Երգիչ, երգահան Սերժ Թանգեանը Լարք երաժշտական ընկերակցութեան հետ համագործակցութեամբ առաջին անգամ ներկայացրեց իր եւ Նոր Զելանդացի երգահան æոն Փսաթասի՝ «100 տարի» կոչուող սիմֆոնիկ ստեղծագործութիւնը նուիրուած Հայոց Ցեղասպանութեանը: Դուդուկի հնչիւններով սկսուող այս մեղեդին իւրովի պատմում է հայոց չսպիացող վէրքի մասին ու ներկայացնում մի դար հերքուած պատմութիւնը: Տարբեր, այդ թւում հայկական երաժշտական գործիքների՝ դուդուկի, քանոնի, կիթառի, ջութակի մենակատարումներն ամբողջացնում էին «Լարք»ի նուագախումբն ու երգչախումբը՝ «Տէր Ողորմեա», «Ամենասուրբ երրորդութիւն, տուր աշխարհիս խաղաղութիւն» կատարումով:

Փասադենայի «Էմբեսեդըր Աուդիթորիում»ում, Սեպտեմբերի 20ին, ներկայացնելով իր ստեղծագործութիւնը՝ Թանգեանը նշեց, որ այն գրուել է Հայոց Ցեղասպանութեան հարիւրամեակին ընդառաջ: «Շատ տպաւորուած եմ մեր ստեղծագործութեան «Լարք»ի մատուցումից: Առաջին անգամ է այն կատարւում նուագախմբի կողմից հանրութեան առջեւ, եւ շատ յուզիչ էր ու ազդեցիկ: Ուրախ կը լինեմ, եթէ «100 տարի»ն ներկայացուի նաեւ հայրենիքում՝ հայաստանեան նուագախմբի կողմից», «Ասպարէզ»ի հետ զրոյցում նշեց աշխարհահռչակ երաժիշտը:

«Յաւերժի ուխտագնացներ» խորագրով այս համերգով Լարք երաժշտական ընկերակցութիւնը մեկնարկեց իր մշակութային 100 միջոցառումների շարքը՝ նուիրուած Ցեղասպանութեան հարիւրամեակին: Երաժիշտ խմբավար Վաչէ Պարսումեանի գլխաւորութեամբ «Լարք»ի նուագախումբն ու երգչախումբը ներկայացրին Տիգրանեանի, Բեթհովենի, Վագների, Վերդիի, Բելինիի, Մոցարտի օպերային ստեղծագործութիւններից հատուածներ, նաեւ՝ Սերժ Թանգեանի «Օրքա» սիմֆոնիան:
«Շատ հպարտ ենք, որ համագործակցում ենք հայ համայնքի ակտիւ եւ նուիրեալ, միջազգայնօրէն ճանաչուած արուեստագէտի հետ: Սերժ Թանգեանը մշտապէս աջակցել է Լարք երաժշտական ընկերակցութեանը՝ որպէս հայ մշակոյթը պահպանող եւ ներկայացնող հաստատութիւն: Նա մեծ սիրով արձագանգեց նաեւ այս համերգին մասնակցելու մեր առաջարկին, եւ ուրախ եմ, որ հայ համայնքը մեզ հետ միասին այսօր յիշատակում է Հայոց Ցեղասպանութիւնն ու վայելում գեղեցիկ երաժշտութիւն», նշեց «Լարք»ի տնօրէնների խորհրդի նախագահ Անդրանիկ Թորոսեանը: