ՊՈԼԻՍ, «Մարմարա».- Տիգրանակերտի նախկին քաղաքապետ Օսման Պայտեմիր, որ Միացեալ Նահանգներ կ՛այցելէ ներկայիս, Նիւ Ճըրզիի մէջ հանդիպում մը ունեցած է տիգրանակերտցի հայերու հետ, ընկերակցութեամբ այլ քիւրտ գործիչներու եւ Տիգրանակերտի Ս. Կիրակոս եկեղեցւոյ թաղային խորհուրդի ատենապետ Էրկիւն Այըքի։ Ընթրիքի ընդունելութեան ներկայ եղած են մօտաւորապէս 200 հայեր, որոնք տարիներ առաջ գաղթած են Ամերիկա։ Այս հաւաքի նպատակներէն մէկն էր Ս. Կիրակոս եկեղեցւոյ նորոգութեան համար դրամահաւաք կատարել։
Այըք յիշեցուցած է, որ մինչեւ կարճ ժամանակ առաջ, եկեղեցին աւերակ վիճակ ունէր, իսկ հիմա նորոգուած է. այս նորոգութեան մէջ իրենց բաժինը բերած են նաեւ Տիգրանակերտի քաղաքապետութիւնն ու Օսման Պայտեմիր։
Հետաքրքրական ելոյթ մը ունեցած է Պայտեմիր, որ միշտ համակրանք ունեցած է հայերուն նկատմամբ։ Ան ըսած է. «Միջագետքի եւ Քիւրտիստանի աշխարհագրութիւնը հասարակաց հայրենիքն է հոն ապրող ամէն կրօնքէ մարդոց: Դժբախտաբար, մեր ժողովուրդներէն ոմանք, բարձր գին վճարելով՝ ստիպուեցան լքելու հօրենական հողերը։ Մեծ վէրքեր գոյացան։ Ասոնց գլխաւորն է մեզի բարեկամ եւ եղբայր հայ ժողովուրդը։ Հայերը մեծ սպանդներու ենթարկուեցան, բայց բուն կորսնցնողները ետին մնացողները եղան։ Ապա պատահեցան Շէյխ Սայիտի եւ Տերսիմի սպանդները։ Այդ օրերէն մինչեւ այսօր, այս աշխարհագրութիւնը տակաւին չէ գտած իր վերջնական խաղաղութիւնը։ Այս բոլորը խախտեցին մեր աշխարհագրութեան բնական դրութիւնը։ Մեր մարդիկը դիմադրեցին, եւ այսօր դարձեալ ծնունդ առած է Միջագետքի ու Անատոլուի մէջ անդորր կեանք մը ապրելու յոյսը»։
Պայտեմիր նաեւ պատասխանած է քիւրտերու եւ շրջանային ընտրութիւններու վերաբերեալ հարցումներու։
Նշենք, որ Պայտեմիր, քաղաքապետ եղած օրերուն, քանի մը առիթով հայերէն ներողութիւն խնդրած էր Ցեղասպանութեան համար եւ տիգրանակերտցիներու թոռնիկները հրաւիրած էր Տիգրանակերտ:
