ՊՈԼԻՍ, ԵՐԵՒԱՆ, «Մարմարա», «Արմէնփրէս», «Էրմենիհապեր».- Անցած շաբաթավերջին հաղորդուեցաւ, որ պոլսահայ գրող, լրագրող, հրապարակախօս Էթիէն Մահճուպեան նշանակուած է Թուրքիոյ վարչապետ Ահմետ Տաւութօղլուի գլխաւոր խորհրդական:

«Միլլիյէթ» կը տեղեկացնէ, թէ Մահճուպեան, որ ակադեմական աշխատանքի շրջանէն դասընկեր ու բարեկամ եղած էր Տաւութօղլուի, «գոհունակութեամբ» ընդունած է այս առաջարկը։ Թերթը կը նշէ, որ երբ Տաւութօղլու կը պաշտօնավարէր իբրեւ արտաքին գործոց նախարար, յաճախ կը խորհրդակցէր Մահճուպեանի հետ։
Մահճուպեան սիւնակագիր եղած է թրքական ընդդիմադիր «Զաման» օրաթերթին մէջ, ապա տեղափոխուած է իշխանամէտ «Աքշամ» օրաթերթ: Ան անդամ է քրտական հարցի կարգաւորման առաջարկներու մշակման համար 2013ին ստեղծուած «Իմաստուններու խորհուրդ»ին, որուն մէջ ներառուած են ոչ-կառավարական կազմակերպութիւններու, գիտական ու լրագրական շրջանակներու աւելի քան վեց տասնեակ ներկայացուցիչներ:

Իշխանամէտ օրաթերթերէն «Սապահ»ը կը գրէ, որ նախկին վարչապետ Ռեչեփ Թայիփ Էրտողանի՝ հայութեան յղած ցաւակցական ուղերձէն ետք, Տաւութօղլուի խորհրդականի պաշտօնին ազգութեամբ հայ մտաւորականի մը նշանակումը կարեւոր քայլ է՝ Հայաստան-Թուրքիա յարաբերութիւններու կարգաւորման հոլովոյթը զարգացնելու համար:

Ըստ «Սապահ»ի՝ Մահճուպեան այդ պաշտօնը ստանձնելու առաջարկը ստացած է անձամբ վարչապետէն՝ անցեալ շաբաթ, երբ տեղի ունեցած է «Իմաստուններու խորհուրդ»ի հերթական ժողովը, որուն աւարտին Տաւութօղլու հանդիպած է Մահճուպեանի հետ եւ անոր առաջարկած է ստանձնել գլխաւոր խորհրդականի պաշտօնը: Մահճուպեան ընդունած է առաջարկը:

Տաւութօղլու կարեւոր նկատած է Մահճուպեանի ունեցած ներդրումը Թուրքիոյ ժողովրդավարացման եւ քաղաքացիական հասարակութեան ձեւաւորման մէջ: Կը նշուի նաեւ, որ Մահճուպեան դերակատարութիւն պիտի ունենայ հայկական հարցի կարգաւորման գործին մէջ, մանաւանդ որ Հրանդ Տինքի սպանութենէն ետք, «Ակօս» օրաթերթի գլխաւոր խմբագիրի պարտականութիւնները կատարելու ընթացքին, ան արդէն իսկ ձեռք բերած էր հանրային լայն ճանաչում:

Սակայն, Մահճուպեան հերքած է մամուլին մէջ տեղ գտած այն տեղեկութիւնները, թէ ինք ազգային փոքրամասնութիւններուն եւ յատկապէս հայերուն առնչուող հարցերուն ուղղութեամբ խորհրդական ծառայութիւններ պիտի մատուցէ՝ աւելցնելով, որ անցեալ շաբթուան հանդիպումին ընթացքին, ինք վարչապետին հետ չէ խօսած Հայկական Հարցին մասին ու որեւէ յատուկ հարցի վրայ կանգ չեն առած:

Նշենք, որ Մահճուպեան առաջին ոչ իսլամն է, որ կը նշանակուի Թուրքիոյ վարչապետի գլխաւոր խորհրդականի պաշտօնին:

Թրքական «Էվրենսել» թերթի լրագրող-երգիծանկարիչ Սեֆեր Սելվին յատուկ ծաղրանկար մը գծած է այս կապակցութեամբ՝ նշանակումը կապելով հայերու նկատմամբ նախագահ Էրտողանի բացասական եւ խտրական արտայայտութեան: Ծաղրանկարին մէջ պատկերուած են Տաւութօղլուն եւ Մահճուպեանը. անոր մէջ Թուրքիոյ վարչապետը ներկայացնելով իր նոր գլխաւոր խորհրդականը՝ կ՛ըսէ. «Կը ներէք, ա՛յս ալ իմ խորհրդական Մահճուպեանն է»:

Յիշեցնենք, որ Թուրքիոյ նախագահական ընտրութիւններուն համար տարուած քարոզչութեանց ժամանակ, Էրտողան յայտարարած էր, որ իր քաղաքական գործունէութեան ընթացքին բազմաթիւ վիրաւորական արտայայտութիւններ կատարուած են իր հասցէին, իրեն յոյն, վրացի, քիւրտ եւ նոյնիսկ աւելի վատ բաներ ըսած են. «Կը ներէք, բայց ինծի նոյնիսկ հայ անուանած են», աւելցուցած էր ան:

Իր կարգին, «Հիւրրիյէթ»ի յօդուածագիր Ահմետ Հաքան գրած է, որ գոնէ մէկ պատճառով շատ ուրախացած էր Մահճուպեանի նշանակումով։ «Ասկէ ետք, կը կարծեմ, որ ո՛չ մէկ պետական անձ հայ բառը արտասանելէ առաջ ներողութիւն խնդրելու կարիքը պիտի զգայ, որովհետեւ պիտի մտածէ, որ այդպիսի արտայայտութիւն մը պիտի վիրաւորէ Էթիէն Մահճուպեանը։ Էթիէն Մահճուպեանի նշանակումը միայն այս օգտակարութիւնն իսկ ունենայ եթէ, արդէն բաւարար է», նշած է Ահմետ Հաքան։
Միւս կողմէ, «Հայկական անհիմն պնդումներու դէմ» հակահայ կազմակերպութիւնը կոչ ըրած է Թուրքիոյ վարչապետին, որ վերատեսութեան ենթարկէ իր այս որոշումը, յատկապէս որովհետեւ Էթիէն կը ճանչնայ Հայկական Ցեղասպանութիւնը եւ իր յօդուածներուն մէջ կոչ կ՛ընէ թուրքերուն, որ ներողութիւն խնդրեն անոր համար։ Ըստ կազմակերպութեան՝ Մահճուպեանի նշանակումը «շատ մտահոգի»չ է։