ԵՐԵՒԱՆ, «Ազատութիւն».– Ռուսիոյ հայերու միութիւնը համոզուած է, որ Մոսկուայի մէջ քանի մը օր առաջ ձերբակալուած, ապա կալանաւորուած հայ գործարար Լեւոն Հայրապետեանը յանցանք չէ գործած։ «Ազատութիւն» ձայնասփիւռի կայանին հետ ունեցած զրոյցին ընթացքին այս մասին յայտնած է միութեան նախագահ Արա Աբրահամեանը:

«Բոլորս տեղեակ ենք առաջին րոպէից: Ի հարկէ, դա լաւ լուր չի, բայց ինքներս զբաղւում ենք, մենք անմիջական կապ ունենք ե՛ւ քննչական օրգանների հետ, ե՛ւ փաստաբանի հետ», դիտել տուած է Աբրահամեան:

Խնդիրը, ըստ անոր, այն է, որ «ժամանակ է պահանջւում, երկար ժամանակ է պէտք, որպէսզի պարզեն եղելութիւնը»:

«Մենք մեր կողմից ասել ենք եւ ասում ենք, որ այդ մարդը հնարաւոր չի, որ մեղաւոր լինի, կապուած լինի մանաւանդ քրէական գործերի հետ: Այդպիսի բան հնարաւոր չի, մենք իրեն հաւատում ենք, մենք գիտենք, որ դա ժամանակաւոր թիւրիմացութիւն է, դժբախտութիւն է, որ պէտք է մի քիչ համբերութիւն: Ամէն ինչ կը ճշտուի, եւ Լեւոն Հայրապետեանին բաց կը թողնեն:

«Մենք մեր կողմից ինչ որ հնարաւորութիւն ունենք՝ դա անում ենք: Մենք կարող ենք միջնորդութիւն գրել, մենք կարող ենք փաստաբանի հետ հանդիպել, մենք կարող ենք լաւ խօսքեր ասել այն մարդու մասին, որ իրօք մեծ գործ է արել ե՛ւ Հայաստանի համար, ե՛ւ Սփիւռքի համար», նշած է Արա Աբրահամեան:

Թղթակիցը հարցուցած է, որ նկատի ունենալով Լեւոն Յարութիւնեանի ունեցած առողջական հարցերը արդեօք ան բժիշկներու վերահսկողութեան տա՞կ է. «Ինքներդ գիտէք, որ երէկ դատարանը երկու ամիս վերցրեց կալանքի տակ: Հիմա մեր հնարաւորութիւնն է, որ մենք կարող ենք օգնել, մենք հիմա բոլոր փաստաթղթերը հաւաքում ենք՝ ե՛ւ Ամերիկայից, ե՛ւ բոլոր տեղերից, որպէսզի Երկուշաբթի օրը այդ բոլոր փաթեթը, փաստաթղթերը, մեր էդ բողոքը մենք կը ներկայացնենք, որ էդ մարդը բժշկի կարիք ունի, որ պէտք է իրեն թողնեն ժամանակաւորապէս տանը, որովհետեւ իրօք դա այդպէս է»:

«Եւ այդ փաստաթղթերը հաւաքում ենք, բողոքը ներկայացրել ենք, փաստաբանը ասել է, որ արդէն նշանակել են յանձնաժողով քննչական օրգանների, որ էդ խնդիրը նայի: Ինձ թւում է՝ պարզ կը լինի, մենք ամէն ինչ անում ենք, որ էդ մարդը գոնէ այնտեղ չմնայ», աւելցուցած է Աբրահամեան:

«Եւ դրա հետ միասին, ե՛ւ տարբեր մարդիկ, ե՛ւ մեր սրբազանը՝ Եզրասը (Հայ առաքելական եկեղեցու Ռուսաստանի եւ Նոր Նախիջեւանի թեմի առաջնորդ Եզրաս արք. Ներսիսեանը), ե՛ւ Հայերի միութիւնը միջնորդութիւն ենք գրել, որ իրեն բաց թողնեն», յայտնած է Ռուսիոյ հայերու միութեան նախագահը: