Ադրբեջանի մարդու իրաւունքների պաշտպաններ Գունայ Իսմայիլովան եւ Սամիր Կազիմլին յօդուած են հրապարակել «The New York Times»ում, որտեղ բարձրաձայնում են իրենց երկրում մարդու իրաւունքների հետ կապուած վատթարացող վիճակի մասին:

Ինչպէս գրուած է յօդուածում, այժմ հաստատուել են երկու տարի առաջ Եւրոպայում մարդու իրաւունքների պաշտպանութեամբ զբաղուող տարբեր խմբերի հնչեցրած մտավախութիւնները, որ «Եւրատեսիլ» մրցոյթն Ադրբեջանում անցկացնելն է՛լ աւելի կ՛օգնի Ադրբեջանի աւելի ու աւելի անհանդուրժող ռեժիմին. միայն վերջին տարուայ ընթացքում երկրում տեղի են ունեցել մարդու իրաւունքների պաշտպանների մի շարք ձերբակալութիւններ:

Հեղինակներն իրենց վրդովմունքն են արտայայտում Ադրբեջանի նկատմամբ Եւրոպայի մօտեցման առնչութեամբ. Եւրոպայի խորհուրդը համաժողով է անցկացնելու Շաբաթ եւ Կիրակի օրերին Բաքւում՝ Մարդու իրաւունքների եւրոպական կոնվենցիայի իրականացման վերաբերեալ:

«Դա ծիծաղելի կը լինէր, եթէ այդքան ողբերգական չլինէր», գրում են հեղինակները՝ յիշեցնելով, որ արդէն սահմանափակ թուով անկախ ոչ կառավարական կազմակերպութիւնների բազմաթիւ առաջնորդներ բանտերում են կեղծ մեղադրանքներով: Նրանց խօսքերով՝ եւրոպացի առաջնորդները հաւանաբար չեն այցելի բանտերում գտնուող վատ պայմաններում պահուող Լէյլա Եունուսին, Արիֆ Եունուսին, Ինթիգամ Ալիեւին, Ռասուլ æաֆարովին եւ այլ իրաւապաշտպանների ու լրագրողների:

«Ընդհանուր առմամբ, Ադրբեջանը տարօրինակ վայր է թւում քննարկելու համար, թէ ինչպէս իրականացնել մարդու իրաւունքները», գրուած է յօդուածում:
«Մարդու իրաւունքների եւրոպական կոնվենցիայի սկզբունքները պահպանելու փոխարէն Ադրբեջանը շարունակել է օգտագործել օրէնքը որպէս քննադատներին լռեցնելու միջոց», գրում են հեղինակները՝ յաւելելով, որ անընդունելի է, որ Եւրոպայի խորհուրդն Ադրբեջանում հովանաւորում է մարդու իրաւունքների մասին համաժողով, եւ դիւանագէտներն ու եւրոպացի դատաւորները պատրաստւում են մասնակցել իրադարձութեանը:

Նրանք համոզուած են, որ պետական հսկողութեան տակ գտնուող լրատուամիջոցները միայն օգտագործելու են իրադարձութիւնը Եւրոպայի խորհրդի պաշտպանած իրաւունքները ոտնահարող Ադրբեջանի ներկայիս կառավարութեան լեգիտիմութիւնը մեծացնելու համար:

«Թերթ»