By Asbarez | Wednesday, 04 June 2014
ԵՐԵՒԱՆ, «Փանորամա».– ՆԱԹՕի գլխաւոր քարտուղար Անտըրս Ֆոք Ռասմուսենի հրաւէրով, 4 Յունիսին Հայաստանի պաշտպանութեան նախարար Սէյրան Օհանեանի գլխաւորած պատուիրակութիւնը Պրիւքսէլի ՆԱԹՕի կեդրոնին մէջ մասնակցած է Աֆղանիստանի մէջ անվտանգութեան աջակցման միջազգային ուժերու կազմին մէջ զօրախումբ տրամադրող երկիրներու պաշտպանութեան նախարարներու նիստին:
Նիստի ընթացքին քննարկուած են 2014 թուականին աւարտող առաքելութեան եւ 2015 թուականէն նախատեսուող ՆԱԹՕի նոր նախաձեռնութիւններուն, մասնաւորապէս՝ «Վճռական աջակցութիւն» գործողութեան առնչուող հարցեր: Հայկական կողմը անգամ մը եւս հաստատած է, որ ունի կարողութիւններն ու ցանկութիւնը շարունակելու աջակցիլ Աֆղանիստանի մէջ ՆԱԹՕի կողմէ իրականացուող նախաձեռնութիւններուն:
Ժողովին զուգահեռ, նախարար Սէյրան Օհանեան հանդիպում ունեցած է Իտալիոյ պաշտպանութեան նախարար Ռոպերթա Փինոթթիի հետ:
Հանդիպման ընթացքին քննարկուած են հայ-իտալական երկկողմանի ռազմական համագործակցութեան առնչուող հարցեր:
Իտալական կողմը բարձր գնահատած է Հայաստանի մասնակցութիւնը միջազգային կայունութեան եւ խաղաղութեան պահպանման գործողութիւններուն՝ յատկապէս ընդգծելով Հայաստանի պատրաստակամութիւնը Լիբանանի մէջ տեղակայուած ՄԱԿի ՖԻՒՆԻԼի առաքելութեան ուժեր տրամադրելու: Կողմերը ընդգծած են, որ միացեալ մասնակցութիւնը միջազգային խաղաղապահ գործողութեան նոր խթան պիտի հանդիսանայ երկկողմանի համագործակցութեան զարգացման համար, մասնաւորապէս ռազմական ոստիկանութեան, ռազմական կրթութեան եւ այլ բնագաւառներու մէջ։
Հանդիպման ընթացքին քննարկուած են նաեւ միջազգային եւ տարածաշրջանային անվտանգութեան հարցեր: Այս պարունակին մէջ Հայաստանի պաշտպանութեան նախարարը բարձր գնահատած է Իտալիոյ կառուցողական եւ հաւասարակշռուած դիրքորոշումը՝ տարածաշրջանային խնդիրներուն վերաբերեալ:
Հանդիպման աւարտին երկու երկիրներու պաշտպանութեան նախարարներուն կողմէ ստորագրուած է «Հայաստանի Հանրապետութեան պաշտպանութեան նախարարութեան եւ Իտալիայի Հանրապետութեան պաշտպանութեան նախարարութեան միջեւ Լիբանանում Միաւորուած Ազգերի Ժամանակաւոր Ուժերի շրջանակներում համագործակցութեան եւ օժանդակութեան մասին» համաձայնագիրը, որով կը կարգաւորուին ՖԻՒՆԻԼի իտալական զօրախումբի կազմին մէջ հայկական խաղաղապահ դասակի ընդգրկման ընթացակարգերը:
comments
ԵԽԽՎի Համազեկուցողները Կոչ Ըրին Պաքուին՝ Հայաստանէն Դուրս Բերելու Զօրքերը Եւ Ազատ Արձակելու Գերիները
Խրիմի Կամուրջի Պայթումին Գործով Ձերբակալուած Են 5 Մեղադրեալներ, Որոնցմէ Երեքը Հայ Են
Իրան Դարձեալ Յիշեցուց Ալիեւին, Թէ Պատմական Սահմաններու Փոփոխութիւնը Անընդունելի Է
Ալիեւ Հայաստանը Կը Զգուշացնէ Սադրանքներու Դիմելէ
Պրիւքսէլ Ուշադիր Կը Հետեւի Հայ-Ատրպէյճանական Սահմանագօտիի Կացութեան
Ատրպէյճան Կը Ծրագրէ Բերձորի Եկեղեցին Մզկիթի Վերածել
Անգարա Դատապարտեց ՄԱԿի Ընդհանուր Ժողովի Նախագահին Ծիծեռնակաբերդ Այցելութիւնը
Սուրիա Պիտի Դիմադրէ Իր Հողերուն Վրայ Որեւէ Թրքական Գործողութեան. Ասատ
