զանայի փաստաբանները պնդեցին, թէ Զանայի արտասանած ճառը քարոզչութիւն չէր, այլ՝ պարզապէս կացութեան գնահատական մը, եւ դատարանէն խնդրեցին անոր դէմ արձակուած ամբաստանութիւնը անտեսել։
Դատաւորները, հիմնուելով ահաբեկչական կազմակերպութեան մը քարոզչութիւն կատարելը քրէական յանցանք նկատող օրէնքի մէկ յօդուածին վրայ՝ Զանան դատապարտեցին 16 ամիս բանտարկութեան, սակայն դատարանին մէջ անոր լաւ վարմունքին համար, բանտարկութեան վճիռը նուազեցուցին 15 ամսուայ։
Դատախազները Զանայի դէմ 5 տարուան բանտարկութեան վճիռ մը պահանջած էին։
Զանայի փաստաբանները յայտնեցին, թէ վճիռը վերատեսութեան ենթարկելու դիմում պիտի կատարեն:
Անցեալ տարի Զանայի դէմ արձակուած 10 տարուան բանտարկութեան վճիռը եւս վերատեսութեան կ՛ենթարկուի:
1994ին, այլ քիւրտ երեսփոխաններու հետ 15 տարուան բանտարկութեան դատապարտուելէ ետք, Զանա եւ միւս քիւրտ երեսփոխանները ազատ արձակուած էին 2004ին, երբ թրքական վճռաբեկ ատեան մը անոնց դէմ արձակուած նախկին վճիռը անհիմն նկատած էր: Զանա, որ խորհրդարանի անդամ ընտրուած էր 1991ին, Նոպէլեան խաղաղութեան մրցանակի թեկնածու եղած է:
