ԵՐԵՒԱՆ, «Ազատութիւն».– 7 Օգոստոսէն 8 Օգոստոս լուսցող գիշերը ատրպէյճանական կողմը շարունակած է կրակել հայ-ատրպէյճանական սահմաններուն ուղղութեամբ. կրակոցները արձակուած են պետական սահմանագօտիի տարբեր հատուածներուն մէջ: Հակառակորդը օգտագործած է հրաձգային, նաեւ մեծ տրամաչափի զինատեսակներ: Այս տեղեկութիւնը փոխանցած են Հայաստանի եւ Լեռնային Ղարաբաղի պաշտպանական նախարարութիւնները:

Ղարաբաղի պաշտպանութեան բանակին համաձայն՝ վերջին օրուան ընթացքին Լեռնային Ղարաբաղի եւ Ատրպէյճանի զօրքերու շփման գիծի ողջ երկարութեամբ հակառակորդին կողմէ զինադադարի դրութիւնը խախտուած է շուրջ 400 անգամ, հայ սահմանապահներուն ուղղութեամբ արձակուած է աւելի քան 8 հազար կրակոց:

Պատասխան գործողութիւններուն իբրեւ արդիւնք կարելի եղած է կասեցնել հակառակորդին աշխոյժութիւնը: Հայկական կողմէն զոհեր չկան, կայ մէկ վիրաւոր՝ 19ամեայ զինուոր Վիկտոր Շուբերտի Աբրաամովը, որ անմիջապէս տեղափոխուած է զինուորական հիւանդանոց, անոր վիճակը ծանր կայուն է։
Ղարաբաղի պաշտպանութեան նախարարութիւնը վստահեցուցած է, որ հայ սահմանապահները սահմանագիծի ողջ երկայնքով կը շարունակեն վերահսկել սահմանային իրավիճակին:

Պաշտպանութեան նախարարութեան համաձայն՝ 7 Օգոստոսի գիշերը ատրպէյճանցիները կրակած են ո՛չ միայն հայ սահմանապահներուն, այլ նաեւ Տաւուշի մարզի երկու տասնեակ գիւղերուն ուղղութեամբ. զինադադարի դրութիւնը խախտուած է շուրջ 40 անգամ, արձակուած է աւելի քան 546 կրակոց: Զոհեր եւ վիրաւորներ չկան:

Պաշտպանութեան նախարարութեան բանբեր Արծրուն Յովհաննիսեան «Ազատութեան» հետ ունեցած զրոյցին ընթացքին յայտնած է, որ հայկական զինուած ուժերը շատ ճշգրիտ կերպով կը հետեւին զինադադարի դրութեան պահպանման:

«Հակառակորդը շարունակել է ակտիւօրէն կրակել, խախտել հրադադարի ռեժիմն՝ ամենատարբեր տրամաչափի զինատեսակներով: Ընդհանուր լարումը պահպանւում է, հակառակորդի դիպուկ կրակոցներին հայկական զինուած ուժերը պատասխանել են: Հակառակորդը կրակել է ինչպէս դիրքերի, այնպէս էլ գիւղերի ուղղութեամբ: Մենք, հիմնականում, պատասխանել ենք դիրքերի ուղղութեամբ: Այս պահին իրավիճակը լիովին վերահսկւում է, Հայաստանի սահմաններին զոհեր եւ վիրաւորներ չեն եղել», յայտնած է Յովհաննիսեան:

Հայկական կողմին համաձայն՝ 28 Յուլիսէն ի վեր իրավիճակի սրման իբրեւ հետեւանք հայկական կողմը տուած է վեց զոհ, ատրպէյճանական կողմը մօտ 8 անգամ աւելի:

Այնուհանդերձ, 7 Օգոստոսին առաջին գիծ այցելելէ ետք Ատրպէյճանի նախագահ Իլհամ Ալիեւը յայտարարած է, թէ ատրպէյճանական կողմը հայերուն համարժէք պատասխան տուած է, եւ այսօր ատրպէյճանական բանակը պատրաստ է Ղարաբաղի մէջ ոչնչացնելու որեւէ բան:

Արծրուն Յովհաննիսեան այս մասին ըսած է. «Գնահատականներ, կոնկրետ բնորոշիչներ, չեմ ուզում տալ, միայն ասեմ, որ ցանկալի է, որ ադրբեջանական հանրոյթը մի փոքր իմանար՝ ինչ է ճշմարտութիւնը, եւ այդ կեղծիքի շրջապտոյտի մէջ չմնար: Ըստ էութեան, այդ կեղծիքի շրջապտոյտը տանում է դէպի կործանում»: