ԱՆԻ ՄԱՐԳԱՐԵԱՆ

ԿԱԶԱ, «Ռազմինֆօ».- Իսրայէլի պաշտպանութեան բանակը յայտարարել է եւս 16 հազար պահեստազօրայիններին զօրակոչելու մասին: Այսպիսով, Կազայի հատուածում գործողութեան մէջ ընդգրկուած իսրայէլցի զինծառայողների թիւը հասնում է 86 հազարի:

Ինչպէս հաղորդում է CNN լրատուական գործակալութիւնը, յղում տալով Իսրայէլի պաշտպանութեան բանակի հրամանատարութեան խօսքերին, զինծառայողների թուի աւելացումը թոյլ կը տայ ընդլայնել ռազմական գործողութեան ծաւալները, իսկ արդէն ճակատում մարտնչող զինծառայողներին՝ որոշ ժամանակով հանգստանալ:
Բացի այդ, Իսրայէլի իշխանութիւնները յայտարարել են Կազայի հատուածում տեղակայուած ՄԱԿի դպրոցի հրթիռակոծման միջադէպը հետաքննելու մասին: Դպրոցում հիմնականում փախստականներ էին պատսպարուել: Հրթիռակոծման պատճառով սպաննուել է առնուազն 16 հոգի:

Միեւնոյն ժամանակ «Համաս»ը բնութագրել է Իսրայէլի ռազմական գործողութիւնը որպէս «զանգուածային սպանութիւն», որին զոհ են գնացել 1360 հոգի:
Իսրայէլական The Jerusalem Post-ի տուեալներով՝ Կազայի հատուածում արձանագրուած պայթիւնի ժամանակ Յուլիսի 30ին տուժել է իսրայէլցի 27 զինծառայող, մահացել են 3ը: Արդիւնքում իսրայէլական բանակի կորուստները ռազմական գործողութեան հետեւանքով կազմում են 56 հոգի:

Աւելի վաղ՝ նոյն օրը, Իսրայէլը յայտարարել էր չորսժամեայ հաշտութեան մասին, սակայն ինքն էլ խախտել էր այն՝ 2 հրթիռային հարուած հասցնելով Կազային, ինչի պատճառով սպանուել էր 15 պաղեստինցի:

Իսրայէլի վարչապետ Բենիամին Նեթանիահուն նախօրէին յայտարարել էր, որ Կազայի հատուածում ռազմական գործողութիւնը շարունակուելու է այնքան ժամանակ, մինչեւ «Համաս»ը լիովին չոչնչացուի:

Յիշեցնենք, որ Իսրայէլի պաշտպանութեան բանակը Յուլիսի 8ին յայտարարել էր պաղեստինեան «Համաս» խմբաւորման դէմ ռազմական գործողութեան մեկնարկի մասին: Պատճառը, ըստ իսրայէլական կողմի, Կազայի հատուածից իրենց ուղղուած հրթիռային չդադարեցուող հարուածներն են:

Ըստ փորձագէտների՝ Իսրայէլի ակտիւութիւնը կապուած է 3 իսրայէլցի պատանիների սպանութեան հետ: Յունիսի 12ին նրանց առեւանգել էին, Իսրայէլը նոյն օրն առեւանգման պատասխանատու էր յայտարարել «Համաս»ին: Աւելին, Յունիսի 26ին Իսրայէլի անվտանգութեան համընդհանուր ծառայութիւնը հրապարակել էր «Համաս»ի 2 ակտիւիստների լուսանկարները եւ տուեալները, որոնք, ըստ իսրայէլական կողմի, մեղաւոր են առեւանգման հարցում:

Օրեր անց պատանիների դիերը յայտնաբերել էին Յորդանան գետի արեւմտեան ափին՝ Հեւրոն քաղաքից դէպի հիւսիս ընկած հատուածում: «Համաս»ը հերքել է, թէ իր անդամները որեւէ առնչութիւն ունեն պատանիների սպանութեան հարցում:

Այնուհանդերձ, Իսրայէլի ուժայիններն այդ օրուանից ի վեր մի շարք գործողութիւններ էին իրականացրել, որոնց արդիւնքում ձերբակալուել է 400 արաբ, որոնց շարքում են «Համաս»ի անդամներ, պաղեստինցի քաղաքական գործիչներ:

Բացի այդ, ձերբակալուել էին 57 պաղեստինցիներ, որոնց 2011ին ազատ էին արձակել իսրայէլցի առեւանգուած զինծառայող Հիլադ Շալիթի ազատման դիմաց: Իսրայէլի զինծառայողներն այս ընթացքում խուզարկել էին մօտ 3 հազար շինութիւններ, այդ թւում՝ հեռուստաընկերութիւնների ու թերթերի գրասենեակներ: