ԵՐԵՒԱՆ, «Թերթ».– 5 Սեպտեմբերին Հայաստանի պաշտպանութեան նախարարութիւնը հրապարակած է յայտարարութիւն մը, որուն մէջ անդրադարձած է Ատրպէյճանի կողմէ Հայաստանի նկատմամբ որդեգրուած նոր քաղաքականութեան։

«Աստիճանաբար դուրս գալով Օգոստոսի սկզբին սահմանագծում դիւերսիոն գործողութիւնների անյաջողութեան պատճառած ցնցումից՝ Ադրբեջանը Հայաստանի նկատմամբ որդեգրել է նոր մարտավարութիւն, այս անգամ շեփորահարելով Հայաստանի տնտեսութեան ծանր վիճակի, ներքաղաքական լարուածութեան, արտագաղթի եւ մարդու իրաւունքների ոտնահարման մասին։

Այս սին յայտարարութիւններին լրատուամիջոցներից զատ ներգրաւուած են նաեւ Ադրբեջանի բարձրաստիճան պաշտօնական օղակները, եւ անձամբ Իլհամ Ալիեւը:
Իր տասնեակ զինուորների անիմաստ մահուան ուղարկած նախագահը Սոչի մեկնելուց առաջ սահմանամերձ գօտում երիտասարդութեան եւ հասարակայնութեան ներկայացուցիչների հետ ունեցած հանդիպման ժամանակ յարձակումները վերագրելով հայկական կողմին, հանդէս էր եկել ադրբեջանական բանակի կրած խայտառակ պարտութիւնը քօղարկող յայտարարութիւններով եւ յաւելել, թէ Հայաստանի տնտեսութիւնը քայքայուած է, Երեւանն իբր ընդունում է, որ ի զօրու չէ ինքնուրոյն ապահովել իր անվտանգութիւնը, երկիրը դատարկւում է եւ շփման գծի հայկական կողմը պահպանող կենդանի ուժ չկայ:

Ադրբեջանի նման գործելաոճը նպատակ է հետապնդում Հայաստանը պահել մեկուսացման եւ շրջափակման մէջ, ստուեր նետել միջազգային ասպարէզում Հայաստանի բարձր վարկանիշի վրայ եւ հնարաւորինս նուազեցնել զբօսաշրջութեան եւ ներդրումային հոսքերը:

Հայաստանի պաշտպանութեան նախարարութիւնը հերթական անգամ յայտարարում է, որ Հայաստանի զինուած ուժերը վստահօրէն վերահսկում են իրավիճակը շփման գծի ողջ երկայնքով, խստօրէն հետեւում են հրադադարի ռեժիմի պահպանմանը եւ իրավիճակին համարժէք գործողութիւնների են դիմում միայն հակառակորդի կողմից արձանագրուող նպատակային խախտումների դէպքում: Իսկ Հայաստանը, որը ողջ աշխարհում յայտնի է իր բացառիկ եւ հարուստ պատմամշակութային ժառանգութեամբ, աշխարհագրական բազմազանութեամբ եւ հիւրերի հանդէպ ջերմ ու բարեհամբոյր վերաբերմունքով, միանգամայն անվտանգ երկիր է, ուր տիրում է օրէնքի գերակայութիւնը, իսկ մարդու իրաւունքները եւ ազատութիւնները համարւում են բարձրագոյն արժէք»: